ނޭޕާލުން: އިސްމާޢީލް ޝާހު
ކަތުމަންޑޫ (ސެޕްޓެމްބަރު 24) - ސެންޓްރަލް އޭޝިއަން ވޮލީބޯލް އެސޯސިއޭޝަންސް (ކާވާ) ވިމެންސް ނޭޝަންސް ލީގުގައި ރާއްޖެ އަތުން ހޯދި އުނދަގޫ މޮޅެއް ހޯދައިފިއެވެ.
ނޭޕާލްގެ ދަސަރަތު ސްޓޭޑިއަމްގައި ހުންނަ ނޭޝަނަލް ސްޕޯޓްސް ކައުންސިލްހޯލުގައި ކުޅުނު މި މެޗުގައި އީރާނުން ކާމިޔާބުކޮށްފައިވަނީ ސީދާ ތިން ސެޓުންނެވެ. މެޗުގެ ސެޓުތައް އީރާނުން ކާމިޔާބުކޮށްފައިވަނީ 25-21، 25-20، 25-16 އިންނެވެ.
މިއީ މި މުބާރާތުގައި ރާއްޖެ ކުޅުނު ދެވަނަ މެޗެވެ. ފުރަތަމަ މެޗުގައި ރާއްޖެ ބަލިވީ ސީދާ ތިން ސެޓުންނެވެ. އެ މެޗުގައި ދިވެހި ޓީމަށް މަދު ޕޮއިންޓުތަކެއް ލިބުނު ނަމަވެެސް އީރާނާ ދެކޮޅަށް ކުޅުނު މެޗުގައި ދިވެހި ޓީމުގެ ފަރާތުން ކުރިއެރުންތަކެއް ވަނީ ފެނިފައެވެ. ހާއްސަކޮށް ބޫޓާންގައި ކުރިއަށްދިޔަ ކާވާ ބީޗުވޮލީ މުބާރާތުގައި ވާދަކުރުމަށްފަހު ޓީމުގެ އެންމެ ސީނިއާ ތިން ކުޅުންތެރިންގެ ތެރެއިން އައިޝަތު މާޖިދާ އާއި ހައްވާ ރާޝިދާ ގުޅުމާއެކު ޓީމުން ތަފާތު ފެނިގެންދިޔަ އެވެ.
މެޗުގެ ފުރަތަމަ ސެޓު ރާއްޖެއިން ފެށީ މާޖިދާ އާއި ހައްވަ ނުލައެވެ. އެއީ ބޫޓާން މުބާރާތަށްފަހު ދެ ކުޅުންތެރިންވެސް މި މެޗުގައި ފުލްކޮށް ނުކުޅުވަން ވެގެންނެވެ. ދިވެހި ޓީމުން އިންޑިއާ އާއި ދެކޮޅަށް ކުޅުނު މެޗުގައި އެންމެ ގިނަ ޕޮއިންޓު ހޯދައިދިން މާޔާ ހުސެއިން ސޮލާހު މި މެޗުގައި ނުކުޅެއެވެ. އެއީ އަނިޔާގެ ސަބަބުން ނިންމި ނިންމުމެއް ކަމަށް ޓީމުގެ ކޯޗު ސޮފްވާން މުޙައްމަދު ވަނީ ބުނެފައެވެ.
ފުރަތަމަ ސެޓުގެ ކުރީކޮޅު އީރާނުން ލީޑު ފުޅާކުރަން މަސައްކަތްކުރި ނަމަވެސް ރާއްޖޭގެ ބްލޮކުތަކާއި ރިސީވްތަކާއި އެޓޭކުތަކުން ވަނީ ތަފާތު ދައްކާފައެވެ. ވަކި ހިސާބަކުން ހައްވަ އާއި މާޖިދާ ކުޅެން އެރިއެވެ. އަދި އީރާނަށް އޭގެ އުނދަގޫ ކުރިމަތިވުމުން ގާތްގާތުގައި އެ ޓީމަށް ޓައިމްއައުޓު ނަގަން މަޖުބޫރުވިއެވެ.
ދެވަނަ ސެޓުގައިވެސް ދިވެހި ޓީމުން ދެއްކީ މޮޅު ކުޅުމެކެވެ. މުޅި މެޗުގެ ނިސްބަތުން ދިވެހި ޓީމުގެ ގޯސްތައް މި މެޗުގައި މަދެވެ. ނަމަވެސް ބައެއް ބޯޅަތަކުގައި އެކަށީގެންވާ ވަރުގެ ކުޅުމެއް ނުދެއްކެއެވެ. ތިންވަނަ ސެޓުގައި ދިވެހި ކުޅުންތެރިންގެ ފަރާތުން ވަރުބަލިކަން ފެނިގެންދިޔަ އެވެ. އަދި ބައެއް ސީނިއާ ކުޅުންތެރިން ބަދަލުކުރަންވެސް ޖެހުނެވެ.
ޖުމްލަ ފަސް ގައުމާއެކު ކުރިއަށްދާ މި މުބާރާތުގައި ރާއްޖެ ދެން ކުޅޭ މެޗުގައި ބައްދަލުކުރާނީ ސްރީ ލަންކާއާއެވެ. އަދި ފަހު މެޗުގައި އޭގެ ޖެހިގެން އަންނަ ދުވަހު ބައްދަލުކުރާނީ މުބާރާތް ބާއްވާ ނޭޕާލާއެވެ.