ޤާނޫނީ ރައްކާތެރިކަން ލިބުމުން ރާއްޖެއަށް އިންވެސްޓްމަންޓުތައް އިތުރުވާނެ: މެންބަރުން

ފޮރިން އިންވެސްޓްމަންޓުގެ ބިލާއެކު އިންވެސްޓްމަންޓުތަކަށް ޤާނޫނީ ރައްކާތެރިކަން ލިބި، ރާއްޖެއަށް އިންވެސްޓްމަންޓުތައް އިތުރުވާނެ ކަމަށް ރައްޔިތުންގެ މަޖިލީހުގެ މެންބަރުން ވިދާޅުވެއްޖެއެވެ. މެންބަރުން މިހެން ވިދާޅުވެފައިވަނީ ސަރުކާރުގެ ފަރާތުން ހުށަހަޅުއްވާފައިވާ ފޮރިން އިންވެސްޓްމަންޓުގެ ބިލަށް ބަހުސް ކުރައްވަމުންނެވެ. މި ބިލު މަޖިލީހަށް ހުށަހެޅުއްވީ ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫގެވެ.

ބިލު ހުށަހަޅުއްވައި ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫގު ވިދާޅުވީ ރާއްޖެއަށް ބޭރުގެ އިންވެސްޓްމަންޓުތައް މުހިންމު ކަމަށާއި، އެ ފުރުސަތުތައް ފަހިކޮށްދީ އިގްތިޞާދު ފުޅާކުރަންޖެހޭކަމަށެވެ. އެގޮތުން، މިއަދު ރާއްޖެއަށް ދިމާވެފައިވާ އެންމެ ބޮޑު ގޮންޖެހުމަކީ އިގްތިޞާދު ސިންދަފާތުވެފައިނެތުން ކަމަށާއި، ފަތުރުވެރިކަމުގެ އިތުރުން ދަނޑުވެރިކަމާއި، މަސްވެރިކަމާއި، ޓެކްނޮލިޖީއާއި، ހަކަތައިގެ ދާއިރާއިން ރާއްޖެއަށް ބޮޑެތި އިންވެސްޓްމަންޓުތައް ބޭނުންވާކަން އަޒާން ފާހަގަކުރެއްވިއެވެ.

އަޒާން ވިދާޅުވީ ސަރުކާރުން ރާއްޖޭގައި އިންވެސްޓްމަންޓުގެ ފުރުސަތުތައް އިތުރުކުރުމަށް މަސައްކަތްކުރަމުން އަންނައިރު ފޮރިން އިންވެސްޓްމަންޓުގެ ބިލުގެ ސަބަބުން އެކަމަށް މަގުފަހިކޮށްދޭނެކަމަށެވެ.

"ފާއިތުވި 15 އަހަރަށް ބަލާއިރުވެސް ބޭރުގެ ބައެއް އިންވެސްޓަރުންނަށް ހިތި ތަޖުރިބާތައް ކުރަންޖެހިފައި އެބަވޭ. މި ބިލުން އެކަންތައްތަކަށް ހައްލު ލިބިގެންދާނެ. ބޭރުގެ އިންވެސްޓަރުންނަށް ހިމާޔަތް ލިބޭ ފަދައިން ދިވެހި އިންވެސްޓަރުންނަށްވެސް، ދިވެހި ދައުލަތުގެ އެންމެ މަތީ މަސްލަހަތުވެސް މި ބިލުން ހިމާޔަތްކޮށްދޭ،" އަޒާން ވިދާޅުވިއެވެ.

