ކުރިއަށް އޮތް 20 އަހަރު ދުވަހަށް ރާއްޖޭގެ ކުޅިވަރު ކުރިއެރުވުމުގެ އެކުލަވާލި ދިގު ރާސްތާ ޕްލޭނާ ގުޅޭގޮތުން އެސޯސިއޭޝަންތަކާ ބައްދަލުކޮށް، ޚާއްސަ ސަރވޭއެއް ކުރުމަށް ހަމަޖެހިފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
މޮޅެތި އެތުލީޓުން ބިނާކުރުމުގެ ދިގު ރާސްތާ ޕްލޭންގެ ޑްރާފްޓް އެކުލަވާލާފައިވަނީ މި އަހަރުގެ ފެބްރުއަރީ މަހުގެ ތެރޭގައެވެ. މި ޕްލޭނުގައި ސްކޫލް މާހައުލުން ފެށިގެން ކޯޗުން ބިނާކުރުމާއި، ބޮޑެތި ގޭމްސްތައް ރާއްޖޭގައި ބޭއްވުމާއި، މޮޅެތި އެތުލީޓުން އުފެއްދުމަށް ކުރާނެ ކަންކަން ވަނީ ހިމަނާފައެވެ. އަދި ރާއްޖޭގެ ކުޅިވަރު އެސޯސިއޭޝަންތަކުގެ ހަރަކާތްތައް މިހާރަށް ވުރެ ފުޅާވެ، އަތޮޅުތަކުގައިވެސް ގަވާއިދުން ކަންކަން ހިންގުމަށް މި ޕްލޭނުގައި ވަނީ ބާރު އަޅާފައެވެ.
ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކުގެ ތަފްސީލު ހިއްސާކުރުމަށް މިއަދު ބޭއްވި ނޫސްވެރިން ބައްދަލުވުމުގައި ވާހަކަދައްކަވަމުން ރާފިޢު ވިދާޅުވީ މި ވަގުތު މަސައްކަތް ކުރިއަށްދަނީ އެސޯސިއޭޝަންތަކުގެ އެއްބާރުލުމާ އެކުގައި ކަމަށެވެ. އެގޮތުން އެ ވުޒާރާގެ ވެބްސައިޓުގައިވާ ދިގު ރާސްތާ ޕްލޭންގެ ސިޔާސަތުކާ ގުޅިގެން މި ވަގުތު ކުރިއަށްދަނީ ތަފުސީލީ މަސައްކަތްތަކެއް ކަމަށްވެސް ވިދާޅުވިއެވެ.
ވަޒީރު ވިދާޅުވީ މި މަސައްކަތުގައި އެންމެ ބޮޑު ކަމަކަށް ކުރިއަށްދަނީ އެސޯސިއޭޝަންތަކާ ވަކިން ބައްދަލުކޮށް، ހަދާ ސަރވޭއެއްގެ މަސައްކަތް ކަމަށެވެ. އަދި މިއީ 22 ސަފުހާގެ ސަރވޭއެއް ކަމަށާއި، އެކަން އެއްކޮށް ނިންމާލުމަށް އެސޯސިއޭޝަންތަކަށް ވަގުތު ބޭނުންވާ ކަމަށްވެސް ވަނީ ވިދާޅުވެފައެވެ.
"ޑީޓެއިލް މަސައްކަތްތަކެއް މި ވަގުތު ކުރެވެމުންދަނީ. ކިހިނެތް، ކޮންތާކުތޯ، ކޮން ވަގުތަކުތޯ ކުރާނީ؟ ކޮން ބައެއްތޯ ކުރާނީ؟ އެކަން ކުރުމުގެ މަސައްކަތް ކުރެވެމުން މިހާރުދަނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާއްޖޭގެ ކުޅިވަރު ކުރިއެރުވުމުގެ ދިގު ރާސްތާ ޕްލޭންގެ ދަށުން ގިނަ މަސައްކަތްތަކެއް ކުރަމުން އަންނައިރު، އެ ޕްލޭންގެ ދަށުން ކުޅުންތެރިންނާއި، ކުޅިވަރާ ގުޅުންހުރި ދާއިރާތަކުން އެޑްމިނިސްޓްރޭޓިވް އޮފިސަރުން ތަމްރީނުކުރުމަށް މެލޭޝިއާއާއެކު އެއްބަސްވުމަކަށް އާދެވިފައިވާ ކަމަށް ރާފިޢު މީގެ ކުރިން ވަނީ ވިދާޅުވެފައެވެ. އަދި ދިގު ރާސްތާ ޕްލޭންގެ ދަށުން ކުޅުންތެރިން ތަމްރީނުކުރުމާ ގުޅޭގޮތުން ފްރާންސްގެ ސަފީރާއެކު މީގެ ކުރިން މަޝްވަރާކުރިއިރު، އެ މަސައްކަތުގެ ދަށުން މި ވަގުތު އިތުރު ދެ ގައުމަކާއެކު މަޝްވާރާކުރަމުންދާ ކަމަށްވެސް ރާފިޢު ވިދާޅުވެފައެވެ. އެއީ ސައުދީ އަރަބިއްޔާ އާއި ޔުނައިޓެޑް އަރަބި އެމިރޭޓްސް (ޔޫއޭއީ) އެވެ.