މެންބަރުންގެ ޢަދަދެއް ކަނޑައަޅައި، އަތޮޅަކަށް މަދުވެގެން 2 މެންބަރުން ތިބެންވާނެ: އީސީ

ރައްޔިތުންގެ މަޖިލީހުގެ މެންބަރުންގެ އަދަދެއް ކަނޑައަޅައި، ކޮންމެ އަތޮޅަކަށްވެސް މަދުވެގެން ދެ މެންބަރުން ތިބެން ފެންނަކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ. އެ ކޮމިޝަނުން މިހެން ވިދާޅުވެފައިވަނީ މިއަދު ބޭއްވި މިނިވަން މުއައްސަސާތަކުގެ ކޮމިޓީގައި މައުލޫމާތު ދެއްވަމުންނެވެ.

އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވީ މެންބަރުންގެ ސީދާ އަދަދު އިލެކްޝަންސް ކޮމިޝަނުން ކަނޑައަޅަން ބޭނުންނުވާ ކަމަށާއި ބޭނުންފުޅުވަނީ މެންބަރުންގެ އަދަދު ލިމިޓް ކުރުމަށް ކަމަށެވެ. އެގޮތުން، އިލެކްޝަންސް ކޮމިޝަނުން ތަފާތު ގޮތްތައް ބަލާފައިވާނެ ކަމަށާއި އަދަދު ކަނޑައެޅުމުގައި ޖިއޮގްރަފިކް ގޮތުން ރާއްޖެ އޮތް ގޮތާއި ރައްޔިތުން ތަމްސީލް ކުރުމަށް ބަލަންޖެހޭ ކަމަށް ފުއާދު ވިދާޅުވިއެވެ.

ފުއާދު ވިދާޅުވީ ވަކި އަދަދެއް ކަނޑައެޅުމަށްފަހު ކޮންމެ އަތޮޅަކަށް މަދުވެގެން ދެ މެންބަރުން ތިއްބަވަންވާނެކަމަށް ފެނިވަޑައިގަންނަވާކަމަށެވެ. އަދި ބާކީ ހުންނަ ގޮނޑިތައް އާބާދީގެ ނިސްބަތުން ބަހާލެވޭގޮތަށް ބަދަލު ގެނައުމަށް ހުށަހެޅުއްވިއެވެ.

"މިސާލަކަށް 77 އެއްކަމަށް ވަންޏާ ފުރަތަމައިނުން މާލެއަށް ދެ ގޮނޑިއާއި އަދި ކޮންމެ އަތޮޅަކަށް ދެ ގޮނޑި ދިނީމަ 42 ގޮނޑި، ދެން ބާކީ އިންނާނީ 35 ގޮނޑި. އެ 35 ގޮނޑިއަކީ އާބާދީގެ ނިސްބަތުން އަތޮޅުތަކަށް ބަހާލެވޭ ގޮނޑިތަކެއް،" އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވިއެވެ.

އިލެކްޝަންސް ކޮމިޝަނުގެ ނައިބު ރައީސް ޢަލީ ނަޝާތު ވިދާޅުވީ އެ ކޮމިޝަނުން ހުށަހަޅާ ނިޒާމަކީ އެމެރިކާގައިވެސް ބޭނުންކުރަމުން އަންނަ ނިޒާމް ކަމަށެވެ. އަދި އެންމެ އެދެވިގެންވަނީ މެންބަރުންގެ އަދަދު 77 ގައި ބެހެއްޓުން ކަމަށް އޭނާވެސް ވިދާޅުވިއެވެ. 77 މެންބަރުންނަކީ 2008ވަނަ އަހަރު އައު ޤާނޫނު އަސާސީއާއެކު ފުރަތަމަ މަޖިލީހުގައި ތިއްބެވި މެންބަރުންގެ އަދަދެވެ.

ނަޝާތު ވިދާޅުވީ 5000 މީހުންނަށް މެންބަރަކު އިންތިޚާބު ކުރުމަށް ކުރިން ކަނޑައަޅާފައި އޮތީ އޭރު ފަސޭހައިން އިންތިޚާބު ކާމިޔާބުކުރުމުގެ ވިސްނުމުގައި ކަމަށެވެ. ނަމަވެސް އެ ވިސްނުން މިހާރު ބަދަލުކުރަންޖެހޭކަމަށް ވިދާޅުވިއެވެ.

"ވިސްނުމުގަ ބޮޑަށް މިއިނީ މެންބަރަކަށް ޑީލް ކުރަންޖެހޭ މީހުން މަދުކުރަން އޭރުގަ. އެކަމަކު އެ ވިސްނުން އަޅުގަނޑުމެން ދޫކޮށްލާފަ އެހެންވިސްނުމަކަށް، އެއީ ރެޕްރެޒެންޓޭޝަނަކަށްދާނަމަ މި މައްސަލަ ހައްލުވާނީ،" އިލެކްޝަންސް ކޮމިޝަންގެ ނައިބު ރައީސް ޢަލީ ނަޝާތު ވިދާޅުވިއެވެ.

އިލެކްޝަންސް ކޮމިޝަނުން ފާހަގަކުރެއްވި ގޮތުގައި ރާއްޖޭގެ މަޖިލީހަކީ ދުނިޔޭގައިވެސް އާބާދީގެ ނިސްބަތުން އެންމެ ގިނަ މެންބަރުން ތިއްބެވި އެއް މަޖިލީހެވެ. މިއީ ދެމެހެއްޓިނިވި ގޮތެއް ނޫން ކަމަށްވެސް އެ ކޮމިޝަނުން ފާހަގަކުރައްވައެވެ.

އިލެކްޝަންސް ކޮމިޝަނުން ހުށައެޅިގޮތަކީ 2050ވަނަ އަހަރާ ހަމައަށް އޮތް ޙައްލެއްކަމަށްވެސް އިލެކްޝަންސް ކޮމިޝަނުން ވިދާޅުވިއެވެ.