މިހާރު ޕެރިހުގައި ކުރިއަށްދާ އޮލިމްޕިކްސްގެ ފިރިހެނުންގެ ފުޓްބޯޅަ އިވެންޓްގައި ރޭ މިސްރު އަތުން 1-3 އިން މޮޅުވެ، ފްރާންސުން 40 އަހަރުގެ ތެރޭގައި ފުރަތަމަ ފައިނަލަށް ދަތުރުކުރިއިރު އަނެއް ސެމީގައި ސްޕެއިނުން ވަނީ 2-1 އިން މޮރޮކޯ ބަލިކޮށްފައެވެ.
ސްޓޭޑް ޑެ ލިޔޯންގައި ރޭ ކުޅުނު މެޗުގައި ކުރީން ލީޑްނެގީވެސް މިސްރުންނެވެ. މެޗުގެ 62 ވަނަ މިނެޓުގައި އެ ޓީމަށް މި ލަނޑުޖަހައިދިނީ މަހުމޫދު ސާބިރް އެވެ. މުޅި މެޗުގައި ފްރާންސުން ފޮނުވާލި ތިން ހަމަލާއެއް ހުރަސްދަނޑިއަށް އަމާޒުވެފައިވާއިރު، މެޗު ނިމެން ހަތް މިނެޓަށްވެފައިވަނިކޮށް އެ ޓީމަށް ނަތީޖާ އެއްވަރުކޮށްދިނީ ކްރިސްޓަލް ޕެލަސްގެ ފޯވާޑް، ޖީން-ފިލިޕް މަޓޭޓާ އެވެ. މި ލަނޑުޖެހުމަށް އެހީތެރިވެދިނީ ކުރީން މަޓޭޓާ އާއެކު ޕެލަސް އަށް ކުޅުނު ވިންގް، މައިކަލް އޮލީސޭ އެވެ. އޭގެފަހުން، މެޗުގެ ފުރިހަމަވަގުތު ހަމަވެގެން ދެއްކި އިތުރުވަގުތުގެ ދެވަނަ މިނެޓުގައި މިސްރުގެ އޮމަރް ފާއިދު އަށް ދެވަނަ ރީނދޫ ކާޑާއެކު ރަތެއް ދެއްކުމުން އެ ޓީމުން ބާކީބައި ކުޅުނީ އެއްކުޅުންތެރިއަކު މަދުކޮށެވެ.
މެޗުގެ 90 މިނެޓުގެ ކުޅުމަށްފަހު، ދެ ޓީމު 1-1 އިން އެއްވަރުވެފައި އޮތުމުން ނަތީޖާ ނެރުމަށް ކުޅެވުނު އިތުރުވަގުތުގެ 15 މިނެޓުގެ ދެ ހާފުގެ ތެރެއިން ކޮންމެ ހާފެއްގައި ފްރާންސުން ވަނީ ލަނޑެއްޖަހައިފައެވެ. އެގޮތުން، މި މެޗުގައި ފްރާންސުން ފުރަތަމަ ފަހަރަށް ލީޑްނެގި 99 ވަނަ މިނެޓުގައި މަޓޭޓާ ވައްދާލި ލަނޑުންނެވެ. އޭގެފަހުން، އިތުރުވަގުތުގެ ފަހު ހާފުގެ ކުޅުން ފެށިގެން ތިންވަނަ މިނެޓުގައި އެ ޓީމުގެ ތިންވަނަ ލަނޑުޖަހައިދިނީ އޮލީސޭ އެވެ.
މި ފަހަރުގެ ގޭމްސްގެ އަނެއް ސެމީގައި ސްޕެއިނުން ފަހަތުންއަރައި މޮރޮކޯ އަތުން މޮޅުވިއިރު، އެ ޓީމުގެ ހުރިހާ ލަނޑެއް ކާމިޔާބުކުރީ ވެސް ފަހު ހާފުގައެވެ. މި މެޗުގެ ފުރަތަމަ ހާފުގެ ކުޅުން ނިމެން އަށް މިނެޓަށްވެފައިވަނިކޮށް މޮރޮކޯ އިން ލީޑްނެގީ ސޫފިއާން ރަހީމީ ޕެނަލްޓީއަކުން ކާމިޔާބުކޮށްދިން ލަނޑުންނެވެ. މިއީ މި ފަހަރުގެ އޮލިމްޕިކްސްގެ ޓޮޕް ސްކޯރާ، ރަހީމީގެ ހަވަނަ ގޯލެވެ. މި ގޯލާއެކު މޮރޮކޯ އިން ފުރަތަމަ ހާފު ނިންމާލީ 1-0 އިން ކުރީގަ އޮވެގެންނެވެ.
ސްޕެއިނުން އެއްވަރުކުރި ލަނޑު، 65 ވަނަ މިނެޓުގައި ކާމިޔާބުކޮށްދިނީ ބާސެލޯނާގެ މިޑްފީލްޑަރު، ފާމިން ލޮޕޭޒް އެވެ. އޭގެފަހުން، މެޗު ނިމެން ފަސް މިނެޓަށްވެފައިވަނިކޮށް ސްޕެއިން މޮޅުވި ލަނޑުޖަހައިދިނީ ހުއަންލޫ ސަންޗޭޒް އެވެ. އޭނާ މި ލަނޑުޖެހީ ލޮޕޭޒް ދިން އެސިސްޓަކުންނެވެ.
މީގެކުރީން، 1992 ވަނަ އަހަރު ބާސެލޯނާގައި ބޭއްވި އޮލިމްޕިކްސްގެ ރަން މެޑެލް ސްޕެއިނުން ހާސިލްކޮށްފައިވާއިރު، އެންމެ ފަހުން ޓޯކިޔޯގައި ބޭއްވި ގޭމްސްގެ ފައިނަލްގައި ބްރެޒިލް އަތުން ވަނީ ބަލިވެފައެވެ. މިއަހަރުގެ ގޭމްސްގެ ފިރިހެނުންގެ ފުޓްބޯޅައިގެ ފައިނަލްގައި ސްޕެއިނުން ފްރާންސާ ދެކޮޅަށް ނިކުންނާނީ މި މަހުގެ 9 ވާ ހުކުރު ދުވަހުގެ ރޭގަނޑު ރާއްޖޭގަޑިން ނުވައެއް ޖަހާއިރު އެވެ. އޭގެ އެއްދުވަސް ކުރީން، ބްރޯންޒް މެޑެލް މެޗުގައި މިސްރު ނިކުންނާނީ މޮރޮކޯއާ ދެކޮޅަށެވެ.