ކްރިކެޓް ބޯޑް އޮފް މޯލްޑިވްސް އިން އިންތިޒާމްކޮށްގެން ބޭއްވި ޓީ20 ޕްރެޒިޑެންޓްސް ކަޕްގެ ޗެމްޕިއަންކަން ސީބީއެލް ހޯދައިފިއެވެ.
މުބާރާތުގެ ޗެމްޕިއަންކަން ސީބީއެލް ހޯދީ ފައިނަލުގައި މިލާން ކްރިކެޓު އެކަޑަމީއާ ވާދަކޮށް އެއް ލަނޑުން މެޗު ކާމިޔާބުކޮށްގެންނެވެ.
މެޗުގެ ގުރުދިމާވުމުން ސީބީއެލް ކުޅެންއަރާ 20 އޯވަރު ހަމަވިއިރު 8 ކުޅުންތެރިން ނުބައިވެގެން 167 ލަނޑު ހެދިއެވެ. އެންމެ ރަނގަޅަށް ކުޅުނީ 36 ލަނޑު ހެދި ސަމިތަ އާއި 27 ލަނޑު ހެދި ހަރުސަގެ އިތުރުން 56 ލަނޑު ހެދި ކައުސަލް އެވެ.
މިލާން ކްރިކެޓް އެކަޑަމީން އެންމެ ރަނގަޅަށް އުކީ އިސްމާއިލް ނަޒުވާން އެވެ. އޭނާ ވަނީ ތިން ވިކެޓު ނަގާފައެވެ. އަދި އާދަމް ނާސިފް އާއި އިބްރާހިމް ރިޒާން، މިއިން ކޮންމެ އުކުންތެރިއެއް އެއްވިކެޓު ނެގިއެވެ.
ޖަވާބުގައި މިލާން ކުޅެންއަރާ 20 އޯވަރު ހަމަވިއިރު 9 ކުޅުންތެރިން ނުބައިވެގެން 166 ލަނޑު ހެދިއެވެ. އެންމެ ރަނގަޅަށް ކުޅުނީ 63 ލަނޑު ހެދި ޔޫސުފް އަޒިޔާން އާއި 41 ލަނޑު ހެދި އަހުމަދު ހަސަނެވެ. ސީބީއެލްއިން އެންމެ ރަނގަޅަށް އުކީ 4 އޯވަރު 19 ލަނޑަށް ހަތަރު ވިކެޓްނެގި މަލިތު ޑި ސިލްވާއާއި ތިން ވިކެޓްނެގި ހަރުސައެވެ. މެޗުގެ އެންމެ މޮޅު ކުޅުންތެރިއަކަށް ވެސް ހޮވިފައިވަނީ ސީބީއެލްގެ ހަރުސައެވެ.
ފައިނަލް މެޗަށްފަހު އިނާމުދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ސްޓޭޓް މިނިސްޓަރ މުހައްމަދު ރިޔާޒު، އަދި ކޮމިޝަނާ އޮފް ސްޕޯޓްސް މުޙައްމަދު ތޮލާލްގެ އިތުރުން ކްރިކެޓް ބޯޑުގެ ރައީސް މުޙައްމަދު ފައިސަލްއާއި ނައިބު ރައީސް އަހުމަދު ހުސެއިނެވެ.