1600 އަށްވުރެ ގިނަ މީހުންގެ އާބާދީއެއް އޮންނަ ފ. ނިލަންދޫގައި ހުންނަ އަތޮޅު ހޮސްޕިޓަލްގައި މަސައްކަތްކުރާ 28 ނަރުހުންގެ ތެރެއިން 25 ނަރުހުންނަކީ، ނިލަންދުއަށް ނިސްބަތްވާ ޒުވާނުންނަށް ވެއްޖެއެވެ. އަދި ފ. އަތޮޅު ހޮސްޕިޓަލްގައި މަސައްކަތްކުރަމުން އަންނަ ނަރުހުންނަކީ ސައްތައިންސައްތަ ދިވެހި ނަރުހުންނަށްވެސް ވެއްޖެއެވެ.
ފ. އަތޮޅު ހޮސްޕިޓަލްގެ ޑެޕިއުޓީ ޑިރެކްޓަރ ޢަބްދުލްކަރީމް މުޙައްމަދު ވިދާޅުވީ، އެހޮސްޕިޓަލްގައި މަސައްކަތްކުރި ބިދޭސީ ނަރުހުންގެ ބަދަލުގައި މިދިޔަ ހޮނިހިރު ދުވަހުން ފެށިގެން އެ ހޮސްޕިޓަލްގައި މަސައްކަތްކުރަމުންދަނީ ދިވެހި ނަރުހުންކަމަށެވެ. އޭނާ ވިދާޅުވީ އެ ހޮސްޕިޓަލުން މަސައްކަތްކުރައްވަމުން ގެންދަވަނީ އެހޮސްޕިޓަލަކީ މުޅިންވެސް ދިވެހިން މަސައްކަތްކުރާ ހޮސްޕިޓަލަކަށް ހެދުންކަމަށާއި، މިއީ އެ އަމާޒުގެ ދަށުން ހޯދޭ ކުރިއެރުންތަކެއް ކަމަށެވެ. ފ.އަތޮޅު ހޮސްޕިޓަލްގެ ހުރިހާ ނަރުހުންނަކީ ދިވެހިންނަށް ބަދަލުކުރުމުގެ ލަނޑުދަނޑި ޙާޞިލްކުރައްވާފައި މިވަނީ މިއަހަރުގެ މަސައްކަތްތެރިންގެ ދުވަހުގެ އެއްދުވަސް ކުރިންނެވެ.
2006 ވަނަ އަހަރުގެ ޑިސެމްބަރުމަހުގެ ތެރޭގައި ހެލްތު ސެންޓަރަކުން ހޮސްޕިޓަލަކަށް ބަދަލުކުރެވުނު ފ. އަތޮޅު ހޮސްޕިޓަލުގައި 94 މުވައްޒަފުން މަސައްކަތްކުރެއެވެ.