"އަހަރެމެންނަށް މި މޮޅު ހައްގު، މި މެޗު ފަސޭހައެއް ނޫން.އާޖެންޓީނާގެ ކޯޗު، ލިއަނޮލް ސްކަލޯނީ
މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގައި ޗިލީ ބަލިކޮށް، އެންމެ ފަހުގެ ޗެމްޕިއަން އާޖެންޓީނާ ކުއާޓާ ފައިނަލުން ޖާގަ ހޯދިއިރު، ޕެރޫ އަތުން ކެނެޑާ މޮޅުވެއްޖެއެވެ.
ޗިލީގެ މައްޗަށް އާޖެންޓީނާ އިން ކުރިހޯދީ 0-1 އިންނެވެ. ޕެރޫ އަތުން ކެނެޑާ މޮޅުވީ ވެސް 0-1 އިންނެވެ.
މި ނަތީޖާއާއެކު މި ގްރޫޕުގެ އެއްވަނައިގައި އާޖެންޓީނާ އޮތީ ކުޅުނު ދެ މެޗުން ހަ ޕޮއިންޓް ހަމަކޮށްގެންނެވެ. ދެވަނައިގައި އޮތް ކެނެޑާ އަށް ދެ މެޗުން ތިން ޕޮއިންޓް ލިބިފައިވާއިރު، ތިނެއްގައި އޮތް ޗިލީ އާއި ފުލުގައި އޮތް ޕެރޫ އަށް ލިބިފައިވަނީ އެއް ޕޮއިންޓެވެ.
އެމެރިކާގެ ނިއު ޖާޒީގައި ހުންނަ މެޓްލައިފް ސްޓޭޑިއަމްގައި ގާތްގަނޑަކަށް 81 ހާހެއްހާ ސަޕޯޓަރުންގެ ކުރިމަތީގައި މިއަދު ހެނދުނު ކުޅުނު މެޗު ފެށިގެން ގިނަވަގުތު ބޯޅަ ގެންގުޅެ، ގިނަ ހަމަލާތައް އުފައްދާ އާޖެންޓީނާ އިން ޑޮމިނޭޓްކުރިއިރު މި މެޗުގައި ފެނިގެންދިޔަ ހަމައެކަނި ލަނޑު، 88 ވަނަ މިނެޓުގައި ކާމިޔާބުކޮށްދިނީ ފަހު ހާފުގައި ކުޅެން ނިކުތް ފޯވާޑް، ލަޓާރޯ މާޓިނޭޒް އެވެ.
މި ލަނޑުޖެހުމަށް މަގުފަހިކޮށްދިނުމަށް އާޖެންޓީނާގެ ކެޕްޓަން، ލިއޮނަލް މެސީ ކޯނަރަކުން އޭރިޔާތެރެއަށް ނަގައިދިން ބޯޅަ އެ ޓީމުގެ ޑިފެންޑަރު، ލިސަންދްރޯ މާޓިނޭޒް ބޮލުން ޖައްސާލުމުން އެ ބޯޅަ ހޯދުމަށް ޗިލީގެ ނިކޮލަސް ފެނާންޑޭޒް އާއި ޖިއޮވާނީ ލޮ ސެލްސޯ ކުރި މަސައްކަތުގެ ތެރެއިން ލޮ ސެލްސޯ ފޮނުވާލި ހަމަލާ ޗިލީގެ ކީޕަރު، ކްލައުޑިއޯ ބްރާވޯ މަތަކުރުމުން އެ ޓީމުގެ އީގޯ ލިކްނޮވްސްކީ އެ ބޯޅަ ބޭރަށް ފޮނުވާލަން މަސައްކަތްކުރި ވަގުތު މާޓިނޭޒް އަށް ލިބުމުން އޭނާ ވަނީ ހަމަޖެހިލާފައި ގޯލްގެ ތެރެއަށް ފޮނުވާލައިފައެވެ.
އާޖެންޓީނާ އިން ޖެހި މި ލަނޑު ބަލައިގަންނަން ރެފްރީ ނިންމީ ގާތްގަނޑަކަށް ތިން މިނެޓްވަންދެން ވީއޭއާރް އިން ބެލުމަށްފަހު އެވެ. މިއީ މި ފަހަރުގެ މުބާރާތުގައި މާޓިނޭޒް އެ ޓީމަށް ޖަހައިދިން ދެވަނަ ގޯލެވެ. މި ދެ ލަނޑުވެސް އޭނާ ޖަހައިދިނީ ފަހު ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުމެ އެވެ. އަނެއްކޮޅުން މިއީ އާޖެންޓީނާގެ ޖާޒީގައި އޭނާ ކާމިޔާބުކުރި 26 ވަނަ ގޯލެވެ.
އޭގެކުރިން، މެޗުގެ ފުރަތަމަ ހާފުގެ 30 ވަނަ މިނެޓުގައި އާޖެންޓީނާގެ ކެޕްޓަން، މެސީ ފޮނުވާލި ބޯޅައެއް ޗިލީގެ ކީޕަރު، ބްރާވޯ އަތުގައި ޖެހިފައި އަރިމަތީ ދަނޑިއަށް އަމާޒުވެފައިވާއިރު، އޭގެފަހުން މެޗުގެ 62 ވަނަ މިނެޓުގައި މެސީ ދިން ޕާހަކުން އެ ޓީމުގެ ނިކޮލަސް ގޮންޒާލެޒް ފޮނުވާލި ބޯޅަ ބްރާވޯ މަތަކުރުމުން ދިޔައީ ހުރަސް ދަނޑީގައި ޖެހިފައެވެ.
މި މެޗުގައި ޗިލީ އިން އާޖެންޓީނާގެ ގޯލަށް އެންމެ ފުރަތަމަ ހަމަލާ ފޮނުވާލީ މެޗުގެ 72 ވަނަ މިނެޓުގައެވެ. އެއީ އެ ޓީމުގެ ރޮޑްރިގޯ އެޗެވެރިއާ ފޮނުވާލި ހަމަލާއެކެވެ. އޭގެފަހުން، އެޗެވެރިއާ ފޮނުވާލި އަނެއް ހަމަލާ ވެސް އާޖެންޓީނާގެ ކީޕަރު، އެމިލިއާނޯ މާޓިނޭޒް ހުއްޓުވިއެވެ.
ސްކަލޯނީ ބުނީ، އޭނާގެ ޓީމުން މެޗު ކާމިޔާބުކުރީ އެންމެ ހީނުކުރާ ދަނޑިވަޅުގައި ވައްދާލި ގޯލުން ކަމަށެވެ.
މި ގްރޫޕުގައި ކުޅުނު އަނެއް މެޗުގައި ފަހު ހާފުގެ ކުރީކޮޅު ޕެރޫގެ މިގުއެލް އަރައޫހޯ އަށް ދެއްކި ރަތް ކާޑާ ގުޅިގެން އެއްކުޅުންތެރިއަކު މަދުކޮށް ކުޅެމުންދަނިކޮށް، ކެނެޑާ އިން މޮޅުވީ 74 ވަނަ މިނެޓުގައި ޖޮނަތަން ޑޭވިޑް ކާމިޔާބުކުރި ގޯލުންނެވެ.
މި މެޗުގައި އެއްކުޅުންތެރިއަކު މަދުކޮށް ކުޅުނު ނަމަވެސް ގިނަ ހަމަލާތައް އުފައްދާ، ގިނަ ބޯޅަތައް ގޯލަށް އަމާޒުކޮށް ފޮނުވާލީ ވެސް ޕެރޫ އިންނެވެ.