ސީއޭ މޯލްޑިވްސްގެ ފުރަތަމަ ކައުންސިލް އިންތިޚާބު އަންނަ މަހު

އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް)ގެ ފުރަތަމަ ކައުންސިލް އިންތިޚާބު އަންނަ މަހުގެ 10ވަނަ ދުވަހު ބޭއްވުމަށް ނިންމައިފިއެވެ.

ސީއޭ މޯލްޑިވްސް އަކީ ދިވެހިރާއްޖޭގެ ޗާޓަރޑް އެކައުންޓެންޓުންގެ ޤާނޫނުގެ ދަށުން، އެ ޤާނޫނު ތަންފީޒު ކުރުމަށް، 8 ސެޕްޓެމްބަރ 2020 ގައި ޤާއިމުކުރި މުއައްސަސާއެކެވެ. އެ އިންސްޓިޓިއުޓްގެ ކައުންސިލުގައި 9 މެމްބަރުން ހިމެނެއެވެ.

އޭގެ ތެރެއިން އޮޑިޓަރ ޖެނެރަލް އާއި ކޮމިޝަނާ ޖެނެރަލް އޮފް ޓެކްސޭޝަން އަދި އެކައުންޓެންޓް ޖެނެރަލް އަކީ މަޤާމުގެ ހައިސިއްޔަތުން ކައުންސިލްގައި ހިމެނިވަޑައިގަންނަވާ (އެކްސް-އޮފިޝިއޯ) މެމްބަރުންނެވެ.

ސީއޭ މޯލްޑިވްސް ގެ ކައުންސިލަށް ކުރިމަތިލުމުގެ ފުރުޞަތު ހުޅުވާލާފައިވަނީ

• އިންސްޓިޓިއުޓްގެ ރައީސް
• ނައިބު ރައީސް
• ކައުންސިލްގެ ޢާންމު މެންބަރުންގެ ގޮތުގައި 4 މެންބަރުން

ޗާޓަރޑް އެކައުންޓެންޓުންގެ ޤާނޫނުގައި ބަޔާންކޮށްފައިވާ ގޮތުން، އިންސްޓިޓިއުޓްގެ ކައުންސިލްގެ މެންބަރުކަމަށް ކުރިމަތިލުމުގެ ޝަރުތުތަކުގެ ތެރޭގައި އިންސްޓިޓިއުޓްގެ ފެލޯ މެންބަރެއްކަމުގައި ވުމާއި ދިވެހި ރައްޔިތެއް ކަމުގައިވުން ހިމެނެއެވެ.

މެންބަރުންގެ ފަންނީ ކުރިއެރުމާއި އެކައުންޓިންގ ޕްރޮފެޝަންގެ ނަޒާހަތްތެރިކަން ކަށަވަރުކުރުމަށް ސީއޭ މޯލްޑިވްސް އިން ކުރަމުންގެންދާ މަސައްކަތަށް ބާރު ލިއްބައިދިނުމުގެ ގޮތުން އެންމެ ބޮޑު ސަމާލުކަމެއް ދޭނީ މި އިންތިޚާބުގެ ހުރިހާ ކަމެއް ރައްކާތެރި، ދެފުށްފެންނަ ގޮތެއްގައި ކުރިއަށް ގެންދިއުން ކަމަށް އެ އިންސްޓިޓިއުޓުން މަޢުލޫމާތުދެއެވެ.

މި އިންތިޚާބުގައި ވާދަކުރުމަށް ފޯމު ހުށަހެޅުމުގެ ސުންގަޑިއަކީ 8 ޖޫން 2024 ވާ ބުދަ ދުވަހުގެ 15:00 އެވެ.

މި އިންތިޚާބަކީ ދިވެހިރާއްޖޭގެ އެކައުންޓަންސީ ޕްރޮފެޝަނަކީ ދެފުށްފެންނަ، ޖަވާބުދާރީ ކުރުވަނިވި އިންޑަސްޓްރީއެއްގެ ގޮތުގައި ތަރައްޤީކުރުމަށް އެ އިންސްޓިޓިއުޓުން ކުރަމުންގެންދާ މަސައްކަތް އިތުރު ހަރުފަތަކަށް ގެންދެވޭނެ ޙަރަކާތެއް ކަމަށް ސީއޭ މޯލްޑިވްސްއިން ދެކެއެވެ.