އެމްޕޮކްސް ބައްޔަށް ޓެސްޓުކުރުމާއި ފަރުވާދިނުމަށް އެޗްޕީއޭއިން ތައްޔާރުވަނީ

ރާއްޖެއަށް އެމްޕޮކްސް އައުމުގެ ފުރުޞަތު އޮތް މިންވަރު ދެނެގަނެ ބަލިފެތުރުން ކޮންޓްރޯލުކުރުމަށާއި، ބައްޔަށް ޓެސްޓުކުރުމާއި ފަރުވާދިނުމަށް ވާންޖެހޭ ތައްޔާރީތައް ވަމުން އަންނަކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ހާމަކުރައްވައިފިއެވެ.

އެމްޕޮކްސްއަކީ ބައިނަލްއަޤްވާމީ ފެންވަރުގައި ކަންބޮޑުވާންޖެހޭ އާންމު ޞިއްޙަތަށް އޮތް ނުރައްކަލެއް ކަމަށް އޮގަސްޓު 14ގައި ދުނިޔޭގެ ޞިއްޙަތު ޖަމްޢިއްޔާއިންވަނި ކަނޑައަޅާފައެވެ. މިހާލަތު އިޢުލާންކޮށްފައި ވަނީ، މިބައްޔަކީ ކުރިން އެފްރިކާގެ ގައުމުތަކުގައި އޮތް ބައްޔަކަށް ވީނަމަވެސް މިހާރު މި ބަލީގެ އައު ސްޓްރެއިނެއް ފެނި އެހެން ގައުމުތަކަށް ބަލި ފެތުރެމުން ދާތީއެވެ.

ޕަބްލިކް ހެލްތު އިމަރޖެންސީ އޮފް އިންޓަރނޭޝަނަލް ކޮންސަރން، ޕީއެޗްއީއައިސީ އަކީ ބަލިމަޑުކަމެއް އާދަޔާ ޚިލާފަށް ފެތުރިދާނެކަމުގެ ބިރު އޮތުމުގެ ސަބަބުން ދުނިޔޭގެ ހުރިހާ ޤައުމަކުން ސަމާލުކަންދީގެން ބަލި ކޮންޓްރޯކުރުމަށް ކުރަންޖެހޭ މަސައްކަތްތައް ކުރުމަށް ދުނިޔޭގެ ޞިއްޙަތު ޖަމްޢިއްޔާއިން އާންމު ކުރާ ޙާލަތެކެވެ.

ދުނިޔޭގައި މިބަލި ފެތުރެން ފެށުމާއެކު އެޗް.ޕީ.އޭއިން ދަނީ ބަލީީގެ ހާލަތު މޮނިޓަރކޮށް މިބައްޔާ ގުޅިގެން ރާއްޖެއިން ކުރަންޖެހޭ ކަންތައްތަކަށް ތައްޔާރުވަމުންނެވެ. އެގޮތުން ދިވެހި ރާއްޖެއަށް ބަލި އައުމުގެ ފުރުޞަތު އޮތް މިންވަރު ދެނެގަތުމާއި، ބަލިފެތުރުން ކޮންޓްރޯލުކުރުމަށާއި، ބައްޔަށް ޓެސްޓުކުރުމާއި ފަރުވާދިނުމަށް ވާންޖެހޭ ތައްޔާރީތައް ވަމުން އަންނަކަމަށް އެޗްޕީއޭން ވިދާޅުވެއެވެ.
އަދި މިބައްޔަށް ޞިއްޙީ ޚިދުމަތްތެރިން އަހުލުވެރިކުރުމާއި ސަރވެއިލަންސް ހަރުދަނާކުރުމުގެ މަސައްކަތްތައްވެސް ދަނީ ކުރަމުންނެވެ.

މިވަގުތު މިބަލި ހަލުވިކަމާއި އެކު ފެތުރެމުންދަނީ ޑިމޮކްރެޓިކް ރިޕަބްލިކް އޮފް ކޮންގޯ އާއި އެފްރިކާގެ ބައެއް ގައުމުތަކުގައެވެ. 2022ވަނަ އަހަރުން ފެށިގެން މިއަހަރުގެ މިހާތަނަށް 116 ޤައުމަކުން މިބަލީގައި 99000 އަށް ވުރެ ގިނަ ކޭސްވަނީ ފެނިފައެވެ.

އެމްޕޮކްސްގެ މިހާރުފެތުރެމުންދާ ސްޓްރެއިން އާއްމުގޮތެއްގައި ފެތުރެނީ ޖިންސީ ގުޅުމުން ކަމުގައި ވީ ނަމަވެސް، އެހެން ގޮތްގޮތުންވެސް ބަލި ފެތުރުމުގެ ފުރުސަތު އޮވެއެވެ.

އެމްޕޮކްސް ބަލި ފެތުރޭ ގޮތް

* ބަލި ޖެހިފައިވާ މީހާގެ ހަމުގައި ހުންނަ ބިހިތަކުގައި ނުވަތަ އެއިން ނުކުންނަ ދިޔައިގައި ޖެހުން
* ބަލި މީހާ ބޭނުންކުރާ ހެދުން، ތުވާލި އަދި ބެޑްޝީޓް ފަދަ ތަކެތީގައި ޖެހުން
* ނޭވާލާ ނިޒާމުގެ ޒަރިއްޔާއިން އަދި ބަލި ޖެހިފައިވާ ޖަނަވާރަކާއި ކޮންޓެކްޓްވުން (ޝިކާރަކުރާ އިރު، ކަތިލާ އިރު، ހަންދަމާ ސާފުކުރާ އިރު، ނުވަތަ ކެއްކުމުގެ ތެރޭގައި) ބަލި ފެތުރުމުގެ ފުރުސަތު އޮވޭ

އެމްޕޮކްސްގައި އާއްމުކޮށް ފެންނަ އަލާމާތްތައް

* ހުންއައުން
* ގައިގައި ރިއްސުން
* ވަރުބަލިވުން
* ގޮށްލުން
* ހަމުގައި ބިހި ނެގުން

ގިނަ ފަހަރަށް މި ބަލި އަމިއްލަ ޒާތުގައި ރަނގަޅުވީނަމަވެސް ބަލީގެ ހާލަތަށް ބަލާ ހޮސްޕިޓަލްގައި ފަރުވާ ދޭންޖެހޭ ހާލަތު މެދުވެރިވެއެވެ. މި ބައްޔަށް ވަކި ޚާއްސަ ފަރުވާއެއް ހޯދިފައި ނެތް ނަމަވެސް ބަލި ޖެހިފައިވާ މީހާގެ ފަރާތުން ފެންނަ އަލާމާތްތަކަށް ބަލާ، ފޯރުކޮށްދެވެނީ ސަޕޯޓިވް ފަރުވާއެކެވެ.