ނޭޕާލުން: އިސްމާޢީލް ޝާހު
ކަތުމަންޑޫ (ނޮވެމްބަރު 24) - ސެންޓްރަލް އޭޝިއަން ވޮލީބޯލް އެސޯސިއޭޝަންސް (ކާވާ) ވިމެންސް ވޮލީބޯލް ނޭޝަންސް ލީގުގައި ރާއްޖެ ބަލިކޮށް އިންޑިއާއިން ޖެހިޖެހިގެން ދެވަނަ މޮޅެއް ހޯދައިފިއެވެ.
މިއީ މި މުބާރާތުގައި ރާއްޖެ ކުޅުނު ފުރަތަމަ މެޗެވެ. މި މެޗު އިންޑިއާ ކާމިޔާބުކޮށްފައިވަނީ ފަސޭހަކަމާއެކު ސީދާ ތިން ސެޓުންނެވެ. އިންޑިއާ ކުޅުނު ފުރަތަމަ މެޗުގައި އެ ޓީމު ވަނީ އީރާން 3-1 ސެޓުން ބަލިކޮށްފައެވެ. މި ނަތީޖާއާއެކު އިންޑިއާ އޮތީ ތާވަލުގެ އެއްވަނައިގައެވެ.
ޓްރިޕޫރޭޝްވަރުގައި ހުންނަ ނޭޝަނަލް ސްޕޯޓްސް ކައުންސިލްގެ ހޯލުގައި ކުޅުނު ރާއްޖެއާއި އިންޑިއާ މެޗުގައި ދިވެހި ޓީމުގެ ފަރާތުން އުއްމީދީ ކުޅުމެއް ފެނުނެވެ. ހާއްސަކޮށް ސާވިސްތަކާއި ރިސީވްތަކުގައި ދިވެހި ޓީމުން ވަނީ ތަފާތު ދައްކާފައެވެ.
ފުރަތަމަ ސެޓު އިންޑިއާއިން ކާމިޔާބުކުރީ 25-6 ގެ ނަތީޖާއަކުންނެވެ. މި ސެޓުގައި ދަށްކޮށް ފެނުނު ނަމަވެސް ދެވަނަ ސެޓުގެ ކުރީކޮޅު ރާއްޖެ ފެނުނީ ވަރުގަދަކޮށެވެ. މި ސެޓުގައި ނަތީޖާ 7-7 އިން ރާއްޖެ އެއްވަރުވެސް ކޮށްފައިވެއެވެ. މި ސެޓުގެ އިތުރުން މުޅި މެޗުގައިވެސް ދިވެހި ޓީމަށް އެންމެ ގިނަ ޕޮއިންޓު ހޯދައިދިން ކުޅުންތެރިއަކީ ދާދިފަހުން މާލޭގައި ނިމުނު ކާވާ ވިހި އަހަރުން ދަށުގެ އަންހެން މުބާރާތުގައި ކުޅުނު މާޔާ އެވެ. ދެވަނަ ސެޓު އިންޑިއާއިން ކާމިޔާބުކުރީ 25-11 އިންނެވެ.
ތިންވަނަ ސެޓުވެސް އިންޑިއާއިން ޑޮމިނޭޓްކުރިއެވެ. ތިންވަނަ ސެޓު އިންޑިއާއިން ކާމިޔާބުކޮށްފައިވަނީ 25-10 ގެ ނަތީޖާއަކުންނެވެ.
ރާއްޖެއިން މި މުބާރާތް ފެށީ މުހިއްމު ތިން ކުޅުންތެރިން ނުލައެވެ. އެއީ ސީނިއާ އަންހެން ވޮލީ ސްކޮޑުގައި ހިމެނޭ ތިން ކުޅުންތެރިން ކަމަށްވާ ހައްވާ މާޖިދާ، ހައްވާ ރާޝިދާ، އާމިނަތު އަރީޝާ އެވެ. މި ތިން ކުޅުންތެރިން މިވަގުތު ތިބީ ބޫޓާނުގައި ކުރިއަށްދާ ކާވާ ބީޗުވޮލީ މުބާރާތުގައެވެ. މީގެތެރެއިން އައިޝަތު މާޖިދާ އާއި ހައްވާ ރާޝިދާ ރާއްޖެ ކުޅޭ ދެވަނަ މެޗުގައި ކުޅޭނެއެވެ.
ދެ މެޗަށްފަހު އިންޑިއާއަށް ހަ ޕޮއިންޓް ލިބިފައިވާއިރު، އެ ޓީމު އޮތީ ތާވަލުގެ އެއްވަނައިގައެވެ. އެއް މެޗު ކުޅެގެން ނޭޕާލަށް ލިބިފައިވަނީ ތިން ޕޮއިންޓެވެ. މިއީ ރާއްޖޭން ކުޅުނު ފުރަތަމަ މެޗެވެ.
މި މުބާރާތުގައި ނޭޕާލް، އިންޑިއާ، ސްރީލަންކާ، ރާއްޖެ އަދި އީރާން ހިމެނޭގޮތަށް ޖުމްލަ ފަސް ގައުމަކުން ބައިވެރިވެއެވެ.