ރާއްޖޭގައި އުފެދުނު އެންމެ މޮޅު އެއް ފުޓުބޯޅަ ރެފްރީ މައްލާ ޅަތުއްތުގެ ހަނދާނުގައި ހުޅުވި ތައުޒިޔާގެ ދަފުތަރުގައި ލިޔުމުގެ ފުރުސަތު އަންނަ ހޮނިހިރު ދުވަހުގެ ނިޔަލަށް ހުޅުވިފައި ހުންނާނެ ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން ބުނެފިއެވެ.
ރާއްޖޭގެ ފުރަތަމަ ފީފާ ރެފްރީގެ މައްލާ ޅަތުއްތުގެ ހަނދާނުގައި ތައުޒިޔާގެ ދަފަތްރެއް ހުޅުވާފައިވަނީ އިއްޔެ ޒުވާނުންގެ މަރުކަޒުގައެވެ. ދަފްތަރު ހުޅުވުމަށް ބޭއްވި ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު އަބްދޫﷲ ރާފިއުގެ އިތުރުން ކުރީގެ ރެފްރީންނާއި ކުޅިވަރުގެ އިސްފަރާތްތައް ވަނީ ބައިވެރިވެފައެވެ.
މައްލާ ޅަތުއްތަކީ ރާއްޖޭގެ ކުޅިވަރުގެ ދާއިރާގައި ފާހަގަކޮށްލެވޭ ގިނަ ޚިދުމަތްތަކެއްކޮށްދެއްވި ޝަޚުޞިއްޔަތެކެވެ. އޭނާއަކީ ފީފާ ބެޖު ޙާސިލްކުރެއްވި ފުރަތަމަ ދިވެހި ރެފްރީއެވެ. އޭނާވަނީ 1969 އިން 1995 އާ ހަމައަށް ރެފްރީކަން ކުރައްވާފައެވެ. ދިވެހި ކުޅިވަރަށް ޚިދުމަތްކުރުމުގެ ރޮނގުން ޝަރަފުވެރިކަމުގެ ޤައުމީ އިނާމު، 2021 ވަނަ އަހަރު މައްލާއަށް ލިބިވަޑައިގެންފައިވެއެވެ.
މައްލާ ޅަތުއްތަކީ ރެފްރީކަން ކުރެއްވުމުގެ އިތުރުން ރެފްރީން ބިނާކުރުމުގައިވެސް މަސައްކަތްކުރެއްވި ޚިދުމަތްތެރިއެކެވެ. އެގޮތުން އޭނާ ވަނީ 1975 އިން ފެށިގެން ރެފްރީން ބިނާކުރުމުގައި މަސައްކަތްކުރައްވާފައެވެ. މާލެއާއި އަތޮޅު ތެރޭގައި ރެފްރީން ތަމްރީންކުރުމުގެ ކޯސްތައް މައްލާ ހިންގެވިއެވެ. އަދި ރާއްޖޭގައި ފުރަތަމަ ފަހަރަށް އަންހެން ރެފްރީން ބިނާކުރުމަށް، 2019 ވަނަ އަހަރު އިސްވެ މަސައްކަތް ފެއްޓެވީވެސް މައްލާ ޅަތުއްތެވެ.
މައްލާ ޅަތުއްތު އަވަހާރަވީ އިންޑިއާގެ ޓްރިވެންޑްރަމްގެ ހޮސްޕިޓަލެއްގައި އައިސީޔޫގައި ފަރުވާދެމުންދަނިކޮށް މިދިޔަ ބުރާސްފަތި ދުވަހުގެ މެންދުރުގެ ވަގުތެއްގައެވެ.