"މެޗެއްގެ ފޭވަރިޓާއި ބަލި ޓީމަކީ ކޮބައިކަމާމެދު ދުވަހަކުވެސް އަހަރެން ނުވިސްނަން، އެއީ މާ މުހިއްމު ކަމެއް ވެސް ނޫން.އިންގްލެންޑްގެ ކޯޗު، ގަރެތު ސައުތުގޭޓް
ޔޫރޯ ފުޓްބޯޅަ މުބާރާތުގެ ގްރޫޕް ސީ ގައި މިރޭ ޑެންމާކާ ދެކޮޅަށް ކުޅޭ މެޗުގެ ކުރީން އިއްޔެ ބޭއްވި ޕްރެސް ކޮންފަރެންސްގައި އިންގްލެންޑްގެ ކޯޗު، ގަރެތު ސައުތުގޭޓް ބުނީ، ތިން އަހަރު ކުރީން ފެނިގެންދިޔަ ޓީމަށް ވުރެ މިހާރުގެ ޓީމު މޮޅުކަން ސާބިތުކޮށްދޭން ޖެހޭ ކަމަށެވެ.
ސައުތުގޭޓް ބުނީ، އޭނާގެ ޓީމުގައި މޮޅު، ގިނަ ކުޅުންތެރިންތަކެއް އެބަތިބި ކަމަށާއި، ފުރަތަމަ މެޗުގައި ދެއްކި ކުޅުމަށްވުރެ ދެން އޮތް މެޗުގައި ކުޅުން ރަނގަޅު ކުރަން ޖެހޭނެ ކަމަށެވެ.
އިންގްލެންޑް ޓީމުގައި ހިމެނޭ ޖޫޑް ބެލިންހަމްއާ ބެހޭގޮތުން ކޯޗު، ސައުތުގޭޓް ބުނީ، ބެލިންހަމް އާއެކު މަސައްކަތްކުރުމަކީ ލިބޭ އުފަލެއް ކަމަށާއި، އޭނާ އަށް އިރުޝާދުދިނުމަށް ވަރަށް ފަސޭހަކަމަށެވެ.
"އެކަމަކު، ޓީމުގެ ހުރިހާ އެންމެންގެ ފަރާތުން ކޮންޓްރިބިއުޓް ކުރަންޖެހޭ، ޓީމަށް ކާމިޔާބު ލިބޭނީ ހަމައެކަނި އޭނާގެ ފަރާތުން ނޫން." ސައުތުގޭޓް ބުންޏެވެ.
މެޗުތަކުގައި ދައްކާ ކުޅުން އަވަސް ސްޕީޑެއްގައި އަނބުރާލުމުގައި އިންގްލެންޑް ވަރަށް ބޮޑަށް ހޭނިފައިތިބި ކަމަށް ވެސް ސައުތުގޭޓް ފާހަގަކުރިއެވެ.
ނިންމާލަމުން ސައުތުގޭޓް ބުނީ، ޑެންމާކް ޓީމަކީ ވަރަށް މޮޅު ޓީމެއް ކަމަށާއި، އެ ޓީމުގެ ހުރީ މޮޅު ކޯޗެއް ކަމަށެވެ. މީގެކުރީން، އެ މީހުންނާ ދެކޮޅަށް (އެންމެ ފަހުގެ ޔޫރޯ އާއި ނޭޝަންސް ލީގުގައި) ކުޅުނު މެޗުތައް ފަސޭހަނޫން ކަމަށާއި، އެހެންކަމުން އިންގްލެންޑް ޓީމުން ވަރަށް ރަނގަޅަށް ތައްޔާރުވެ، މޮޅު ކުޅުމެއް ދައްކަންޖެހޭނެ ކަމަށް ސައުތުގޭޓް ބުންޏެވެ.
މުބާރާތުގެ ގްރޫޕް ސްޓޭޖުގައި އިންގްލެންޑާއި ޑެންމާކް ބައްދަލުކުރާ މެޗު ފެށުމަށް ހަމަޖެހިފައިވަނީ ރާއްޖޭގަޑިން މިރޭ 9 ޖަހާއިރު އެވެ.