އެމްޑީޕީގެ ނައިބު ރައީސަކަށް ހިސާން އައްޔަން ކުރަން ހުށަހަޅައިފި

އެމްޑީޕީގެ ނައިބު ރައީސަކަށް އެޕާޓީގެ ލީގަލް ޑިރެކްޓަރު ހިސާން ހުސައިން އައްޔަން ކުރަން ހުށަހަޅުއްވައިފިއެވެ.

ހިސާންގެ ނަން ހުށަހެޅުއްވީ އެމްޑީޕީގެ ރައީސް އަބްދުﷲ ޝާހިދެވެ. ނަން ހުށަހަޅުއްވައި ސޯޝަލް މީޑިއާގައި ކުރެއްވި ޕޯސްޓެއްގައި ޝާހިދު ވިދާޅުވީ އެމްޑީޕީގެ ނައިބު ރައީސަކަށް ހިސާން އައްޔަން ކުރެއްވުމަށް ގަސްތުކުރައްވައި ޤައުމީ މަޖިލީހުގެ ރުހުން އޮތްތޯ ބެލުމަށް އަސާސީ ގަވާއިދުގައިވާގޮތުގެމަތިން ހުށަހަޅުއްވާފައިވާކަމަށެވެ.

އެމްޑީޕީގެ ނައިބު ރައީސްގެ މަގާމަށް މަޖިލީހުގެ ތުޅާދޫ ދާއިރާގެ ކުރީގެ މެމްބަރު އަދި @MDPSecretariat އަށް މެދުކެނޑުމެއް ނެތި ގިނަ ދުވަސްތަކެއް ވަންދެން ޚިދުމަތްކޮށްދެއްވަމުންގެންދަވާ، ޕާރޓީގެ ލީގަލް ޑިރެކްޓަރު އަލްއުސްތާޒާ @hisaanhussain އައްޔަން ކުރުމަށް ގަސްތުކޮށް، އެކަމަނާ އެ… pic.twitter.com/evMwQfMI50

— Abdulla Shahid (@abdulla_shahid) July 8, 2024

އެމްޑީޕީގެ ގަވާއިދުގައިވާގޮތުން އެޕާޓީގެ ނައިބު ރައީސް އައްޔަންކުރާނީ ޕާޓީގެ ރައީސްގެ ލަފާގެ މަތިން ޤައުމީ މަޖިލީހުންނެވެ.

އަބްދުﷲ ޝާހިދު ވިދާޅުވީ އެމްޑީޕީއަށާއި އެޕާޓީގެ މެންބަރުންނަށް އިޚްލާސްތެރި ޚިދުމަތްތަކެއް ހިސާން ކުރައްވާފައިވާ ކަމަށެވެ. އަދި ހިސާނަކީ ނައިބު ރައީސަށް އެންމެ އެކަށީގެންވާ ބޭފުޅާ ކަމަށް ދެކެވަޑައިގަންނަވާ ކަމަށްވެސް ވިދާޅުވިއެވެ.

މީގެއިތުރުން އެމްޑީޕީގެ ލީޑަރޝިޕްގައި މިވަގުތު އަންހެނުން މަދުވުމަކީވެސް ނައިބު ރައީސަކަށް ހިސާން އައްޔަން ކުރުމަށް ނިންމެވި ސަބަބެއް ކަމަށް އަބްދުﷲ ޝާހިދު ވިދާޅުވިއެވެ.