ފްރާންސްގެ ޕެރިހުގައި ކުރިއަށްދާ އޮލިމްޕިކްސްގެ ބެޑްމިންޓަން އިވެންޓްގައި ރާއްޖެއިން ވާދަކުރާ ފާތިމަތު ނަބާހާ (ނަބާ) ކުޅުނު ދެވަނަ މެޗު ދުނިޔޭގެ ރޭންކިންގެ 73 ވަނައިގައި އޮތް އެސްޓޯނިއާގެ ކްރިސްޓިން ކޫބާ އަތުން ބަލިވިނަމަވެސް ރަނގަޅު ވާދައެއްކޮށްފިއެވެ.
ދުނިޔޭގެ ރޭންކިންގެ އަންހެން ސިންގަލްސްގެ 111 ވަނަ މަގާމު އަދާކުރަމުންދާ ނަބާ މި މެޗުން ބަލިވީ ސީދާ ދެ ސެޓުންނެވެ. އެއީ 21-07، 21-09 އިންނެވެ.
އިތުބާރާއެކު ނަބާ މެޗު ފަށައިގެން ލީޑު ނެގި ނަމަވެސް ފުރަތަމަ ސެޓް ކޫބާ އަނބުރާލީ ފަސް ޕޮއިޓާއި ހަމައިންނެވެ. ކޫބާގެ ތަޖްރިބާގެ ބޭނުންހިފާ، މި ސެޓް ގެންދިޔައީ ނަބާއަށް 7 ޕޮއިންޓް ދިނުމަށްފަހު 21 ޕޮއިންޓުންނެވެ.
ދެވަނަ ސެޓުގައިވެސް ނަބާގެ ފަރާތުން ހިތްވަރު ފެނިގެންދިޔައެވެ. ސެޓު ފަށައިގެން ކޫބާ ލީޑުކުރި ނަމަވެސް ނަބާ ވަނީ ދެފަހަރު ނަތީޖާ ހަމަކޮށްފައެވެ. ފުރަތަމަ ފަހަރަށް ނަބާ އެއްވަރުކުރީ ތިނެއް ތިނެއްގެ ނަތީޖާއަކުންނެވެ. އެއަށް ފަހު ހަތަރެއް ހަތަރުން ވެސް ނަބާ ވަނީ އެއްވަރުކޮށްފައެވެ. ކޫބާގެ ފަރާތުން މޮޅު ކުޅުން ފެނިގެންދިޔަ މި ސެޓް އޭނާ ހޯދީ 21-09 އިންނެވެ.
އޮލިމްޕިކްސްގައި ކުޅުނު ފުރަތަމަ މެޗުން ނަބާ ބަލިވެފައި ވަނީ އިންޑިއާގެ ޕީވީ ސިންދޫ އަތުންނެވެ. މި މެޗުގައި ސިންދޫ ސެޓުތައް ގެންދިޔައީ، 21-09، 21-06 އިންނެވެ. ދެ މެޗުން ބަލިވުމުން ނަބާއަށް އޮލިމްޕިކްސްގެ މެޗުތައް ވަނީ ނިމިފައެވެ.
ޓްރައިޕާޓައިޓް ފުރުސަތެއްގައި ޖެހިޖެހިގެން ދެ ވަނަ އޮލިމްޕިކްސްގައި ނަބާ ފެނިގެންދާއިރު، އޭނާ އަކީ ދެ އޮލިމްޕިކްސްއެއްގައި ރާއްޖެ ތަމްސީލްކުރާ ފުރަތަމަ ބެޑްމިންޓަން ކުޅުންތެރިޔާ އެވެ.
ފްރާންސްގެ ޕެރިސްގައި ކުރިއަށްދާ އޮލިމްޕިކްސް ގޭމްސްގައި ދިވެހި ފަސް އެތުލީޓުން ބައިވެރިވެރިވެއެވެ. އަދި މި އަހަރަކީ އޮލިމްޕިކްސް ކުޅިވަރު މުބާރާތުގައި ރާއްޖެއިން އެންމެ ގިނަ އެތުލީޓުން ވާދަކުރާ އަހަރުކަންވެސް ފާހަގަކޮށްލެވެއެވެ.