ޗެލްސީ އަށް ކުޅެމުން އަންނަ އިނގިރޭސި މިޑްފީލްޑަރު، ކޯލް ޕާމާ އެ ޓީމާއެކު ހަދާފައިވާ އެއްބަސްވުން އިތުރު ދެ އަހަރު ދުވަހަށް އާކޮށްފިއެވެ.
މިއާއެކު، ޕާމާ އެ ކްލަބުގައި 2033 ވަނަ އަހަރުގެ ޖޫން މަހުގެ ނިޔަލަށް މަޑުކުރާނެ އެވެ. މިއީ ޕްރިމިއާ ލީގުގެ ކުޅުންތެރިއަކަށް މިހާތަނަށް ދިން އެންމެ ދިގު ކޮންޓްރެކްޓެވެ.
ނިމިދިޔަ ސީޒަނުގައި މެންޗެސްޓާ ސިޓީން ޗެލްސީ އަށް ބަދަލުވީ ގާތްގަނޑަކަށް 47 މިލިއަން ޔޫރޯގެ ޑީލެއްގައެވެ. އޭރު ޕާމާ ވަނީ ޗެލްސީ އާއެކު އަށް އަހަރުގެ ކޮންޓްރެކްޓެއްގައި ސޮއިކޮށްފައެވެ.
މި ފަހަރު ޕާމާގެ ކޮންޓްރެކްޓް އައު ކުރުމާއެކު ކުރިއަށް އޮތް ނުވަ އަހަރު އޭނާ ކުޅޭނީ ޗެލްސީ އަށެވެ. އެ ޓީމުގެ ޒުވާން ކުޅުންތެރިން ދިގު މުއްދަތުގެ ކޮންޓްރެކްޓެއްގައި ސޮއިކުރުމަކީ ޗެލްސީން ވަރަށް ބޮޑު އިސްކަމެއްދޭ ކަމެކެވެ.
ޗެލްސީ އާއެކު ހަދާފައިވާ އެއްބަސްވުން އައު ކުރުމަށްފަހު ޕާމާ ބުނީ، ޗެލްސީ އާއެކު ހޭދަކުރީ ފުރަތަމަ ސީޒަނުގައި ވަރަށް ގިނަ ކަންތައްތަކެއް ހާސިލްކުރެވިފައިވާ ކަމަށެވެ. އަދި އުންމީދުކުރަނީ އަމިއްލަ ގޮތުންނާއި، ޗެލްސީ އާއެކު ޓްރޮފީތައް ހާސިލްކޮށް، ރަނގަޅު ތަޖުރިބާތައް ކުރިއަށްގެންދިއުމަށް ކަމަށް ވެސް ޕާމާ ވަނީ ބުނެފައެވެ.
ޗެލްސީ އާއެކު ހޭދަކުރީ ފުރަތަމަ ސީޒަނުގައި ޕާމާ ވަނީ، މޮޅު ކުޅުމެއްދައްކައި ލީގުގައި 22 ލަނޑުޖަހައި، އިތުރު 11 ލަނޑުޖެހުމަށް އެހީތެރިވެދީފައެވެ. މިއާއެކު، އެންމެ ފަހުގެ ޔޫރަޕިއަން ޗެމްޕިއަންޝިޕްގައި ވާދަކުރި އިނގިރޭސި ސްކޮޑުން އޭނާ ޖާގަ ހޯދިއެވެ.
ޔޫރޯގައި ވެސް ކުޅެން ލިބުނު މަދު ފުރުޞަތުތަކުގެ ބޭނުންހިފައި، ޕާމާ ވަނީ ރަނގަޅު ކުޅުމެއްދައްކާފައެވެ. އެގޮތުން، އެ މުބާރާތުގެ ފައިނަލްގައި ސްޕެއިން އަތުން 2-1 އިން ބަލިވި މެޗުގައި އިންގްލެންޑްގެ ހަމައެކަނި ލަނޑުޖަހައިދިނީ ވެސް ޕާމާ އެވެ. އެ މެޗުގައި ޕާމާ ކުޅެން ނިކުތީ ބަދަލު ކުޅުންތެރިއެއްގެ ގޮތުގައެވެ.
މީގެއިތުރުން، ނިމިދިޔަ ސީޒަނުގައި ދެއްކި މޮޅު ކުޅުމާއެކު ޕާމާ ވަނީ ޕްރޮފެޝަނަލް ފުޓްބޯލާސް އެސޯސިއޭޝަނުން ހޮވާ އަހަރުގެ އެންމެ މޮޅު ކުޅުންތެރިޔާގެ މަގާމަށް ޝޯޓްލިސްޓްކުރެވިފައިވާ ހަ ކުޅުންތެރިންގެ ތެރޭގައި ހިމެނިފައެވެ. މި މަގާމަށް ހޮވޭ ކުޅުންތެރިޔާ އިޢްލާންކުރުމަށް ހަމަޖެހިފައިވަނީ މި އޮގަސްޓް މަހުގެ 20 ވަނަ ދުވަހު ބާއްވާ ހާއްސަ ހަފްލާއެއްގައެވެ.