ޕެނަލްޓީ ޖަހައިގެން 3-4 އިން ސްޓުޓްގާޓް ބަލިކޮށް، 10 ކުޅުންތެރިންނާއެކު ކުޅެމުންދިޔަ ބަޔާ ލެވަކޫސަނުން ޖަރުމަނު ސުޕަ ކަޕް ކާމިޔާބުކޮށްފިއެވެ.
މިއީ ލެވަކޫސަންގެ ތާރީޚުގައި ކާމިޔާބުކުރި ފަސްވަނަ ޓްރޮފީ އެވެ. އެ ޓީމުން ވަނީ ނިމިދިޔަ ސީޒަނުގެ ޖަރުމަނު ބުންޑެސްލީގާ އާއި ޖަރުމަނު ކަޕްގެ އިތުރުން 1993 ވަނަ އަހަރުގެ ޖަރުމަނު ކަޕް އަދި 1988 ވަނަ އަހަރުގެ ޔުއެފާ ކަޕް ކާމިޔާބުކޮށްފައެވެ. އަނެއްކޮޅުން މިއީ އެ ލެވަކޫސަންގެ ކޯޗު، ޒާބީ އަލޮންސޯގެ ކެރިއަރުގައި އެ ޓީމާއެކު ހޯދި ތިންވަނަ ތަށްޓެވެ. އަދި މިއީ އެ ޓީމުން ސުޕަ ކަޕް ކާމިޔާބުކުރި ފުރަތަމަ ފަހަރު ވެސް މެއެވެ.
މި މެޗުގެ ފުރިހަމަވަގުތު ހަމަވިއިރު ދެ ޓީމު 2-2 އިން އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ.
ލެވަކޫސަންގެ ބޭއެރީނާގައި ރޭ ކުޅުނު މި މެޗުގައި ކުރީން ލީޑްނެގީ ވެސް އެ ޓީމުންނެވެ. މެޗުގެ 11 ވަނަ މިނެޓުގައި ލެވަކޫސަނަށް މި ލަނޑުޖަހައިދިނީ ވިކްޓަ ބޮނީފޭސް އެވެ. އޭނާ މި ލަނޑުޖެހީ އެ ޓީމުގެ ޑިފެންޑަރު، އެޑްމޮންޑް ޓެޕްސޯބާ ބޮލުން ޖައްސާލި ޕާހެއްގެ އެހީގައެވެ.
އޭގެ ހަތަރު މިނެޓުފަހުން، ފްރާންސްގެ 23 އަހަރުން ދަށުގެ ޓީމުގެ މިޑްފީލްޑަރު، އެންޒޯ މިލޮޓް ކާމިޔާބުކުރި ގޯލާއެކު ސްޓުޓްގާޓް ނަތީޖާ އެއްވަރުކުރިއެވެ.
ފުރަތަމަ ހާފުގައި ލެވަކޫސަނުން އިތުރު ލަނޑެއްޖެހުމަށް ކުރި މަސައްކަތްތަކަށް ހުރަސް އެޅުނީ، މެޗުގެ 37 ވަނަ މިނެޓުގައި އެ ޓީމުގެ މިޑްފީލްޑަރު، މާޓިން ޓެރިއާ އަށް ސީދާ ރަތެއް ދައްކާ ދަނޑުން ފޮނުވާލުމުންނެވެ. ޓެރިއާ އަށް ރަތް ކާޑު ދެއްކީ ސްޓުޓްގާޓްގެ ބޮސްނިއާ ފޯވާޑް، އެރްމެޑިން ޑެމިރޯވިޗް އަށް ކުރި ނުރައްކާތެރި ޓެކުލަކާ ގުޅިގެންނެވެ. މިއާއެކު، ލެވަކޫސަނުން މެޗުގެ ބާކީބައި ކުޅުނީ 10 ކުޅުންތެރިންނާއެކު އެވެ.
މެޗުގެ 63 ވަނަ މިނެޓުގައި ސްޓުޓްގާޓަށް ފުރަތަމަ ފަހަރަށް ލީޑްނަގައިދިނީ ފަހު ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޖަރުމަނުގެ ފޯވާޑް، ޑެނިޒް އުންޑާވް އެވެ.
މި ނަތީޖާގައި އޮވެ، މެޗު ނިމެންދަނިކޮށް 88 ވަނަ މިނެޓުގައި ލެވަކޫސަނަށް އެއްވަރުކޮށްދިނީ ޗެކް ރިޕަބްލިކްގެ ފޯވާޑް، ޕެޓްރިކް ޝިކް އެވެ. މިއީ އެ ޓީމުގެ ސްޕެއިން ފުލްބެކް، އަލެހަންދްރޯ ގްރިމާލްޑޯ ދިން ތުރޫ ޕާހެއްގެ އެހީގައި ޝިކް ކާމިޔާބުކުރި ގޯލެކެވެ. މި ދެ ކުޅުންތެރިން ވެސް ކުޅެން ނިކުތީ ފަހު ހާފުގެ ފަހު ބައިގައެވެ.
އެއަށްފަހު ނަތީޖާ ނެރުމަށް ދެން ޖެހުނު ޕެނަލްޓީ ޝޫޓްއައުޓްގައި ލެވަކޫސަނުން ފޮނުވާލި ހަތަރު ޕެނަލްޓީ ވެސް ކާމިޔާބުކުރި އެވެ. އެ ޓީމަށް ޕެނަލްޓީތައް ކާމިޔާބުކޮށްދިނީ ޝިކް، ގްރިމާލްޑޯ އާއި އަލެއިކްސް ގާސިއާ އާއި ޓެޕްސޯބާ އެވެ.
ސްޓުޓްގާޓްގެ ފަސް ޕެނަލްޓީގެ ތެރެއިން ކާމިޔާބުކުރެވުނީ ތިން ޕެނަލްޓީ އެވެ. އަނެއް ދެ ޕެނަލްޓީގެ ތެރެއިން ފްރޭންސް ކްރަޒިގް ފޮނުވާލި ބޯޅަ ލެވަކޫސަންގެ ކީޕަރު، ލޫކަސް ރަޑެޗީ މަތަކުރިއިރު، ސިލާސް ފޮނުވާލި ޕެނަލްޓީ ދިޔައީ ހުރަސްދަނޑިމަތިންނެވެ. އެ ޓީމަށް ޕެނަލްޓީ ކާމިޔާބުކޮށްދިނީ މިލޮޓް، ޑެމިރޯވިޗް އާއި އުންޑާވް އެވެ.