ޔޫރޯ 2024 ގެ ގަދަ 16 ގެ ބުރުގައި މިރޭ އިޓަލީއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން، ސްވިޓްޒަލޭންޑްގެ ކޯޗު، މުރާތު ޔަކީން ބުނީ، ކުރީ މުބާރާތުގައި ޕެނަލްޓީ ޝޫޓްއައުޓްގެ ރަނގަޅު ތަޖުރިބާއެއް އެބައޮތް ކަމަށާއި، އެހެންވިޔަސް އުއްމީދަކީ ޕެނަލްޓީއާ ހަމައަށް ނުގޮސް އޭނާގެ ޓީމުން މެޗުގެ ނަތީޖާ ނެރުން ކަމަށެވެ.
ޔަކީން މިހެން ބުނީ މެޗުގެ ކުރީން އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
މިހާތަނަށް ފަރިތަކުރުންތަކުގައި ޕެނަލްޓީ ޕްރެކްޓިސްކޮށްފައިވާ ކަމަށާއި، ހުރިހާ ކުޅުންތެރިންވެސް ތިބީ އެކަމަށް ފުރިހަމަ އަށް ތައްޔާރުވެފައި ކަމަށް ވެސް ޔަކީން ބުންޏެވެ. އެހެންނަމަވެސް، މިހާރު ފަރިތަކުރުންތަކުގައި ޕެނަލްޓީ ޖެހުމާއި، މެޗެއްގައި އެހާ ބޮޑު ޕްރެޝަރެއް އޮންނަ ދަނޑިވަޅުގައި ޖެހުމުގައި ވަރަށް ބޮޑު ތަފާތުތަކެއް އުޅޭނެ ކަމަށް ވެސް ޔަކީން ވަނީ ފާހަގަކޮށްފައެވެ.
މުބާރާތުގެ ނޮކްއައުޓް ބުރަށް ދަތުރުކުރުމަށްޓަކައި އޭނާގެ ޓީމުން ބުރަ މަސައްކަތްތަކެއް ކޮށްފައިވާ ކަމަށާއި، އިޓަލީއާ ދެކޮޅަށް ކުރިއަށް އޮތީ ވަރަށް ހާއްސަ މެޗެއް ކަމަށް ޔަކީން ބުންޏެވެ. އިޓަލީއާ ދެކޮޅަށް ނިކުންނަންޖެހޭތީވެ ވަރަށް އުފާވާ ކަމަށާއި، އެ މެޗު ވާނީ ވަރަށް އޯޕަން ގޭމަކަށް ކަމަށާއި، މެޗުގެ ކުރީން ފޭވަރިޓަކީ ކޮބައިކަމާމެދު ވިސްނަން ބޭނުންނުވާ ކަމަށް ވެސް ޔަކީން ވަނީ ބުނެފައެވެ.
އިޓަލީ އަކީ ޓެކްޓިކަލް ފުޓްބޯޅަ އުފެދިގެންއައި ތަން ކަމަށާއި، އެމީހުންގެ ކުޅުމާ ވަރަށް ގަޔާވާ ކަމަށް ވެސް ޔަކީންގެ ވާހަކައިގައި ފާހަގަކުރިއެވެ. ޑިފެންސްކުރަނީ ޓީމެއްގެ ގޮތުގައި، އަދި ވަކި ޔުނިޓެއްގެ ގޮތުގައި ކަމަށް ވެސް ޔަކީން ބުންޏެވެ. އޭނާގެ ޓީމުން ތިބޭނީ ހުރިހާ ކަމަކަށް ރަނގަޅަށް ތައްޔާރުވެގެން ކަމަށާއި، އޭނާ ކުޅުވާ ސިސްޓަމަށް ފޯކަސްކޮށް، އިދިކޮޅު ޓީމުގެ މައްޗަށް ގަދަވެ، ކޮންޓްރޯލްކޮށްގެން އެ މީހުންނަށް ހައިރާންކަން ގެންނާނެ ކަމަށް ވެސް ޔަކީން ވަނީ ބުނެފައެވެ.
އިޓަލީއާ ދެކޮޅަށް އިތުރު މެޗެއްގައި ކުރިމަތިލުމާ ގުޅޭގޮތުން ޔަކީން ބުނީ، މީގެ ތިން އަހަރެއްހާ ދުވަސް ކުރީން ވޯލްޑް ކަޕް ކޮލިފައިންގައި އެ ޓީމާ ވާދަކުރި މެޗާ މެދު ހިތްހަމަޖެހޭ ކަމަށާއި، އެއީ ވަރަށް ހާއްސަ ވަގުތުކޮޅެއް ކަމަށެވެ. ކުރިއަށް އޮތީ މުޅިން އައު މެޗެއް ކަމަށާއި، އުއްމީދަކީ އެ ފަހަރު ދެއްކި ފަދަ ރަނގަޅު ކުޅުމެއް ދެއްކުން ކަމަށް ވެސް ޔަކީން ބުންޏެވެ.
ސްވިޓްޒަލޭންޑްގެ ގޯލްކީޕަރު، ޔެން ސޮމާ ބުނީ، މެޗުގެ ކުރީން އެހާ ބޮޑަށް ޕެނަލްޓީ ޝޫޓްއައުޓް އަކަށް ގޮސްދާނެ ކަމަށް ނުވިސްނާ ކަމަށާއި، އެއަށްވުރެ ވިސްނަންޖެހޭ މާގިނަ ހާލަތްތައް އެބަހުރި ކަމަށެވެ. ހުރިހާ ސަމާލުކަމެއް ދޭނީ ގޭމަށް ކަމަށާއި، ވަގުތުއައިސްޖެހުމުން އެ ޓީމުގެ ސްޓާފުން ޕެނަލްޓީ އަށް ތައްޔާރުވެ، ހުރިހާ ކުޅުންތެރިން ވެސް ފުރިހަމަ އަށް ތައްޔާރުވާނެ ކަމަށް ވެސް ސޮމާ ބުނެފައިވެއެވެ.
އޭނާގެ ޓީމުން އެންމެ ބޮޑަށް ފޯކަސްކުރާނީ އިޓަލީގެ ފޯވާޑްލައިންގައި ހިމެނޭ ކުޅުންތެރިންނަށް ކަމަށާއި، އެއީ ވަރަށް ގިނަ މަގާމުތަކަށް ކުޅުމުގެ ގާބިލްކަން ހުރި ކޮލިޓީ ކުޅުންތެރިން ކަމަށް ވެސް ސޮމާ ވަނީ ބުނެފައެވެ.
މިހާތަނަށް ސްވިޓްޒަލޭންޑްގެ ފަރާތުން ފެނިފައިވާ ޑިފެންސިވް ކުޅުމާ މެދު ހިތްހަމަޖެހޭ ކަމަށާއި، މިހާރެކޭ އެއްގޮތަށް ރަނގަޅު ކުޅުމެއް ދައްކައި އެންމެން އެއް ރޫޚެއްގައި މަސައްކަތްކޮށްފިނަމަ އިޓަލީ އަށް އުނދަގޫތައް ކުރިމަތިކުރެވިދާނެ ކަމަށް ވެސް ސޮމާ ބުންޏެވެ.
މުބާރާތުގެ ގަދަ 16 ގެ ބުރުގައި އިޓަލީއާ ދެކޮޅަށް ސްވިޓްޒަލޭންޑް ކުޅުމަށް ހަމަޖެހިފައިވާ މެޗު ފަށާނީ ރާއްޖޭގަޑިން މިރޭ 9 ޖަހާއިރު އެވެ.