ދިވެހި ގައުމަށް ކަމެއް ކޮށްދެވުނުކަމުގެ އިހުސާސް ކުރެވިއްޖެ ކަމަށާއި، ޓޭބަލް ޓެނިސް ތަރި ފާތިމަތު ދީމާ އަލީގެ ކާމިޔާބީތަކާ މެދު ފަޚުރުވެރިވާ ކަމަށް އޭނާގެ ބައްޕަ އަބްދުލް ސައްތާރު ޢަލީ ބުނެފިއެވެ.
އުމުރުން މިހާރު 16 އަހަރުގެ ދީމާއަކީ ރާއްޖޭގެ ކުޅިވަރު ތާރީޚުގައި ފުރަތަމަ ފަހަރަށް އޮލިމްޕިކް ގޭމްސްއަށް ކޮލިފައިވި އެތުލީޓެވެ.
އެންމެ ފުރަތަމަ ސްރީ ލަންކާގެ މުބާރާތްތަކުން ވިދާލި ދީމާގެ މައިންބަފައިން ބޭނުންވީ ރާއްޖޭގެ ނަމުގައި ދީމާ ކުޅޭށެވެ. އެ ނިންމުން ނިންމިއިރު، ލަންކާއިން ވަނީ ދީމާއަށް ގިނަ ހުށަހެޅުންތަކެއް ހުށަހަޅާފައެވެ. އެގޮތުން ލަންކާގެ ރަށްވެހިކަން ދިނުމަށް މަސައްކަތްކުރިއިރު، ލަންކާ ސަރުކާރުންވެސް ވަނީ ދީމާ އެ ގައުމުގެ ކުޅުންތެރިއެއްގެ ގޮތުގައި ބެހެއްޓުމަށް ގިނަ މަސައްކަތްތަކެއް ކޮށްފައެވެ. އަދި ދީމާގެ ފެންވަރާއި، ޓީޓީގައި ދީމާގެ ހުނަރު ފާހަގަކޮށް، އެ ގައުމުގެ ޓީޓީގެ ކޯޗުންވެސް ވަނީ ތައުރީފުކޮށްފައެވެ.
ދީމާގެ ކާމިޔާބީ ފާހަގަކުރުމަށް ބޭއްވި ޚާއްސަ ރަސްމިއްޔާތުގައި "ޕީއެސްއެމް ސްޕޯޓްސް" އާ ވާހަކަދައްކަމުން ދީމާގެ ބައްޕަ ވަނީ މީގެ އަހަރުތަކެއް ކުރިން ދީމާ ރާއްޖެއަށް ކުޅެން ނިންމި ނިންމުމާ މެދު މިއަދު ފަޚުރުވެރިވާ ކަމަށް ބުނެފައެވެ. އަދި އެ ނިންމުމާއެކު މިއަދު ގައުމަށް ކަމެއް ކޮށްދެވުނުކަމުގެ އިހުސާސް ކުރެވުނު ކަމަށްވެސް ވަނީ ބުނެފައެވެ. މީގެ އިތުރުން ދީމާގެ މަންމަ އައިޝަތު ވަހީދާވެސް ވަނީ އެ ނިންމުމާމެދު ފަޚުރުވެރިވާ ކަމަށް ބުނެފައެވެ.
ދީމާގެ ބައްޕަ އާއި މަންމައަކީ، އޭނާގެ ކާމިޔާބީތަކުގައި އެންމެ އިސް ދައުރެއް އަދާކުރި އެއް ބައެވެ. އެގޮތުން ބޭރުގެ ބޮޑެތި މުބާރާތްތަކާއި ވަރުގަދަ މެޗުތަކުގައި ދީމާ ވާދަކުރާއިރު، އެންމެ ގާތުގައި އެ ދެމަފިރިން ހަރަކާތްތެރިވެއެވެ.