ހދ. ކުޅުދުއްފުށި ސިޓީގެ ޑަބްލިއު ސްޕޯޓްސް އެކެޑަމީން އިންތިޒާމުކޮށްގެން ބާއްވާ ދެވަނަ ބީޗް ގޭމްސް އެ ރަށުގައި ފަށައިފިއެވެ.
މި ގޭމްސް ކުރިއަށްދާނީ ކުޅުދުއްފުށި ސިޓީގެ ހިއްކި ސަރަހައްދުގައި މި މަހުގެ 12 އިން 17 ގެ ނިޔަލަށެވެ. ގޭމްސް ރަސްމީކޮށް ފެށުމުގެ ގޮތުން ރޭ ވަނީ އެ ސިޓީގައި ޚާއްސަ ހަފްލާއެއް ބާއްވާފައެވެ. މި ހަފުލާ ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢެވެ.
މި ހަފުލާގެ ތެރެއިން ކުޅުދުއްފުށި ސިޓީގެ ތާރީޚާއި ސަގާފަތް ދައްކުވައިދިނުމުގެ އިތުރުން ގައުމީ ބޮޑީބިލްޑިން ޓީމުގެ ބައެއް އެތުލީޓުންގެ ހުށައެޅުންތަކެއް ފެނިގެންދިޔައެވެ. މި ގޭމްސްގެ ތެރޭގައި ބީޗް ބޮޑީބިލްޑިންގެ އިވެންޓެއް ކުރިއަށްދާނެއެވެ. ޕަވާ ލިފްޓިން ޗެމްޕިއަންޝިޕުގެ ނަމުގައި ކުރިއަށްދާ މި މުބާރާތުގައި 19 މީހެއް ބައިވެރިވާނެއެވެ. މިއީ ރާއްޖޭގައި ބީޗް ޕަވާ ލިފްޓިން މުބާރާތެއް ބާއްވާ ފުރަތަމަ ފަހަރެވެ.
މި ގޭމްސްގެ ތެރެއިން ދެން ކުރިއަށްދާނީ ބީޗް ސޮކަރ، ބީޗް ހޭންޑްބޯލް، ބީޗް ވޮލީބޯލް، ބީޗް ނެޓުބޯޅައިގެ އިތުރުން ތްރީ އޮން ތްރީ ބާސްކެޓްބޯޅައެވެ. ކުޅުދުއްފުށި ސިޓީގެ އިތުރުން ކައިރި ރަށްރަށުންވެސް ޓީމުތައް މި ގޭމްސްގައި ބައިވެރިވެފައިވެއެވެ.
ޑަބްލިއު ސްޕޯޓްސް އެކެޑަމީން މި ގޭމްސް އެންމެ ފުރަތަމަ ބާއްވާފައިވަނީ 2019 ވަނަ އަހަރެވެ. ދެވަނަ ގޭމްސް ކުޅުދުއްފުށި ސިޓީގައި ފެށިގެން ކުރިޔަށްދާއިރު، މިއީ ބީޗް ގޭމްސްގެ ގޮތުގައި ރާއްޖޭގައި މިހާރު ކުރިޔަށްދާ އެންމެ ބޮޑު ކުޅިވަރުގެ އީދެވެ.