ކުށުގެ ޒިންމާ ނަގަންޖެހޭ އުމުރު ކުޑަކުރަނީ އަދަބުދޭކަށްނޫން، ފަރުވާދިނުމަށް: އިޙްސާން

ރާއްޖޭގައި ކުށުގެ ޒިންމާ ނަގަންޖެހޭ އުމުރު ކުޑަކުރަނީ އަދަބުދިނުމުގެ މަޤުޞަދުގައި ނޫންކަމަށާއި އެކަން ކުރަނީ ކުދިންނަށް ފަރުވާދިނުމަށް ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައެވެ. އެގޮތުން، ކުށުގެ ވެއްޓަށް ހުށަހެޅޭ ކުޑަކުދިން ކުރިން ދެނެގަނެ އެ ކުދިންނަށް ފަރުވާ ދިނުމަކީ މިފަދަ މައްސަލަތައް ހައްލުކުރަން އެޅޭނެ މުހިންމު ފިޔަވަޅެއް ކަމަށް ވަޒީރު ވިދާޅުވިއެވެ.

ރާއްޖޭގައި ކުށުގެ ޒިންމާ ނަގަންޖެހޭ އުމުރުފުރާއަކީ 15 އަހަރުން މައްޗެވެ. ނަމަވެސް ސަރުކާރުން ވަނީ އެ އުމުރު 12 އަހަރަށް ކުޑަކުރުމަށް ނިންމާފައެވެ. މީގެ ސަބަބުން ކުށްވެރިންގެ ޖީލެއް އުފެދޭނެކަމަށާއި، މިއީ އޮތް ހައްލެއް ނޫންކަމަށް ބައެއް ފަރާތްތަކުން ވަނީ ސޯޝަލް މީޑިއާގައި ޚިޔާލުފާޅުކޮށްފައެވެ.

ޕީއެސްއެމް ނިއުސްއާ ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ، ކުށުގެ މާހައުލުގައި އުޅޭ ކުޑަކުދިން ދެނެގަތުމަށް ފުރަތަމަ 6 މަސްދުވަހުގެ ތެރޭގައި ފުރިހަމަ ތަޙުޤީޤުތައް ހިންގާފައިވާ ކަމަށެވެ. ކުށުގެ ވެއްޓަށް ކުދިން ހުށަހެޅުން ހުއްޓުވުމަށް ދާއިމީ ދެ ހައްލެއް އެބައޮތް ކަމަށާއި، އެއީ މިހާރު ކުށުގެ ވެށީގައި ތިބި ކުދިންނަށް ފަރުވާދީ އަނބުރާ މުޖުތަމައަށް ނެރުމާއި ގޭންގުތަކަށް ކުދިން ރެކްރޫޓްކުރުން ހުއްޓުވުން ކަމަށް އިޙްސާން ވިދާޅުވިއެވެ.

އިޙްސާން ވިދާޅުވީ، ކުށުގެ ޒިންމާ ނަގަން ނުޖެހޭ ކުދިންނަށްވާތީ ގޭންގުތަކުން ރެކްރޫޓު ކުރަނީ 12 އަހަރާއި 15 އަހަރާ ދެމެދުގެ ކުޑަކުދިން ކަމަށެވެ.

"ރެކްރޫޓްމަންޓް ހުއްޓުވާފައި މިހާރު އެންގޭޖްވެފައިތިބި ކުދިން ޑިސްއެންގޭޖްކުރުވާފައި، އެ ކުދިންނަށް ރަނގަޅު ވަޒީފާތަކާއި ހިނގާނެ މަގު ދައްކާފައި، ފައިނޭންޝަލް ސިސްޓަމްގައި މިއުޅޭ މީހުންތައް ދޭންޖެހޭ ފަރުވާ ދިނީމަ މީގެ ދާއިމީ ހައްލަކަށްވާނީ،" އިޙްސާން ވިދާޅުވިއެވެ.

ކުށުގެ ވެށިން ފާހަގަކުރެވޭ ކުޑަކުދިން ދެނެގަނެ އެކުދިންނަށް ފަރުވާ ދިނުމަށް ޚާއްސަ ރަށެއް ތަރައްޤީކުރުމަށް ސަރުކާރުން ވަނީ ނިންމަވާފައެވެ. ސޯޝަލް ކައުންސިލުން އެ ރަށުގެ ކޮންސެޕްޓް އެޕްރޫވްކޮށްފައިވާކަމަށާއި އެންމެ އަވަހަށް ބާއްވާ ވަޒީރުންގެ މަޖިލީހަށް ހުށަހަޅުމަށް ތައްޔާރުވެފައިވާކަމަށްވެސް އިޙްސާން ވިދާޅުވިއެވެ.

"އަޅުގަނޑުމެން މިބަލަނީ ހުރިހާކަމެއް ﷲގެ އިރާދަފުޅާއެކު އަޅުގަނޑުމެން ޕްލޭންކުރާ ގޮތަށް ގޮސްފިކަމަށްވަންޏާ 3 އަހަރު ދުވަހުގެ ތެރޭގައި އެ ރަށް ފުލީ ފަކްޝަނަލް ކުރުން. އޭގެ ކުރިންވެސް އަޅުގަނޑުމެން ފުލުހުންގެ ޓްރެއިނިންގ ފެސިލިޓީތަކުގައި މީގެ ޕްރޮގްރާމްތައް ޕައިލެޓް ކުރާނަން އަޅުގަނޑުމެން،" އިޙްސާން ވިދާޅުވިއެވެ.

މިކަމާ ގުޅިގެން އެކި ފަރާތްތަކުން ސިޔާސީގޮތުން ދައްކާ ވާހަކަތަކަށް ރައްދުދެއްވައި އިޙްސާން ވިދާޅުވީ، 5 އަހަރުގެ ވެރިކަމެއް ނިންމާލުމަށްފަހު އަލަށް ހަވާލުވާ ވެރިކަމެއްގައި ކުޑަދުވަސްކޮޅެއްގެ ތެރޭގައި ހަދާ ޕޮލިސީތަކަށް ފާޑުކިޔުމަކީ އެންމެ ރަނގަޅު ގޮތްކަމެއް ނޫންކަމަށެވެ. އަދި މިހާރު މި މަސައްކަތްތައް ކުރަން ޖެހިފައިވަނީ ކުރީ ސަރުކާރުތަކުން އެކަށީގެންވާ އިސްލާހުތައް ނުގެނެވި އޮތުމުންކަމަށްވެސް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވިއެވެ.