އަންނަ ޖޫން މަހު ބޭއްވުމަށް ތައްޔާރުވަމުން އަންނަ މޯލްޑިވްސް ސްޕޯޓްސް އެވޯޑްސް 2024 ގެ އެކި މަގާމުތަކަށް މީހުން ހޮވުމުގައި އަރޓިފިޝަލް އިންޓެލިޖެންސް (އޭއައި) ގެ އެހީތެރިކަން ބޭނުންކޮށްފައިވާ ކަމަށް ޖަޖުންގެ ކޮމިޓީން ބުނެފިއެވެ.
އެވޯޑް ހަފުލާ ބޭއްވުމަށް ހަމަޖެހިފައިވަނީ އަންނަ މަހުގެ 27 ވަނަ ދުވަހެވެ. ރާއްޖޭގެ 18 ކުޅިވަރު އެސޯސިއޭޝަނަކުން މި ފަހަރު އެވޯޑަށް ނަން ހުށަހެޅުމަށް ހުޅުވާލި ފުރުސަތުގައި ވަނީ ނަން ހުށަހަޅާފައެވެ. އަދި މި ހުރިހާ ކުޅިވަރު އެސޯސިއޭޝަންތަކުގެ ކުޅުންތެރިންގެ ތަފާސްހިސާބުތަކަށް ޕޮއިންޓް ދިނުމުގައި އޭއައިގެ ބޭނުން ވަނީ ހިފާފައެވެ.
މޯލްޑިވްސް ސްޕޯޓްސް އެވޯޑްސްގެ ތައްޔާރީތަކާއި ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި "ޕީއެސްއެމް ސްޕޯޓްސް" އިން ކުރި ސުވާލަކަށް ޖަވާބުދެއްވަމުން އެވޯޑުގެ ޖަޖިން ޕެނަލްގެ ޗެއާ އަބްދުލް ނާފިއު ތައުފީގު ވިދާޅުވީ މިދިޔަ އަހަރެކޭ އެއްގޮތަށް މި އަހަރުގެ އެވޯޑަށްވެސް ހިތްހަމަޖެހޭ ވަރުގެ މަސައްކަތްތަކެއް ކުރެވިފައިވާ ކަމަށެވެ. އަދި ވަނަތައް ހޮވުމުގައި ޔަގީންކަން އޮތް ނަތީޖާތަކެއް ނެރެވިފައިވާ ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.
އިންޑިވިޖުއަލް ކުޅިވަރުތަކާއި ޓީމު ކުޅިވަރުތަކުގެ އިތުރުން އެކި ކުޅިވަރުތަކުގައި އެތުލީޓުންނާއި ކުޅިވަރުތަކަށް ޕޮއިންޓް ދޭ އުސޫލު ތަފާތު ކަމަށާއި، އެހެންކަމުން އޭއައިގެ އެހީއާއެކު ޕޮއިންޓް ދިނުމުގައި ކުރިން ކުރިމަތިލާން ޖެހުނު އުނދަގޫތައް މި ފަހަރު ކުރިމަތިނުވާ ކަމަށް ނާފިއު ވިދާޅުވިއެވެ. އަދި އޭއައި ބޭނުންކުރުމުން ހުރިހާ ކަމަކަށްވެސް ވަރަށްބޮޑު ފަސޭހައެއް ލިބިގެން ގޮސްފައިވާ ކަމަށްވެސް ވަނީ ވިދާޅުވެފައެވެ.
ނާފިއު ވިދާޅުވީ ރާއްޖޭގެ ކުޅިވަރު އެސޯސިއޭޝަންތަކުގެ ފަރާތުން މި ފަހަރު ބޮޑު އެއްބާރުލުމެއް ލިބިފައިވާ ކަމަށާއި، ކަނޑައަޅާފައިވާ ތާރީޚަށްވުރެ ކުރިން އެސޯސިއޭޝަންތަކުން ނަންތައް ހުށަހަޅާފައިވާ ކަމަށެވެ. އަދި މިއީ އެވޯޑަށް އެސޯސިއޭޝަންތަކުގެ ތާއިދު އޮތް މިންވަރު ހާމަވާ ކަމެއް ކަމަށްވެސް ވިދާޅުވިއެވެ.
މިދިޔަ އަހަރަކީ ރާއްޖޭގެ ކުޅިވަރުގައި ފާހަގަކޮށްލެވޭ އަހަރެކެވެ. އިންޑިއަން އޯޝަން އައިލޭންޑް ގޭމްސް (އައިއޯއައިޖީ) އާއި އޭޝިއަން ގޭމްސްގެ އިތުރުން ބައިނަލްއަގުވާމީ ގިނަ މުބާރާތްތަކެއްގައި ދިވެހި އެތުލީޓުންނާއި ޓީމުތައް ވަނީ ވާދަކޮށްފައެވެ. އެހެންކަމުން ކުޅުންތެރިންގެ އެ ކާމިޔާބީތައް މިނެކިރާއިރު ވަރަށް ޗެލެންޖިން ކަމަށާއި، ނަމަވެސް އެންމެ އިންސާފުވެރިކަމާއެކު އެވޯޑުގެ ކަންކަން ކުރިއަށްގެންދިއުމަށް މުޅި ކޮމިޓީންވެސް ބުރަ މަސައްކަތްތަކެއް ކޮށްފައިވާކަން ނާފިއު ފާހަގަކުރެއްވިއެވެ.
މިދިޔަ ދެ އަހަރު ދިން ސްޕޯޓްސް ފޮޓޯގްރަފީ އެވޯޑުގެ ބަދަލުގައި މިފަހަރު ދިނުމަށް ނިންމާފައިވަނީ ސްޕޯޓްސް ވިޝުއަލް އާޓިސްޓް އޮފް ދަ އިޔަރގެ ނަމުގައި އެވޯޑެވެ. އެކަމަކު އެހެން އެވޯޑުތަކަށް މި ފަހަރު އެއްވެސް ބަދަލެއް އައިސްފައެއް ނުވެއެވެ.
މޯލްޑިވްސް ސްޕޯޓްސް އެވޯޑުގެ ޖަޖުން ޕެނަލްގައި ހިމެނެނީ ގައުމީ ބާސްކެޓު ޓީމުގެ ކުރީގެ ކުޅުންތެރިޔާ ނާފިއުގެ އިތުރުން ފީފާ އަދި އޭއެފްސީގެ މެޗު ކޮމިޝަަނަރު އަޙްމަދު ޝާހިރާއި، ކުރީގެ ފީފާ ރެފުރީ އަލީ ސަލީމާއި، ޓޭބަލް ޓެނިސް އެސޯސިއޭޝަންގެ ކުރީގެ ޖެނެރަލް ސެކްރެޓަރީ އިސްމާޢީލް ސުޖާއު އަދި ގައުމީ ސްޕޯޓްސް ކައުންސިލުގެ މެންބަރު އާމިނަތު ނާޝިދެވެ.