ޔޫރޯ 2024 ގެ ގްރޫޕް ޑީ ގައި މިރޭ އޮސްޓްރިއާ އާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން، އިއްޔެ ބޭއްވި ނޫސްވެރިންގެ ބައްދަލުވުމުގައި ޕޮލެންޑްގެ ކޯޗު، މައިކަލް ޕްރޮބިއާޒް ބުނީ، ހަމައެކަނި އެގްރެސިވް ފުޓްބޯޅަ ކުޅެގެން މޮޅު ނުވެވޭނެ ކަމަށެވެ.
ޕްރޮބިއާޒް ވަނީ، އޮސްޓްރިއާ އެކޭ އެއްގޮތަށް އޭނާގެ ޓީމުން ވެސް ކުޅެން ޖެހޭނީ އެގްރެސިވް ފުޓްބޯޅަ ކަމަށް ބުނެފައެވެ. އެހެންނަމަވެސް، ހަމައެކަނި އެގްރެސިވްކޮށް ކުޅުނަސް ނުވާނެ ކަމަށެވެ. ރީތި ފުޓްބޯޅައެއްވެސް ކުޅެން ޖެހޭނެ ކަމަށް ޕްރޮބިއާޒް ބުންޏެވެ. އެހެންކަމުން، އޭނާ ބުނީ، އެ ދެ ބައި އެއްކޮށް ރަނގަޅަށް ބޭނުންކުރެވިއްޖެނަމަ ޕޮލެންޑަށް މެޗު ކާމިޔާބުކުރެވުމުގެ ފުރުޞަތު ވަރަށް ބޮޑުވާނެ ކަމަށެވެ.
ޕޮލެންޑްގެ ކުޅުންތެރިންގެ ފިޓްނަސް ރަނގަޅު ކުރުމަށްޓަކައި މެޑިކަލް ޓީމުން ކުރާ މަސައްކަތްތަކަށް ވަރަށް ބޮޑަށް ޝުކުރުވެރިވާ ކަމަށް ޕްރޮބިއާޒް ވަނީ ބުނެފައެވެ. އެގޮތުން، ޕްރޮބިއާޒް ބުނީ، އަނިޔާގައި ތިބި ލެވަންޑޯސްކީ އާއި ޑަވިޑޯވިކް ފިޓްކުރުމުގައި މެޑިކަލް ޓީމުން މުހިއްމު މަސައްކަތްތަކެއް ކޮށްފައިވާކަން ފާހަގަކުރިއެވެ.
އޭނާ އަށް ރޭގަނޑު ހަމަ ނިދި ނުލިބޭ ދުވަސްތައް ނާންނަކަން ފާހަގަކޮށް، އެއީ ކޯޗެއްގެ ގޮތުގައި އެންމެ ރަނގަޅަށް އޭނާގެ ޓީމު ތައްޔާރުކުރެވޭތީވެ ކަމަށް ޕްރޮބިއާޒް ވަނީ ބުނެފައެވެ.
ޕޮލެންޑްގެ ގޯލްކީޕަރު، ވޮޝިއެކް ޝްނެސްނީ ބުނީ، އެންމެ ފަހުން އޮސްޓްރިއާ އާ ދެކޮޅަށް ކުޅެފައިވާ މެޗުތަކުގައި ހުރީ އުފާވެރި ހަނދާންތަކެއް ކަމަށެވެ. އެ ދެ މެޗުން ބަލިވެފައިނުވާއިރު ބައިކޮޅެއް ލަނޑެއްވަދެފައިނުވާކަން ވެސް ޝްނެސްނީ ފާހަގަކުރިއެވެ.
މީގެއިތުރުން، އޭނާ ވަނީ އަނިޔާއަށްފަހު ލެވަންޑޯސްކީ އަށް އޮސްޓްރިއާ މެޗުގައި ކުޅެވޭނެތީވެ އެކަމާ ބޮޑު ހިތްހަމަޖެހުމެއް އޮތް ކަމަށާއި، އެހެންނަމަވެސް އެކަމުގެ ސަބަބުން އިދިކޮޅު ޓީމަށް ނުތަނަވަސްކަން އޮންނާނެ ކަމަށް ބުނެފައެވެ. އެގޮތުން، ޝްނެސްނީ ބުނީ، އެ ގައުމުގެ ތާރީޚުގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާގެ އެނބުރިއައުމާއެކު ހުރިހާ ގޮތަކުން ވެސް ޕޮލެންޑަށް ފައިދާވާނެ ކަމަށެވެ.
މުބާރާތުގައި އޮސްޓްރިއާ އާ ދެކޮޅަށް ޕޮލެންޑް ކުޅުމަށް ހަމަޖެހިފައިވާ މެޗު ފަށާނީ ރާއްޖޭގަޑިން މިރޭ 9 ޖަހާއިރު އެވެ.