މިހާރު ޕެރިހުގައި ކުރިއަށްދާ އޮލިމްޕިކް ގޭމްސްގެ ފިރިހެނުންގެ ފުޓްބޯޅަ އިވެންޓްގައި ރޭ ކުޅުނު ކުއާޓާ ފައިނަލް މެޗުތަކަށްފަހު ފްރާންސާއި، މޮރޮކޯ، މިސްރު އަދި ސްޕެއިނުން ސެމީ ފައިނަލަށް ދަތުރުކޮށްފިއެވެ.
ފްރާންސުން 1-0 އިން އާޖެންޓީނާ ބަލިކުރިއިރު، މޮރޮކޯ އިން ވަނީ 4-0 ގެ ތަފާތު ބޮޑު ނަތީޖާއަކުން އެމެރިކާ އަތުން މޮޅުވެފައެވެ. މެޗުގެ ފުރިހަމަވަގުތު ހަމަވިއިރު 1-1 އިން އެއްވަރުވުމުން ޕެނަލްޓީ ޖަހައިގެން ޕެރަގުއޭ އަތުން 4-5 އިން މިސްރު މޮޅުވިއިރު، ސްޕެއިނުން ޖަޕާން ބަލިކުރީ 3-0 އިންނެވެ.
ނޫވޯ ސްޓޭޑް ޑެ ބޯޑޯގައި ރޭ ކުޅުނު މި މެޗުގެ ކުރިން އާޖެންޓީނާގެ ޤައުމީ ސަލާމް ކިޔަމުންދިޔަ ވަގުތު ފްރާންސްގެ ސަޕޯޓަރުން ވަނީ ބޫ ލައްވާފައެވެ. އަދި މެޗު ނިމުމުން ދެފަރާތުގެ ކުޅުންތެރިންގެ މެދުގައި ހިނގި ހަމަނުޖެހުމަކީ މި ދެ ޓީމުގެ ދެމެދުގައި އޮތް ވާދަވެރިކަމާއި ނުތަނަވަސްކަން ހާމަކޮށްދޭ ކަމެކެވެ.
މި މެޗުގައި ފެނިގެންދިޔަ ހަމައެކަނި ލަނޑު، ފަސްވަނަ މިނެޓުގައި ފްރާންސަށް ކާމިޔާބުކޮށްދިނީ ކްރިސްޓަލް ޕެލަސް އަށް ކުޅެމުންއަންނަ ފޯވާޑް، ޖީން-ފިލިއްޕޭ މަޓޭޓާ އެވެ. އޭނާ މި ލަނޑުޖެހީ ދާދިފަހުން ބަޔާން މިއުނިކަށް ބަދަލުވި މައިކަލް އޮލީސޭ ނެގި ކޯނަރެއްގެ އެހީގައެވެ.
އާޖެންޓީނާ އަށް ލަނޑެއްޖަހަން ލިބުނު އެންމެ ރަނގަޅު ފުރުޞަތުގައި ފުރަތަމަ ހާފު ނިމެންދަނިކޮށް އެ ޓީމުގެ ފޯވާޑް، ޖިއުލިއާނޯ ސިމިއޯނީ ބޮލުން ފޮނުވާލި ބޯޅަ ދިޔައީ ހުރަސްދަނޑިމަތިން ބޭރަށެވެ.
ފަހު ހާފުގައި ފްރާންސުން އިތުރު ގޯލެއްޖެހިނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރް) އިން ބެލުމަށްފަހު ރެފްރީ އެ ލަނޑު ގަބޫލުނުކުރިއެވެ. އެއީ، ފްރާންސްގެ ވިންގް، އޮލީސޭ އެ ބޯޅަ ގޯލްގެތެރެއަށް ފޮނުވާލުމުގެ ކުރީން، އިދިކޮޅު ޓީމުގެ ކުޅުންތެރިއަކަށް މަގްނެސް އަކްލިއޫޗޭ ފައުލްކުރިކަމަށް ނިންމައިގެންނެވެ.
ފަހަކަށް އައިސް މި ދެ ޓީމުގެ ދެމެދުގައި ވަނީ ނުތަނަވަސްކަން އުފެދިފައެވެ. އެއީ މިދިޔަ ޖުލައި މަހުގެ 14 ވަނަ ދުވަހު ކުޅެވުނު ކޮޕާ އެމެރިކާ ކާމިޔާބުކުރުމަށްފަހު އުފާ ފާޅުކުރުމުގެ ތެރެއިން އާޖެންޓީނާގެ ކުޅުންތެރިން ފްރާންސްގެ ކަޅު ނަސްލުގެ ކުޅުންތެރިންނަށް މަލާމާތްކޮށް، ލަވައެއް ކިޔާ ވީޑިއޯ އެއް ފެތުރުމާ ގުޅިގެންނެވެ.
އޮލިމްޕިކްސްގައި ފިރިހެނުންގެ ފުޓްބޯޅައިން ފްރާންސުން އެންމެ ފަހުން ރަން މެޑެއްޔެއް ހާސިލްކުރީ 1984 ގައެވެ. އެކަން ތަކުރާރުކުރުމަށް ފްރާންސުން އަމާޒުހިފާފައިވާއިރު، ކުރިއަށް އޮތް ސެމީގައި އެ ޓީމު ނިކުންނާނީ މިސްރާ ދެކޮޅަށެވެ.
ރޭ ކުޅުނު ކުއާޓާ ފައިނަލްގައި އެހެން މެޗުތަކަށް ބަލާއިރު، މޮރޮކޯ އިން އެމެރިކާ އަތުން މޮޅުވި މެޗުގައި އެ ޓީމުން ޖެހި ހަތަރު ލަނޑުގެ ތެރެއިން ފުރަތަމަ ހާފުގައި ޖެހުނީ އެންމެ ގޯލެކެވެ. އަނެއް ތިން ލަނޑުޖެހީ ފަހު ހާފުގައެވެ. މޮރޮކޯ އިން މި މެޗުގައި ޖެހި ދެ ލަނޑަކީ ލިބުނު ޕެނަލްޓީން ކާމިޔާބުކުރި ދެ ގޯލެވެ. މެޗުގެ ފުރަތަމަ ލަނޑު، ޕެނަލްޓީއަކުން ސޫފިއާން ރަހީމީ ކާމިޔާބުކުރިއިރު، ދެވަނަ ހާފުގެ ހަތް މިނެޓުގެ ތެރޭގައި އިލިއަސް އަޚޮމަޗް އާއި އަޝްރަފް ހަކީމީގެ ލަނޑުތަކުން ފަރަގު ބޮޑުކޮށްފައިވަނިކޮށް، މެޗުގެ އިތުރުވަގުތުގައި ލިބުނު ޕެނަލްޓީއަކުން އެލް މެހްދީ މައުބޫބް ވަނީ ނަތީޖާ 4-0 އަށް ބަދަލުކޮށްލާފައެވެ.
ސްޕެއިނުން ޖަޕާން ބަލިކުރިއިރު، އެންމެ ފަހުގެ ޔޫރޯ ކާމިޔާބުކުރި ސްޕެއިނުގެ ސްކޮޑުގައި ހިމެނުނު ބާސެލޯނާގެ ޒުވާން ފޯވާޑް، ފާމިން ލޮޕޭޒް ދެ ގޯލްޖެހިއެވެ. އެ ޓީމުގެ އަނެއް ލަނޑުޖަހައިދިނީ އަބެލް ރުއިޒް އެވެ.