ޓެކްސީ މައްސަލައަށް ޙައްލެއް ގެނައުމަށް ޓެކްސީ ލައިނެއް ތަޢާރަފްކުރަނީ

ތިމާވެއްޓާއި ރައްޓެހި ޓެކްސީލައިނެއް ތަޢާރަފްކުރުމަށް ސަރުކާރުން ނިންމަވައިފިއެވެ. ޓެކްސީގެ ޚިދުމަތަކީ މުހިއްމު ޚިދުމަތަކަށްވާއިރު މިއީ މާލޭގައި ޢާއްމުންގެ ޝަކުވާއާއި ގުޅިފައިވާކަމެކެވެ.

މާލޭގައި ޓެކްސީގެ ޚިދުމަތް ދެމުންދަނީ ޢާއްމު ފަރާތްތަކުން ސެންޓަރުތައް ޤާއިމުކޮށްގެންނެވެ. ގިނަ ބަޔަކު އެޚިދުމަތަކަށް ބަރޯސާވެފައިވާ މިޚިދުމަތާއި މެދު ފަހަކަށް އައިސްވަނީ ޝަކުވާ ބޮޑުވެފައެވެ. އެގޮތުން ސަރުކާރުން ކަނޑައަޅާފައިވާ އަގުތަކަށްވުރެ ބޮޑު އަގު ޗާޖުކުރުމާއި، ވަކި ތަނަކަށް ނޫނީ ނުގެންދާނެކަމަށް ޓެކްސީ ޑްރައިވަރުން ބުނާމައްސަލަތައްވަނީ ޢާއްމުވެފައެވެ. މިކަމަށް ސީދާ ނުވަދެ މިމައްސަލައަށް ޙައްލެއް ގެނައުމަށް ސަރުކާރުން މިހާރުވަނީ ނިންމަވާފައެވެ. އެގޮތުން "މާލެ ފަހި" މަޝްރޫޢުގެ ދަށުން މަލެ ސަރަހައްދުގައި ރައްޔިތުންނަށް އެކަށީގެންވާ ރަނގަޅު އިންތިޒާމެއްގެ ދަށުން ޓެކްސީގެ ޚިދުމަތް ދިނުމަށް މިހާރުވަނީ ހަމަޖެހިފައެވެ.

ދަތުރުފަތުރާއި ބެހޭ ވުޒާރާއިން ވިދާޅުވީ، ދުނިޔޭގެ ކުރިއަރާފައިވާ ޤައުމުތަކުގައި ޢަމަލުކުރަމުންދާ އުސޫލުން ރައްޔިތުންނަށް ރައްކާތެރި އަދި ރިލަޔަބަލް ޓެކްސީލައިނެއް ތަޢާރަފްކުރުމަށް ހަމަޖެހިފައިވާކަމަށެވެ. މިގޮތުން ޓެކްސީ ލައިންއަކީ ފްރީލާންސް އުސޫލުން ޚާއްސަ އެޕްލިކޭޝަނެއް މެދުވެރިކޮށް ކޮންޓްރޯލްކޮށްގެންދޭ ޚިދުމަތެއްކަމަށް އެވުޒާރާއިން ވިދާޅުވެއެވެ. ތިމާވެއްޓާއި ރައްޓެހި ޚިދުމަތަކަށް ހެދުމަށް، މިޚިދުމަތް ފަށައިގަންނައިރު މަދުވެގެން 25 އިންސައްތައަކީ ތިމާވެއްޓާ ރައްޓެހި އިލެކްޓްރިކް އުޅަނދުތަކަށް ހެދުމަށްވެސްވަނީ ހަމަޖެހިފައެވެ. މިމަޝްރޫޢުގެ ޢަމަލީ މަސައްކަތް މިއަހަރުގެ ސެޕްޓެންބަރު މަހު ފެށުމަށް އަންނަނީ ތައްޔާރުވަމުންނެވެ.

ޓެކްސީ ލައިނަކީ މީޓަރު އުސޫލުން ދެފަރާތުން އެއްބަސްވާ އުސޫލަކުން ޓެކްސީގެ ޚިދުމަތްދިނުމަށް ދުނިޔޭގެ ގިނަ ޤައުމުތަކުގައި ތަޢާރަފްކޮށްގެންދޭ ޚިދުމަތެކެވެ.

މީގެއިތުރުން މާލެއާއި ހުޅުމާލޭގެ މަގުތައް ތޮއްޖެހޭ މައިގަނޑު އެއްސަބަބަކީ ވެހިކަލްގެ ޢަދަދު މަދުނުކޮށް އާރްޓީއެލްގެ ބަހުގެ ޚިދުމަތް ދޭން ފެށުމުންކަމަށް ގިނަ ބަޔަކު ދެކެއެވެ. އެހެންކަމުން އުޅަނދުތަކުގެ ޢަދަދު ކޮންޓްރޯލްކުރުމުގެ މަސައްކަތް ސަރުކާރުން ކުރައްވާއިރު، އެއާއެކު އާރްޓީއެލްގެ ދަށުންދެމުންދަ ބަހުގެ ޚިދުމަތުގައި ކުދި ސައިޒުގެ ބަސްތައް ބޭނުންކުރަން ފެށުމަށްވެސްދަނީ ތައްޔާރުވަމުންނެވެ. ޓްރާންސްޕޯޓުންދަނީ މާލެ އަދި ހުޅުމާލޭގެ އެތެރޭގައި ދުއްވުމަށް އެކަށޭނަ ކުދި ސައިޒުގެ ބަހަށް ބަދަލުކޮށް ބަސް ރޫޓުތަކުގެ ފްރީކުއެންސީ އިތުރުކުރުމަށް މަސައްކަތްކުރަމުންނެވެ.

މާލެ ސަރަޙައްދުގެ ޓްރެފިކް ތޮއްޖެހެމުގެ މައިގަނޑު މައްސަލައަކީ އެކަމަށް މަގުފަހިވާ ކަންކަމަށް ރިޢާޔަތްކުރެވިގެން ދެމެހެއްޓެނިވިގ ތެއްގައި އެކަމަށް ޙައްލެއް ގެނައުމަށް މަސައްކަތް ކުރެވިފައިނުވާއތީކަމަށް ސަރުކާރުން ވިދާޅުވެއެވެ. އެހެންކަމުން މަގުތަކުގެ ޙާލަތު ރަނގަޅުކޮށް ތޮއްޖެހުން ކުޑަކުރުމަށް ވަށާޖެހޭ ޙައްލެއް ހޯދުމަށް މިކަމުގައި ގުޅިފައިވާ ހުރިހަ މައްސަލައަކަށް ރިޢާޔަތްކޮށްގެން ސަރުކާރުންވަނީ "މާލެ ފަހި" ނަމުގައި ޚާއްސަ މަޝްރޫޢެއް ފައްޓަވާފައެވެ. މިމަސައްކަތް ނިމިގެންދާއިރު މާލެ ސަރަޙައްދުގެ މަގުތަކަކީ އަމާން ރައްކާތެރި ތަނަކަށް ހެދޭނެކަމަށް ސަރުކާރުން ވިދާޅުވެއެވެ.