ސައުދީ ޕްރޯ ލީގުން މިހާރު އެންމެ ބޮޑަށް ކްލަބުތަކަށް ހިތްވަރުދެނީ، އެ ކްލަބަކަށް ނިސްބަތްވާ ކުޅުންތެރިންނާއި އެހެނިހެން ގައުމުތަކަށް ނިސްބަތްވާ ޒުވާން ކުޅުންތެރިން އިތުރަށް ތަރައްގީކުރުމަށް ކަމަށް ދޭހަވާފަދަ ގޮތަކަށް، ކުރިއަށް އޮތް ސީޒަނުގެ ޕްލޭންތައް ބަޔާންކޮށްފައިވާ ޑޮކިއުމެންޓެއް ނެރެފައިވާ ކަމަށް މީޑިއާ ހަބަރުތައް ބުނެފިއެވެ.
ނިމިދިޔަ ސީޒަނުގައި ސައުދީ ލީގުން ވަނީ ދުނިޔޭގެ ފުޓްބޯޅައިގެ ވަރުގަދަ ގައުމުތަކަށް ނިސްބަތްވާ ބޮޑެތި ސުޕަސްޓާރުންނާއި ފާހަގަކޮށްލެވޭ އެހެން ކުޅުންތެރިން ހޯދައި، މުޅި ދުނިޔޭގެ ސަމާލުކަމަށް އެ ލީގު ގެނެސްފައެވެ.
މިދިޔަ ސީޒަނަށް ސައުދީ ލީގުގެ އެކި ކުލަބުތަކުން ވަނީ ދުނިޔޭގެ އެކި ކަންކޮޅުތަކުން މުޅި ޖުމްލަ 97 ވަރަކަށް ކުޅުންތެރިން ގެނެސްފައިވާއިރު، އޭގެތެރޭގައި، އެންމެ ފާހަގަކޮށްލެވޭ ކުޅުންތެރިންނަކީ، ޕޯޗުގަލްގެ ކެޕްޓަން، ކްރިސްޓިއާނޯ ރޮނާލްޑޯ އާއި ބްރެޒިލްގެ ތަރި، ނޭމާ އެވެ.
ދާދިފަހުން، ދުނިޔޭގެ ފުޓްބޯޅައިގެ މައި އިދާރާ، ފީފާ އިން ނެރުނު ބަޔާނެއްގައިވަނީ، ނިމިދިޔަ ސީޒަނުގައި ބައިނަލްއަގުވާމީ ޓްރާންސްފާ ބާޒާރުގައި އެންމެ ގިނައިން ކުޅުންތެރިން ގަތުމަށް ހޭދަކޮށްފައިވާ ފަސް ލީގުގެ ތެރޭގައި ސައުދީ އަރަބިއްޔާގެ ލީގު ހިމެނޭ ކަމަށް ބުނެފައެވެ.
އެގޮތުން، 2023 ވަނަ އަހަރުގެ ތެރޭގައި ކުޅުންތެރިން ގަތުމަށް ސައުދީ ޕްރޯ ލީގުގެ ކުލަބުތަކުން ގާތްގަނޑަކަށް 970 މިލިއަން އެމެރިކާ ޑޮލަރު ހޭދަކޮށްފައިވެއެވެ. އެއީ، އޭގެ ކުރީ އަހަރު ހޭދަކުރީ 50.4 މިލިއަން އެމެރިކާ ޑޮލަރާ އަޅާބަލާއިރު ނިސްބަތުން ބޮޑު އަދަދެކެވެ.
ބައިނަލްއަގުވާމީ ފެންވަރުގައި ވާދަކުރާ ޒުވާން ކުޅުންތެރިންނަށާއި، އަމިއްލަ ގައުމަށް ނިސްބަތްވާ އުމުރުން ހަގު ކުޅުންތެރިންނަށް ފޯކަސްކޮށްގެން މި ފަހަރުގެ އަމާޒަކީ، ދުނިޔޭގެ އެންމެ މޮޅު ކުޅުންތެރިންގެ ކިބައިން އެ ގައުމުގެ ޒުވާން ކުޅުންތެރިންނަށް ގިނަ ކަންތައްތަކެއް ދަސްކޮށް، ފުރިހަމައަށް ތަމްރީންވުމުގެ ފުރުޞަތު ހޯދައިދިނުން ކަމަށް ސައުދީ ޕްރޯ ލީގުގެ ފަރާތުން ވާހަކަދެއްކި ސްޕޯކްސްޕާސަން ވަނީ ބުނެފައެވެ.
