ސްޕެނިޝް ލީގުގެ ވިޔަރެއާލަށް ކުޅެމުންއައި ޑެންމާކްގެ 21 އަހަރުން ދަށުގެ ގައުމީ ޓީމުގެ ގޯލްކީޕަރު، ފިލިޕް ޖޯގެންސަން، ޗެލްސީ އަށް ސޮއިކޮށްފިއެވެ.
ނިމިދިޔަ ސީޒަނުގައި ވިޔަރެއާލްގެ ސީނިއާ ޓީމުން ޖާގަ ހޯދައި، ލީގުގައި އެ ޓީމަށް 36 މެޗު ކުޅެދީފައިވާ ޖޯގެންސަން ވަނީ ޗެލްސީ އާއެކު ހަތް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. މި ޑީލާ ގުޅޭ ޓްރާންސްފާ ފީގެ މައުލޫމާތުތައް ދެ ކްލަބުން ހާމަކޮށްފައި ނުވިނަމަވެސް، މީޑިއާ ރިޕޯޓްތައް ބުނާގޮތުން، ޗެލްސީން ވަނީ ވިޔަރެއާލަށް 20 މިލިއަން ޔޫރޯ (25.67 މިލިއަން އެމެރިކާ ޑޮލަރު) ދައްކަން އެއްބަސްވެފައެވެ.
ޗެލްސީގެ ރަސްމީ ވެބްސައިޓަށް ދިން އިންޓަވިއުގައި ޖޯގެންސަން ބުނީ، އެ ކްލަބަށް ބަދަލުވުމަކީ ހުވަފެނެއް ހަގީގަތަކަށްވުން ކަމަށެވެ.
"މިއީ ހުވަފެނެއް ހަގީގަތަކަށްވުން،" ޖޯގެންސަން ބުންޏެވެ.
ޖޯގެންސަން ބުނީ، ޗެލްސީ އަށް ބަދަލުވެވުމުން ވަރަށް ބޮޑަށް އުފާވާ ކަމަށާއި، އެއީ ދުނިޔޭގެ އެންމެ ބޮޑު އެއްކުލަބު ކަމަށެވެ. އަދި އެ ޓީމުގެ ހުރިހާ ކުޅުންތެރިންނާއެކު ކުޅުމަށް ކެތްމަދުވެފައިވާ ކަމަށް ވެސް ޖޯގެންސަން ވަނީ ބުނެފައެވެ.
ސްވިޑެން އަށް އުފަން، ޖޯގެންސަން ވަނީ ޑެންމާކްގެ 21 އަހަރުން ދަށުގެ ގައުމީ ޓީމަށް ކުޅުމުގެ ކުރީން، އޭނާގެ މަންމަ އާއި ބައްޕަގެ އުފަން ސްވިޑެންގެ އެކި އުމުރުފުރާގެ ގައުމީ ޓީމުތަކަށް ކުޅެފައެވެ.