އުދަ އަރާނެ ކަމަށް ލަފާކޮށްފައިވާތީ ބްރިޖުން ދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފި

އުދަ އަރާނެ ކަމަށް ލަފާކޮށްފައިވާތީ ސިނަމާލެ ބްރިޖުން ދަތުރުކުރާ ފަރާތްތަކުން ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކުރައްވައިފިއެވެ.

ދިޔަވަރު ބޮޑުވާ ވަގުތުތަކުގައި ދެކުނާއި މެދުރާއްޖެތެރޭގެ ބައެއް ރަށްތަކަށް އުދަ އަރާނެ ކަމަށް ލަފާ ކުރެވޭ ކަމަށް މޫސުމާބެހޭ ޤައުމީ އިދާރާއިން ވަނީ ބުނެފައެވެ.

މޫސުމާބެހޭ ޤައުމީ އިދާރާއިން އުދަ އަރާނެ ކަމަށް ލަފާކޮށްފައިވާތީ ދިވެހި ފުލުހުންގެ ޚިދުމަތުން އެކްސްގައި ކުރެއްވި ޕޯސްޓެއްގައި ވަނީ ކ. އަތޮޅުން ފެށިގެން އައްޑޫ ސިޓީގެ ރަށްރަށަށް އުދަ އެރުމުގެ ފުރުސަތު އޮތުމުން ސިނަމާލެ ބްރިޖާއި ހައިވޭގައި ދަތުރުކުރާ ފަރާތްތަކުން ސަމާލުވުމަށް އިލްތިމާސްކުރައްވާފައެވެ. އަދި ރަށްރަށުގައި ވެސް ގޮނޑުދޮށާ ކައިރި ހިސާބުތަކުގައި ދިރިއުޅޭ ފަރާތްތަކުން މުދަލާއި ގެދޮރުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުމަށްވެސް ފުލުހުން ވަނީ އިލްތިމާސްކުރައްވާފައެވެ.

ދިވެހި ފުލުހުންގެ ޚިދުމަތުން މިގޮތަށް އިލްތިމާސްކުރައްވާފައިވާއިރު އުދަ އަރާ ދުވަސްވަރު ސިނަމާލެ ބްރިޖުގެ މާލެ އާއި ހުޅުލެ އަދި ހުޅުމާލެ ދިމާވާ ޓްރެފިކް ލައިޓުތައް ކައިރިއަށް އުދައިގެ އަސަރު ކުރެއެވެ.

އުދައެރުމުގެ ސަބަބުން ލިބިދާނެ ގެއްލުމަކުން ރައްކާތެރިވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިންވެސް ވަނީ އިލްތިމާސްކުރައްވާފައެވެ. އެގޮތުން ގެއަށް ފެން ނުވަންނާނެހެން ރައްކާތެރިކަމުގެ ފިޔަވަޅު އެޅުމަށް ވަނީ އިލްތިމާސްކުރައްވާފައެވެ.

އުދައެރުމުން ލިބިދާނެ ގެއްލުމުން ރައްކާތެރިވުމަށް އެޅިދާނެ ފިޔަވަޅުތައް:

* ގޭގެ ކުރިމަތީ ވެލިބަސްތާ ޖެހުން.
* ގޭތެރޭގައި ފެންބޮޑުވެއްޖެ ހާލަތެއްގައި ގެއްލުންވާނެ މުދާ، ފެން ނުޖެހޭ ފަދަ އުސްތަންތަނަށް ބަދަލުކުރުން.
* އުސްތަންތަނަށް ބަދަލުނުކުރެވޭ މުދާ ފެނުގެ އަސަރު ނުފޯރާ ތަނަކަށް ބަދަލުކުރުން.
* ބަނދަރުގައި އަޅާފައިވާ އޮޑިދޯނި ފަހަރުގެ ވައު ކަނޑައިގެން ނުދާނެހެން އެއްސުން.
* ދިޔަވަރު ބޮޑުވާ ގަޑީގައި ސިނަމާލެ ބްރިޖުން ދަތުރުކުރާ ފަރާތްތަކުން އިތުރަށް ސަމާލުވުން.
* ކުރިމަތިވެދާނެ އާންމު ޞިއޙީ މައްސަލައަކުން ސަލާމަތްވުމަށް އުދައާއެކު ރަށުތެރޭގައި އުފެދޭ ކުނި އަވަހަށް ސާފުކުރުން.

މޫސުމާ ބެހޭ ޤައުމީ އިދާރާއިން ވިދާޅުވީ ކުރިއަށް އޮތް 24 ގަޑިއިރު ރާއްޖޭގެ އުތުރުގެ ރަށްރަށަށް ކެރީގެ އަސަރު ފޯރާނެކަމަށާއި ބައެއް ރަށްރަށަށް ގުގުރުން އެކަށީގެންވާ ކަމަށެވެ. މެދު ރާއްޖެތެރެއާއި ރާއްޖޭގެ ދެކުނުގެ ރަށްތަކަށް ކެރީގެ އަސަރު ފޯރި ނަމަވެސް، އާންމު ގޮތެއްގައި މޫސުން ރަނގަޅުވާނެކަމަށް އެ އިދާރާއިން ލަފާކުރެއެވެ.

ކުރިއަށް އޮތް 24 ގަޑިއިރު ރާޅުގެ އުސްމިން ހުންނާނެކަމަށް ލަފާކޮށްފައިވަނީ 1 ފޫޓާއި 4 ފޫޓާ ދެމެދުއެވެ.