ހައްދުފަހަނައަޅާ ފިކުރުތަކުން ޤައުމު ސަލާމަތްކުރުމަކީ ކޮންމެ ދިވެއްސެއްގެ ޤައުމީ ޒިންމާއެއް: ނައިބު ރައީސް

ހައްދުފަހަނައަޅައި ދިއުމަށް މަގުފަހިވާ ފިކުރުތަކާއި، ބަސްމަގާއި، ރޭވުންތަކުން ޤައުމު ސަލާމަތްކޮށް އަމާންކަން ދެމެހެއްޓުމަކީ ކޮންމެ ދިވެއްސެއްގެ ކޮނޑުގައި އެޅިފައިވާ ޤައުމީ ޒިންމާއެއްކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަޠީފް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދަ ނޭޝަނަލް ހައި ލެވެލް ކޮންފަރެންސް އޮން ޕީސް އެންޑް ސެކިއުރިޓީ ފެށުމުގެ ގޮތުން ކްރޮސްރޯޑުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް ވިދާޅުވީ ރާއްޖެއަކީ މިނިވަން، މުސްތަޤިއްލު، އަމާން އަދި ސުލްހަވެރި ޤައުމެއް ކަމަށާއި، ދިވެހިންނަކީ ސުލްހަ މަސަލަސްކަމަށް ލޯބިކުރާ ބައެއްކަމަށެވެ. އަދި ރާއްޖެއަކީ ފަތުރުވެރިންގެ މެދުގައި ޚާއްޞަ މަގުބޫލުކަމެއް އޮންނަ ޤައުމަކަށްވާއިރު މި ޤައުމަކީ މެހެމާނުންނަށް އަމާން އަދި ރައްކާތެރި މާހައުލެއް ޤައުމުވެފައިވާ ތަނަކަށް ހަދަންޖެހޭ ކަމަށް އެމަނިކުފާނު ވިދާޅުވިއެވެ. ރާއްޖޭގެ އަމާންކަމާމެދު ދުނިޔެއިން ކުރާ އިތުބާރަށް ދެގޮތެއް ވިޔަނުދިނުން ޤައުމީ މޮޓޯއަކަށް ހަދަންޖެހޭކަމަށްވެސް އެމަނިކުފާނު ވިދާޅުވިއެވެ.

ދުނިޔެ ބަވަނަވުމުގެ އޮއެވަރުގެ ތެރޭގައި އެކި ކަންކޮޅުތަކުގައި ހިނގާ ނުރައްކާތެރި ކަންކަމުގެ އަސަރު ރާއްޖެއަށްވެސް ކުރަމުންދާކަން ފާހަގަކުރައްވައި ރައީސުލްޖުމްހޫރިއްޔާގެ ނައިބު ވިދާޅުވީ މަދު ބަޔަކު ފިކުރީ އަދި ސިޔާސީ ނާޖައިޒް މަޤްޞަދުތަކެއް ހާސިލްކުރަން ކުރާ މަސައްކަތުގެ ސަބަބުން ޓެރަރިޒަމާއި އަނިޔާވެރިކަމާއި ހައްދުފަހަނައަޅާދިޔުންފަދަ ކަންކަމަށް ވާގިދެވޭކަމަށެވެ. މީގެ ސަބަބުން، ރާއްޖޭގެ އެއްބައިވަންތަކަމަށް ނުރައްކާވެ، ދިވެހި މުޖުތަމަޢު ބައިބައިވުމަށް މަގުފަހިވާ ކަމަށްވެސް ރައީސުލްޖުމްހޫރިއްޔާގެ ނައިބު ވިދާޅުވިއެވެ.

"ހައްދުފަހަނައަޅާދިއުމުގެ ޝިކާރައަކަށް ބައެއް ދިވެހިންވެ، ވަސްވާސްތަކަށް ހެއްލި، ޚާއްޞަކޮށް ޒުވާނުން ހަނގުރާމަވެރި ސަރަހައްދުތަކަށްގޮސް ޖިހާދުގެ ނަމުގައި ރަހުމްކުޑަ އުދުވާންތައް ހިންގުމާއި ދިވެހި ފަސްގަނޑުގައިވެސް ނޭއްގާނީ އެކިއެކި މަގުސަދުގައި ޓެރަރިސްޓް ހަމަލާތައް ރާވާއި ހިންގުމުގެ މަގުސަދުގައި މަސައްކަތްކުރުމަކީ ދިވެހިންގެ އެއްބައިވަންތަކާއި ސަލާމަތައް އޮތް އެންމެ ބޮޑު ގޮންޖެހުން. އެހެންކަމުން މިފަދަ ނުރައްކާތައް ހުއްޓުވުމަށް ސަލާމަތީ ފިޔަވަޅުތައް ވަރުގަދަކޮށް އަމާން މުޖުތަމައެއް ބިނާކުރުމަށް ސަރުކާރުން އިސްކަން ދޭނަން،" ރައީސުލްޖުމްހޫރިއްޔާގެ ނައިބު ވިދާޅުވިއެވެ.

އިސްލާމްދީނުގެ ރިވެތި އުސޫލުތައް އޮޅުންފިލުވައިދީ ތަހުޒީބު މުޖުތަމައެއް ބިނާކުރުމަށް މުޅި ޤައުމު ގުޅިގެން މަސައްކަތް ކުރުމަކީ މުހިންމުކަމެއްކަން ފާހަގަކުރައްވައި ރައީސުލްޖުމްހޫރިއްޔާގެ ނައިބު ވިދާޅުވީ ރަނގަޅު ތައުލީމުގެ ތެރެއިން ދަރިވަރުންގެ ވިސްނުމާއި ފިކުރު ތަރައްގީކުރަންޖެހޭ ކަމަށެވެ. އަދި އިސްލާމްދީނުގެ ސައްހަ މައުލުމާތުދީ އާންމުން ހޭލުންތެރިކުރުމަށް ތަފާތު ހަރަކާތްތައް ރާވަންޖެހޭ ކަމަށާއި އެ ކަންކަމުގައި މުޖުތަމައުގެ ހުރިހާ ފަންތިއަކާއި ގިންތިއެއްގެ އެއްބާރުލުން ހޯދަންޖެހޭކަމަށްވެސް އެމަނިކުފާނު ވިދާޅުވިއެވެ.

މީގެ އިތުރުން ދަރީންގެ ހިތްތަކާއި ފިކުރިއްޔާތުގައި އިސްލާމް ދީނުގެ ރިވެތި އާދަތައް ބިންވަޅުނަގުވައި ކެތްތެރިކަމާއި ތަހައްމަލުކުރުމުގެ ރިވެތި އާދަ ހުންނަ، ޤައުމުދެކެ ލޯބިވާ އެއްބައިވަންތަ މުޖުތަމައެއް އުފެއްދުމަށް ދުރާލާ މަސައްކަތްކޮށްފިނަމަ އެކަންކަން ހާސިލްކުރެވޭނެކަމަށްވެސް ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަޡީފް ވިދާޅުވިއެވެ.