ޔޫރޯ ފުޓްބޯޅަ މުބާރާތުގެ ގްރޫޕް ބީ ގައި މިރޭ އިޓަލީއާ ދެކޮޅަށް ކުޅޭ މެޗުގެ ކުރީން އިއްޔެ ބޭއްވި ޕްރެސް ކޮންފަރެންސްގައި ސްޕެއިނުގެ ކޯޗު، ލުއިސް ޑެ ލަ ފުއެންޓޭ ބުނީ، މެޗުން މޮޅުވުން ނޫން ވިސްނުމެއް ނެތް ކަމަށާއި، އިޓަލީއާ ދެކޮޅަށް ކުޅޭ މެޗަކީ ވަރަށް މުހިއްމު މެޗެއް ކަމަށެވެ.
އޭނާގެ ޓީމުން ކޮންމެ މެޗަކަށް ނިކުންނާނީ މޮޅުވާން ކަމަށާއި، އެ ނޫން ވިސްނުމެއްގައި ކުޅެން، އޭނާގެ ޓީމަށް ނޭނގޭ ކަމަށް ވެސް ފުއެންޓޭ ބުންޏެވެ.
ފުއެންޓޭ ވަނީ، އިޓަލީގެ ޓީމާއި އޭނާގެ ޓީމުގެ އެއްގޮތް ކަމެއް އެބަހުރި ކަމަށް ބުނެފައެވެ. އެ ޓީމުގައި އިންޑިވިޖުއަލް މޮޅު ކުޅުންތެރިންގެ އިތުރުން ތަޖުރިބާކާރު ކުޅުންތެރިން ވެސް އެބަތިބި ކަމަށް ފުއެންޓޭ ވަނީ ބުނެފައެވެ.
ކްރޮއޭޝިއާ އާ ދެކޮޅަށް އެ ޓީމުގެ ހުރިހާ ކުޅުންތެރިން ދެއްކި ކުޅުމާ މެދު ވަރަށް ބޮޑަށް ހިތްހަމަޖެހޭ ކަމަށް ފުއެންޓޭ ވަނީ ބުނެފައެވެ. އަދި އެ ނޫން އެހެން ކުޅުންތެރިން ވެސް ފަރިތަކުރުންތަކުގައި ބައިވެރިވި ގޮތާ މެދު ވެސް ހިތްހަމަޖެހޭ ކަމަށް އޭނާ ބުންޏެވެ.
ސްޕެއިނުގެ މިޑްފީލްޑަރު، ރޮޑްރީއާ ބެހޭގޮތުން ބުނީ، އޭނާ އަކީ އެ ޓީމަށް ވަރަށް މުހިއްމު ކުޅުންތެރިއެއް ކަމަށާއި، މެޗަށް ފިޓްވެފައިވާ ކަމަށެވެ. ސްކޮޑުގައި ހިމެނޭ ހުރިހާ ކުޅުންތެރިން ވެސް ފަރިކުރުންތަކުގައި ބައިވެރިވަމުން އަންނަ ކަމަށާއި، މެޗަށް ހުރިހާ އެންމެންވެސް ތިބީ ތައްޔާރަށް ކަމަށް ފުއެންޓޭ ބުންޏެވެ.
ފުއެންޓޭ ބުނީ، ބައިނަލްއަގުވާމީ ކޮންމެ މުބާރާތަކަށް އިޓަލީ ނިކުންނަނީ ކާމިޔާބުކުރެވޭނެ، ގަދަބާރެއްގެ ގޮތުގައި ކަމަށެވެ. އަދި، ސްޕެއިނާއި އިޓަލީ ބައްދަލުކުރާ މެޗަކީ ފައިނަލެއް ކަހަލަ މެޗެއް ކަމަށް ފުއެންޓޭ ވަނީ ބުނެފައެވެ. އެ މެޗުގައި ރީތި ކުޅުމެއް ފެނިގެންދާނެ ކަމަށާއި، މުބާރާތުގައި ފެނުން ހައްގު، ފުރިހަމަ މެޗަކަށް ވާނެ ކަމަށް ވެސް ފުއެންޓޭ ބުންޏެވެ.
މުބާރާތުގެ ގްރޫޕް ސްޓޭޖުގައި މިރޭ އިޓަލީއާ ދެކޮޅަށް ސްޕެއިން ކުޅުމަށް ހަމަޖެހިފައިވާ މެޗު ފަށާނީ ރާއްޖޭގަޑިން ރޭގަނޑު 12 ޖަހާއިރު އެވެ.