އެފްއޭއެމް ވެޓެރަންސް ލީގު 2024 ގައި ސްޓެލްކޯއާ ދެކޮޅަށް ކުޅުނު މެޗު ފަސޭހަކަމާއެކު މޯލްޑިވްސް ސޮކަރ މޭޓްސް (އެމްއެސް މޭޓްސް) އިން ކާމިޔާބުކޮށްފިއެވެ.
ހެންވޭރު ދަނޑުގައި ކުރިއަށްދާ މި މުބާރާތުގައި މިއަދު ކުޅުނު ގްރޫޕް ބީގެ މެޗު އެމްއެސް މޭޓްސްއިން ކާމިޔާބުކުރީ 4-0 ގެ ނަތީޖާއަކުންނެވެ.
އެމްއެސް މޭޓްސްއިން ޑޮމިނޭޓުކޮށްގެން ކުޅުނު މި މެޗުގައި އެ ޓީމުން ވަނީ ގިނަ ހަމަލާތަކެއް އުފައްދާފައެވެ. އެއާއެކު މެޗުގެ 23 ވަނަ މިނެޓުގައި އެމްއެސް މޭޓްސްއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލަކަށް ކުޅެން އެރި އަޝްއަމެވެ. އަދި އޭގެ ހަތަރު މިނެޓު ފަހުން އަޙްމަދު ނިޝާން ވަނީ ލަނޑެއް ޖަހައި، އެމްއެސް މޭޓްސްގެ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފުގައިވެސް އެމްއެސް މޭޓްސްއިން ރަނގަޅު ކުޅުމެއް ދެއްކިއިރު، އެ ޓީމުގެ ތިންވަނަ ލަނޑު ފެނިގެންދިޔައީ މެޗުގެ 51 ވަނަ މިނެޓުގައެވެ. މި ލަނޑުވެސް އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ނިޝާނެވެ. އަދި އެމްއެސް މޭޓްސްގެ ފަހު ލަނޑު މެޗު ނިމެން ތިން މިނެޓަށް ވެފައި ވަނިކޮށް ކާމިޔާބުކޮށްދިނީ އައްސަދު އަބްދުލް ޣަނީއެވެ.
މި މެޗުން އެމްއެސް މޭޓްސް މޮޅުވިއިރު، މި މުބާރާތުގައި ކުޅުނު ފުރަތަމަ މެޗުން އެ ޓީމު ވަނީ އެންމެ ފަހުގެ ރަނަރަޕް ޓީމު ކަމަށްވާ ދަ ގްރާންޑޭ ސްޕޯޓްސް ކުލަބު އަތުން ބަލިވެފައެވެ.
40 އަހަރުން މަތީގެ ކުޅުންތެރިންނަށް ޚާއްސަކޮށްގެން ބާއްވާ ވެޓެރަންސް ލީގު މި ފަހަރު ކުރިއަށްދަނީ 10 ޓީމުގެ މެދުގައެވެ. ދެ ގްރޫޕަކަށް ބަހާލައިގެން މުބާރާތުގެ ކުޅުން ކުރިއަށްދާއިރު، އެމްއެސް މޭޓްސް އާއި ސްޓެލްކޯ އަދި ދަ ގްރާންޑޭގެ އިތުރުން ގްރޫޕް ބީގައި ހިމެނެނީ މުއިވެޔޮ ފްރެންޑްސް އަދި ލެގޫންސް ސްޕޯޓްސް ކުލަބެވެ. އަދި ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން ހުޅުމާލެ ވެޓެރަންސް އާއި، ވިިލިމާލެ ޔުނައިޓެޑާއި، ޕޮލިސް ކުލަބާއި، ހުއްރިއްޔާ ސްޕޯޓްސް ކުލަބު އަދި ދިވެހި ސިފައިންގެ ކުލަބެވެ.