ޖަރުމަނުގެ އެޓޭކިންގ މިޑްފީލްޑަރު މާކޯ ރޮއިސް، މޭޖަރ ލީގު ސޮކަރ (އެމްއެލްއެސް) ގެ އެލްއޭ ގެލެކްސީއަށް ބަދަލުވާން އެއްބަސްވުމެއްގައި ސޮއިކޮށްފިއެވެ.
އުމުރުން 35 އަހަރުގެ ރޮއިސް އާއެކު ދެ އަހަރާއި ބައިގެ މުއްދަތުގެ ކޮންޓްރެކްޓެއްގައި ސޮއިކޮށްފައިވާކަން އެ ކްލަބުން ވަނީ ކަށަވަރުކޮށްދީފައެވެ. މި ޑީލުގެ ދަށުން، 2026 ވަނަ އަހަރުގެ ސީޒަނުގެ ނިޔަލަށް އެ ޓީމުގައި އޭނާ މަޑުކުރާނެ އެވެ.
12 އަހަރަށްފަހު ރޮއިސް ވަނީ ނިމިދިޔަ ސީޒަނަށްފަހު ބޮރޫޝިއާ ޑޯޓްމަންޑް އާއެކު ހަދާފައިވާ އެއްބަސްވުން ހަމަވުމުން އެ ކްލަބު ދޫކޮށްލައިފައެވެ. އެހެންކަމުން، އެލްއޭ ގެލެކްސީއާ އޭނާ ގުޅުނީ ހިލޭ ޓްރާންސްފާއެއްގައެވެ. އެ ޓީމާއެކު އޭނާ އެންމެ ފަހުން ކުޅުނީ ޔުއެފާ ޗެމްޕިއަންސް ލީގުގެ ފައިނަލްގައި ރެއާލް މެޑްރިޑާ ދެކޮޅަށެވެ. އެ މެޗުން ރެއާލް މޮޅުވީ 2-0 އިންނެވެ.
"ދެ ފަހަރު ބުންޑެސްލީގާގެ އަހަރުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ މާކޯ، އޭނާގެ މުޅި ކެރިއަރ ޖަރުމަނުގައި ހޭދަކުރުމަށްފަހު ގެލެކްސީއާ ގުޅުމަކީ އަޅުގަނޑުމެން މި ކުލަބުގައި ކުރިއަށްގެންދާ ޕްރޮޖެކްޓްގެ ފުރިހަމަކަން ދައްކުވައިދޭ ހެއްކެއް،" އެލްއޭ ގެލެކްސީގެ ޖެނެރަލް މެނޭޖަރ ވިލް ކުންޓްޒް ބުނެފައިވެއެވެ.
ރޮއިސް ވަނީ ޑޯޓްމަންޑަށް ކުޅުނު 429 މެޗުގައި 170 ލަނޑު ޖަހާފައެވެ. އަދި 2023 އާ ހަމައަށް ފަސް އަހަރު ދުވަހު އެ ޓީމުގެ ކެޕްޓަންކަން ކޮށްފައިވެއެވެ. އޭނާ ވަނީ އެ ކުލަބާއެކު ދެ ފަހަރު ޖަރުމަނު ކަޕް ކާމިޔާބުކޮށްފައެވެ. މީގެ އިތުރުން، ޖަރުމަނުގެ ގައުމީ ޓީމަށް 48 މެޗު ކުޅެ 15 ލަނޑު ޖަހާފައިވެއެވެ.
"އޭނާއަކީ ކާމިޔާބީ ސާބިތުކޮށްދީފައިވާ އަދި ލީޑަރޝިޕް ދައްކާފައިވާ ކުޅުންތެރިއެއް. އޭނާގެ ހުނަރާއި ކުޅުމުގެ ވިޝަންގެ އެހީގައި ލީގު އަލުން ފެށުމާއި ޕްލޭއޮފްސްއަށް ދިއުމުގެ ތައްޔާރީތަކުގައި ޓީމަށް ބޮޑު އެހީތެރިކަމެއް ލިބޭނެ،" އެލްއޭ ގެލެކްސީގެ ކޯޗު ގްރެގް ވެނީ ބުނެފައިވެއެވެ.
މިހާތަނަށް ކުޅުނު މެޗުތަކަށްފަހު އެލްއޭ ގެލެކްސީ މިހާރު އޮތީ ވެސްޓަން ކޮންފަރެންސްގެ ތާވަލްގެ އެންމެ ކުރީގައެވެ. އެ ޓީމަށް ދެން އޮތީ އަމިއްލަ ދަނޑުގައި އެޓްލާންޓާ ޔުނައިޓެޑާ ދެކޮޅަށް މި މަހުގެ 25 ވަނަ ދުވަހު ކުޅުމަށް ހަމަޖެހިފައިވާ މެޗެވެ.