"ޒުވާން ކުޅުންތެރިން ހޯދުމާ ގުޅޭގޮތުން މި ފަހަރު ކަނޑައަޅާފައިވާ ސްޓްރެޓެޖިކް ފޯކަސްގެ ސަބަބުން، ލީގާއި ކުލަބުތަކަށް ވެސް ދިގު މުއްދަތަކަށް ވާދަވެރިކަމާއެކު ކާމިޔާބީތައް ހޯދުމުގައި ދެމެހެއްޓެނިވި ގޮތަކަށް މަސައްކަތްތައް ކުރިއަށްގެންދެވޭނެ،"
އެގޮތުން، ޔޫތު ޑިވެލޮޕްމަންޓްގެ މި ހާއްސަ ޕްލޭނާ އެއްގޮތަށް ކުރިއަށް އޮތް 2024/2025 ވަނަ އަހަރުގެ ސީޒަނުން ފެށިގެން އަމަލުކުރަން ފަށާނެ އެވެ. އަދި އެ ޕްލޭންގައިވާ ގޮތުން، ކޮންމެ ޓީމަކަށް ވެސް 21 އަހަރުން ދަށުގެ ބައިނަލްއަގުވާމީ ދެ ކުޅުންތެރިއަކު ހިމެނުމުގެ ފުރުޞަތުދޭނެ އެވެ.
މީގެއިތުރުން، މިހާތަނަށް ކަނޑައަޅާފައިވާ ސްކޮޑުގައި ހިމެނޭ ކުޅުންތެރިންގެ އަދަދު ވެސް 30 އިން 25 އަށް މަދުކުރުމަށް ވަނީ ހަމަޖެހިފައެވެ. އެއީ، ކޮންމެ ޓީމެއްގައި ބޮޑު ބެންޗެއް އޮތުމުގެ ބަދަލުގައި އެ ޓީމެއްގައި ހިމެނޭ ޒުވާން ކުޅުންތެރިންނަށް ކުޅުމަށް ގިނަ ފުރުޞަތުތައް ހޯދައިދިނުމުގެ ގޮތުން ކަމަށް ސައުދީ ލީގުގެ ސްޕޯކްސްޕާސަން ވަނީ ބުނެފައެވެ.
އަންނަ ސީޒަނަށް އިސްކަންދޭ އެހެންކަންކަމުގެ ތެރޭގައި، މާލީ ގޮތުން ދެމެހެއްޓެނިވި ގޮތެއްގެ އެންމެހާ ކަންތައްތައް ކުރިއަށްގެންދިއުމަށާއި، ކުޅުންތެރިންގެ ވެލްފެއާ އާއި ކްލަބު ޑިވެލޮޕްމަންޓާ ގުޅުންހުރި ކަންތައްތައް ހިމެނެ އެވެ.
މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި ޔޫރަޕުން ބޭރުގެ ލީގަކުން އެންމެ ގިނަ އަދަދަކަށް ކުޅުންތެރިން ގައުމުތައް ތަމްސީލްކޮށްފައިވަނީ ވެސް ސައުދީ ޕްރޯ ލީގުންނެވެ. އެގޮތުން، ޔޫރޯގައި ވާދަކުރި ޓީމުތަކަށް ނިސްބަތްވާ 14 ކުޅުންތެރިއަކު ސައުދީ ލީގުގައި ކުޅެމުން އަންނައިރު، ދެން އެންމެ ގާތުން ވާދަކުރާ އެމެރިކާގެ މޭޖާ ލީގު ސޮކާގެ ކުލަބުތަކަށް ކުޅެމުން އަންނަ 8 ކުޅުންތެރިއަކު އެބަތިއްބެވެ.
އައު ސީޒަނަށް ސައުދީ ޕްރޯ ލީގުން ތައްޔާރުވަމުން އަންނައިރު، ސައުދީ ކުލަބުތަކުގެ އެޑްމިނިސްޓްރޭޓިވް މަގާމުތަކުން ވެސް މިހާރު ފެނިގެންދަނީ ދުނިޔޭގެ ފުޓްބޯޅައިގައި ފާހަގަކޮށްލެވޭ ފަރާތްތަކެވެ. އެގޮތުން، އަލް ނަސްރުގެ ސްޕޯޓިންގ ޑައިރެކްޓަރަކަށް ސްޕެއިން އަދި ރެއާލް މެޑްރިޑްގެ ކުރީގެ ލެޖެންޑް، ފެނާންޑޯ ހިއޭރޯ ހަމަޖައްސާފައިވާއިރު އަލް ޝަބާބްގެ ސްޕޯޓިންގ ޑައިރެކްޓަރުގެ މަގާމަށް ކުރީން ސަމްޕްޑޯރިއާގެ ޓެކްނިކަލް ޑައިރެކްޓަރެއްގެ ގޮތުގައި މަސައްކަތްކުރި ޑޮމެނިކޯ ޓެޓީ ވަނީ ގެނެސްފައެވެ.
ސައުދީ ޕްރޯ ލީގުގެ އެންމެ ފަހުގެ ޗެމްޕިއަން، އަލް ހިލާލްގެ ސީއީއޯ އަކަށް ކުރީން ބާސެލޯނާގެ ޗީފް މާކެޓިންގ އޮފިސަރެއްގެ ގޮތުގައި މަސައްކަތްކުރި އެސްޓެވޭ ކަލްޒާޑާ ވަނީ ހަމަޖައްސާފައެވެ. އޭނާ ވަނީ ކުރީން ސިޓީ ފުޓްބޯލް ގްރޫޕްގެ ޗީފް ކޮމާޝަލް އޮފިސަރެއްގެ ގޮތުގައި މަސައްކަތްކޮށްފައެވެ.