ހައްދުންމަތީ ބޮޑުމަގުގައި ތާރު އެޅުމުގެ މަސައްކަތް އެއްކޮށް ނިންމާލައިފިއެވެ.
ޗައިނާ ސަރުކާރުގެ ހިލޭ އެހީގައި ކުރިއަށްގެންދަވާ މި މަޝްރޫޢުގެ ދަށުން، ލ.އަތޮޅުގެ ގުޅިފައިވާ ރަށްތަކުގެ 15 ކިލޯ މީޓަރުގެ ދިގު މަގުގައި ވަނީ ތާރު އަޅާފައެވެ. ހައުސިންގ މިނިސްޓްރީން ވިދާޅުވީ ތާރު އެޅުމުގެ މަސައްކަތް އިއްޔެގެ ނިޔަލަށް ނިމިފައިވާ ކަމަަށާއި، މިހާރު ކުރިއަށްދަނީ މަގުމަތީގެ ފާހަގަތައް ހެދުމާއި، ޓްރެފިކް ނިޝާންތައް ހެދުމުގެ މަސައްކަތް ކަމަށެވެ. އަންނަ ޖޫންމަހުގެ ތެރޭގައި މަގު ބައްތިތައް ހަރުކުރުމުގެ މަސައްކަތް ފެށިގެންދާނެ ކަމަށްވެސް ހައުސިން މިނިސްޓްރީން ވިދާޅުވެއެވެ.
ލ.ގަމާއި، މާންދޫއާއި ކައްދޫއާއި ފޮނަދޫ ގުޅުވައިދޭ ބޮޑުމަގު، ޒަމާނީ ފެންވަރަށް ތާރު އަޅައިގެން ތަރައްޤީ ކުރުމުގެ މަޝްރޫޢު ފެއްޓެވީ 2014 ވަނަ އަހަރުގެ ޑިސެމްބަރުމަހުއެވެ. މިއަހަރު ޖުލައި މަހުގެ ނިޔަލަށް ހުރިހާ މަސައްކަތްތަކެއް ނިންމާލެވޭނެ ކަމަށް ހައުސިން މިނިސްޓްރީން ލަފާ ކުރައްވައެވެ.
ހައްދުންމަތީ ބޮޑު މަގުގެ މަސައްކަތަކީ، ޗައިނާ ސަރުކާރުގެ ހިލޭ އެހީގައި 30 މިލިއަން އެމެރިކާ ޑޮލަރުގެ މަޝްރޫޢެކެވެ. މި މަޝްރޫއުގެ ޢަމަލީ މަސައްކަތް ކުރިއަށްގެންދަނީ ޖިއާންޒޫ ޕްރޮވިންޝިއަލް ޓްރާންޕޯޓޭޝަން އިންޖިނިއަރިންގ ކޯޕަރޭޝަނުންނެވެ.