ޕޯޗުގަލްގެ ޕޯޓޯ ފޯވާޑް، އެވަނިލްސަން ގަތުމަށް ބޯންމަތުން އެ ކުލަބާއެކު އެއްބަސްވުމަކަށް އަތުވެއްޖެއެވެ.
މީޑިއާ ރިޕޯޓްތައް ބުނާގޮތުން، ބޯންމައުތުން ގާތްގަނޑަކަށް 47 މިލިއަން ޔޫރޯއާ ގާތްކުރާ އަދަދެއްގެ ޓްރާންސްފާ ފީއެއް ޕޯޓޯ އަށް ދައްކާނެ އެވެ.
އުމުރުން 24 އަހަރުގެ އެވަނިލްސަން ޕޯޓޯއާ ގުޅުނީ 2020 ވަނަ އަހަރުގެ ސެޕްޓެމްބަރު މަހު ޓޮމްބެންސީ އިންނެވެ. އެއަށްފަހު، ޖެހިގެންއައި ސީޒަނުގައި އޭނާ ވަނީ ޕޯޓޯގެ ސީނިއާ ޓީމުން ޖާގަ ހޯދާފައެވެ. އޭނާ ވަނީ އެ ޓީމާއެކު ހޭދަކުރީ ފާއިތުވެދިޔަ ހަތަރު ސީޒަނުގައި ކުޅުނު 154 މެޗުގައި 60 ލަނޑުޖަހައި، އިތުރު 21 ގޯލްޖެހުމަށް އެހީތެރިވެދީފައެވެ.
ފާއިތުވި ސީޒަނަކީ އެވަނިލްސަންގެ އެންމެ ކާމިޔާބު ސީޒަނެވެ. އެގޮތުން، ހުރިހާ މުބާރާތެއްގައި އޭނާ ވަނީ ކުޅުނު 42 މެޗުގައި 25 ލަނޑުޖަހައި، އިތުރު ހަތް ގޯލްޖެހުމަށް އެހީތެރިވެދީފައެވެ. މީގެތެރެއިން، ހަތަރު ގޯލްޖަހައިދިނީ ޔުއެފާ ޗެމްޕިއަންސް ލީގުގައެވެ. އޭނާ ވަނީ ޕޯޓޯއާއެކު 6 މުބާރާތެއް ކާމިޔާބުކޮށްފައެވެ. މީގެ ތެރޭގައި 3 ޕޯޗުގީޒް ކަޕާއި 2022 ވަނަ އަހަރުގެ ޕޯޗުގީޒް ލީގު ޗެމްޕިއަންކަން ކާމިޔާބުކުރުން ހިމެނެއެވެ.
ކްލަބު ލެވެލްގައި އެވަނިލްސަން ދެއްކި މޮޅު ކުޅުމުގެ ކުޅުމުގެ ސަބަބުން، 2024 ވަނަ އަހަރުގެ ޖޫން މަހު އޭނާއަށް ބްރެޒިލްގެ ސީނިއާ ޓީމަށް ފުރަތަމަ ފަހަރަށް ކުޅުމުގެ ފުރުޞަތު ލިބުނެވެ. އަދި އެންމެ ފަހުގެ ކޮޕާ އެމެރިކާ ފުޓްބޯޅަ މުބާރާތަށް ބްރެޒިލްގެ ކޯޗު ޑޮރިވާލް ޖޫނިއާ އެކުލަވާލި ވަގުތީ ސްކޮޑުގައި ވެސް އޭނާ ހިމެނުނެވެ.
ބޯންމަތުން އެވަނިލްސަންގެ ސޮއި ހޯދުމުގެ މަސައްކަތް ފެށީ، ގާތްގަނޑަކަށް 65 މިލިއަން ޕައުންޑްގެ ޑީލެއްގައި އެ ޓީމުގެ އިސް ފޯވާޑް، ޑޮމިނިކް ސޮލާންކޭ ޓޮޓެންހަމް ހޮޓްސްޕާއަށް ބަދަލުވުމާ ގުޅިގެން، އޭނާގެ ބަދަލުގައި އިތުރު ފޯވާޑެއް ގެނައުމުގެ ގޮތުންނެވެ. މީގެކުރީން، ބޯންމަތުން ވަނީ ސޮލާންކޭގެ ބަދަލުގައި އާސެނަލްގެ އިނގިރޭސި ފޯވާޑް، އެޑީ އެންކެޓިއާ ގެނައުމަށްވެސް މަސައްކަތްކޮށްފައެވެ.
އައު ސީޒަނުގެ ލީގުގައި ބޯންމަތުން ކުޅޭ ފުރަތަމަ މެޗުގައި ހޮނިހިރު ދުވަހު ސިޓީ ގްރައުންޑްގައި ނިކުންނާނީ ނޮޓިންހަމް ފޮރެސްޓާ ދެކޮޅަށެވެ.