"މަތީ ތައުލީމުގައި ޚިޔާރުކުރާ ދާއިރާއިން އެންމެ އުހަށް ދިޔުމުގެ ޢަޒުމް އޮންނަންވާނެ"

މަތީ ތަޢުލީމުގެ ފަންނުގައި ޚިޔާރުކުރާ ދާއިރާއެއްގެ އެންމެ އުހަށް ދިޔުމުގެ ޢަޒުމް ކޮންމެ ކުއްޖެއްގެ ކިބައިގައިވެސް އޮންނަންވާނެކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ ވިލާ ކޮލެޖްގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ވިލާކޮލެޖްގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން މަސްވެރިކަމާއި ދަނޑުވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ ރާއްޖެއަކީ ބިން މަދު ކުޑަ ޤައުމެއް ނަމަވެސް މިހާރު މިއީ ކިޔަވައިގެން ތިބި ޢިލްމުވެރި ދަރިންތަކެއް އުފައްދަމުންދާ ޤައުމެއްކަމަށެވެ. ވަޒީރު ވިދާޅުވީ 2040 ވަނަ އަހަރާ ހަމައަށް ދާއިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް މަސައްކަތްކުރަމުންދާއިރު އެކަމަށް ވާސިލުވުމަށް އެކި ދާއިރާތަކުން ކިޔަވައިގެން ތިބި ޒުވާނުން ބޭނުންވާކަމަށެވެ. ވަޒީރުވަނީ ކިޔަވާ ނިންމުމަށްފަހުވެސް އެކުއްޖަކު މަތީ ތަޢުލީމުގެ ފަންނުގައި ޚިޔާރުކުރި ދާއިރާއެއްގެ އެންމެ އުހަށް ދިޔުމުގެ ޢަޒުމް ބޭއްވުމަށް ނަސޭޙަތްތެރިވެވަޑައިގެންފައެވެ.

"ރާއްޖޭގެ މުހިއްމު ސިނާޢަތްތަކުގެ އިސް މަޤާމުތަކުގައި ދިވެހީން ނެތުމުގެ މައްސަލަ ނުވަތަ ދިވެހީން މަދުވުމުގެ މައްސަލަ އެބައޮތް. މިއީ އަޅުގަނޑުމެން އެންމެންވެސް ކަންބޮޑުވާކަމެއް. މިމައްސަލައަށް އޮތް އެންމެ ދެމެހެއްޓެނިވި ހައްލަކީ ތިޔަ ދަސްވެނީން އެފަދަ މަޤާމުތަކަށް އިސްވެގެންދިޔުން." ވަޒީރު ޝިޔާމް ވިދާޅުވިއެވެ.

މަސްވެރިކަމާ ބެހޭ ވަޒީރުވަނީ އުފެއްދުންތެރި އީޖާދީ ވިސްނުން ގެންގުޅުމަށާއި ކަންކަމުގައި އިސްނެގުމަށް ބާރުއަޅުއްވާފައެވެ. ހަމައެއާއެކު ކިޔަވައިގެން ވަޒީފާގެ ދާއިރާގައި އުޅުމުގައި މަސައްކަތުގެ މާޙައުލުގެ އެންމެ މަތީ އަޚްލާޤު ހިފެހެއްޓުމަށާއި ތެދުވެރިކަމާއެކު މަސައްކަތްކުރުމަށްވަނީ ހަނދާންކޮށްދެއްވާފައެވެ. ވަޒީރުގެ ވާހަކަފުޅުގައިވަނީ އެކި ދާއިރާތަކުން ޤައުމަށް ބޭނުންވާ މީހުން ބިނާކުރުމަށް ވިލާ ކޮލެޖުން ކުރަމުންދާ މަސައްކަތް ފާހަގަކޮށް އެކޮލެޖުގެ ވެރިންނަށް ޝުކުރުއަދާކުރައްވާފައެވެ.