މި ބިލަށް ވާހަކަ ދައްކަވަމުން މަނަދޫ ދާއިރާގެ މެންބަރު ހުސްނީ މުބާރިކް ވިދާޅުވީ މިއީ ރާއްޖޭގެ ކުރިއެރުމަށާއި، އިގްތިޞާދީގޮތުން ކުރިއެރުމަށް މުހިންމު ބިލެއް ކަމަށެވެ. ރާއްޖޭގައި މިހާރު ފޮރިން އިންވެސްޓްމަންޓާ ގުޅިގެން އަމަލުކުރަމުންދާ ޤާނޫނަކީ ޒަމާނާ އެކަށީގެންވާ ޤާނުނެއް ނޫން ކަމަށާއި، ޒަމާނާ ގުޅޭފަދަ ޤާނޫނެއް ނެތުމަކީ އިންވެސްޓްމަންޓުތައް ގެނައުމުގައި ހުރި ދައްޗެއްކަމަށް ވިދާޅުވިއެވެ.

ބޭރުގެ އިންވެސްޓަރުންގެ އިތުރުން ދިވެހި ވިޔަފާރިތަކަށްވެސް މިބިލުގެ ސަބަބުން ފުރުސަތުތައް ލިބިގެންދާނެކަމަށް ހުސްނީ މުބާރިކް ވިދާޅުވިއެވެ.

"އަޅުގަނޑުމެން މިއުޅެނީ އިގްތިސާދުގެ ތެރެއަށް ގިނަ ވިޔަފާރިތަކެއް ގެންނަން. ގިނަ ކަންތައްތަކެއް ތައާރަފުކުރަން. ގިނަ ޒުވާނުން ބާރުވެރިކުރަން. އެހެންކަމަށްވާނަމަ އަލަށް ވިޔަފާރީގެ ތެރެއަށް ވަންނަ މީހަކީ އެންމެ ރަނގަޅު ކެޕިޓަލަކާއެކު ވަންނަ މީހެއް ނޫން. އޭނާއާ ދިމާވާ ބޭރުގެ މީހަކާއެކު ކުޑަ ކެޕިޓަލަކާއެކު ފެށޭނެގޮތަށް ފަހިވެފައި އޮތުން އެއީ ރަނގަޅު ކަމެއްކަމުގައި ދެކެން،" ހުސްނީ މުބާރިކް ވިދާޅުވިއެވެ.

ހޯރަފުށި ދާއިރާގެ މެންބަރު ޢަލީ މޫސާ ވިދާޅުވީ މިހާރު އަމަލުކުރަމުންދާ ޤާނޫނަށް އިސްލާހުތައް ގެނައި ނަމަވެސް އެ އިސްލާހުތަކަކީ އިންވެސްޓްމަންޓުތަކަށް ދަތިކުރުމުގެ ގޮތުން އޭރު ގެނެސްފައިވާ އިސްލާހުތަކެއް ކަމަށެވެ. ނަމަވެސް މިހާރު ސަރުކާރުން ހުށަހަޅާފައިވާ ބިލުގެ ސަބަބުން ވިޔަފާރިތަކަށް ފުރުސަތުތައް ފަހިވެ އިންވެސްޓްމަންޓުތަކަށް ފުރުސަތު ހުޅުވިގެންދާނެކަމަށް ޢަލީ މޫސާ ވިދާޅުވިއެވެ.

"ބަވަނަވެފައިވާ ދުނިޔޭގައި އިގްތިޞާދު ޑައިވާސިފައިވެގެންދާއިރު ދުނިޔޭގައި އިންވެސްޓްމަންޓުތަކަށް އުފެދިފައިވާ ވާދަވެރިކަމުގެ ތެރޭގައި އަޅުގަނޑުމެންނަށް އިންވެސްޓަރުން ގެނެވޭނީ އެހެން ޤައުމުތަކުގައި އިންވެސްޓަރުންނަށް އުފައްދާފައިވާ ފަހި މާހައުލެއް އުފައްދައިގެންކަން ޔަގީން،" މެންބަރު ޢަލީ މޫސާ ވިދާޅުވިއެވެ.

މިބިލަށް ގިނަ މެންބަރުން ތާއީދު ކުރެއްވި ނަމަވެސް އިދިކޮޅު އެމްޑީޕީގެ މެންބަރުން ވަނީ ބިލާ ދެކޮޅަށް ވާހަކަފުޅު ދައްކަވާފައެވެ.