އިނގިރޭސި ރަސްގެފާނު، ޗާލްސްއާއި ރައީސް ނަޝީދު ބައްދަލުކުރައްވައިފި

ކުރީގެ ރައީސް މުޙައްމަދު ނަޝީދު އިނގިރޭސިވިލާތުގެ ރަސްގެފާނު ޗާލްސް ތިން ވަނައާއި ބައްދަލުކުރައްވައިފިއެވެ.

ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ އިނގިރޭސިވިލާތުގެ ޝާހީ ގަނޑުވަރު ބަކިންގްހަމް ޕެލަސްގައި ބުދަ ދުވަހުގެ ވަގުތެއްގައި ކިންގް ޗާލްސްއާ ބައްދަލުކުރައްވާފައިވާ ކަމަށެވެ.

ސިޔާސީ ހަރަކާތްތަކާ ދުރުވެވަޑައިގެންކަން އިޢުލާނުކުރެއްވުމަށްފަހު މިހާރު ރައީސް ނަޝީދަކީ ތިމާވެށްޓާއި މޫސުމީ ބަދަލުތަކުން ލިބޭ ގެއްލުންތަކުން އަރައިގަތުމަށް މަސައްކަތްކުރާ ބައިނަލްއަޤުވާމީ ޖަމިއްޔާއެއްކަމަށްވާ ކްލައިމެޓް ވަލްނަރަބަލް ފޯރަމް ސީވީއެފްގެ ސެކެޓްރީ ޖެނެރަލެވެ.

އެކްސްގައި ކުރެއްވި ޕޯސްޓުގައި ރައީސް ނަޝީދު ވިދާޅުވީ، ކިންގް ޗާލްސްއާއި ސީވީއެފްއިން ތިމާވެށްޓަށް ގުޅޭ ކަންކަމުގައި އެއްގޮތް ގިނަ ކަންބޮޑުވުންތަކެއް ހުރިކަން ޤަބޫލުފުޅުކުރައްވާ ކަމަށެވެ.

އެގޮތުން ތަރައްޤީވަމުން އަންނަ ޤައުމުތަކުން ތިމާވެށްޓާއި ސާފު ހަކަތައިގެ މަޝްރޫޢުތަކުގައި އަމިއްލަ ކުންފުނިތަކަށް މާލީ އެހީތެރިކަންދޭންޖެހޭކަން ދެ ފަރާތުންވެސް ޤަބޫލުކުރައްވާކަމަށް ރައީސް ނަޝީދު ވިދާޅުވިއެވެ.

I was honoured to be granted an audience yesterday with His Majesty King Charles III. I believe His Majesty and @TheCVF share many concerns, including the need to unlock private capital for environmental and clean energy projects in developing countries. pic.twitter.com/Pf6qxxB8cz

— Mohamed Nasheed (@MohamedNasheed) March 28, 2024

އިނގިރޭސިވިލާތަށް ރައީސް ނަޝީދު ކުރައްވާ މި ދަތުރުފުޅުގައި އެ ޤައުމުގެ އިސް ބޭބޭފުޅުންނާއި ތިމާވެށީގެ ދާއިރާގައި މަސައްކަތްކުރައްވާ ބޭބޭފުޅުންނާ ވަނީ ބައްދަލުކުރައްވާފައެވެ.

58 މެންބަރު ޤައުމު އޮންނަ ސީވީއެފްގެ ސެކެޓްރީ ޖެނެރަލްގެ މަޤާމާ ރައީސް ނަޝީދު ހަވާލުވެވަޑައިގަތީ މިދިޔަ އަހަރުގެ ޑިސެންބަރު މަހުގެ 2 ވަނަ ދުވަހުއެވެ.