ޕެރޫގައި މިއަހަރު ބާއްވާ ދުނިޔޭގެ 20 އަހަރުންދަށުގެ އެތުލެޓިކްސް މުބާރާތުގައި ރާއްޖެއިން ވާދަކުރާނެ އެތުލީޓެއްގެ ގޮތުގައި، މަރިޔަމް ރޫޔާ އަލީ ހޮވިއްޖެ އެވެ.
އަންނަ މަހުގެ 27-31 އަށް ކުރިއަށްދާ 20 އަހަރުން ދަށުގެ ދުނިޔޭގެ މުބާރާތުގައި ވާދަކުރުމުގެ ފުރުސަތު ރޫޔާ، 19، އަށް ލިބުނީ އެ ކެޓަގަރީން ރާއްޖޭގެ އެންމެ ބާރު އެތުލީޓަށް ވުމުންނެވެ. ރާއްޖޭގެ ތާރީޚުގައިވެސް އަންހެން އެތުލީޓަކު، 100 މީޓަރު ރޭސް 12 ސިކުންތަށްވުރެ އަވަހަށް ނިންމުމުގެ ޝަރަފް ހޯދީ ރޫޔާ އެވެ.
އެ ގޮތުން، މިދިޔަ މެއި މަހު، ޖެމެއިކާގައި ކުރިއަށްދިޔަ ޖޭއޭއޭއޭ އޯލް ކަމާސްގެ އިވެންޓުގައި ދުވެ، ރޫޔާ، ރޭސް ނިންމީ، 11.87 ސިކުންތުންނެވެ. އެ މަހުގެ ކުރީކޮޅުގައި ވެސް ރޫޔާ ވަނީ 100 މީޓަރު ދުވުމުގެ ރެކޯޑް މުގުރާލައިފަ އެވެ. އެ ފަހަރު ރޭސް ނިންމީ، 12.02 ސިކުންތުން ދުވެގެންނެވެ. ބެންކް އޮފް މޯލްޑިވްސްގެ އެތުލީޓް ސްކޮލަޝިޕް ޓްރެއިނިން ޕްރޮގްރާމްގެ އެހީގައި، ޖެމެެއިކާގައި ޓްރެއިނިން ހަދާފައިވާ ރޫޔާ ވަނީ މިދިޔަ އަހަރެއްހާ ދުވަހު ބޮޑެތި ކުރިއެތުންތަކެއް ހޯދައިފަ އެވެ.
ބައިނަލްއަގުވާމީ މުބާރާތެއްގައި ފުރަތަމަ ފަހަރަށް 2022 ވަނަ އަހަރުގެ ބާމިންހަމް، ކޮމަންވެލްތުގޭމްސްގައި ދުވުނު ރޫޔާ އަކީ މި ވަގުތަށް ބަލާއިރު ރާއްޖޭގެ އެންމެ އުންމީދީ އަންހެން އެތުލީޓެވެ.