ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބާއްވާ ރަމަޟާން ކްރިކެޓް ކާނިވަލުގެ ފުރަތަމަ މުބާރާތް ކަމަށްވާ އޯޕަން ޓޭޕްބޯލްގައި މިއަދު ކުޅުނު މެޗުތަކުން މެރީ ކޯނަރ އާއި އެމްއޭސީއެލް މޮޅުވެއްޖެއެވެ.
ކުޅިވަރު އެކުވެނީގެ ކްރިކެޓް ދަނޑުގައި މިއަދު ހަވީރު ކުޅުނު ގްރޫޕް އޭގެ ފުރަތަމަ މެޗުން މެރީ ކޯނަރ މޮޅުވީ މީރާއާ ބައްދަލުކޮށް އަށް ވިކެޓުންނެވެ.
މި މެޗުގެ ގުރުދިމާވުމުން މީރާ އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ދެ ކުޅުންތެރިން ނުބައިވެގެން ހެދުނީ 94 ލަނޑެވެ. އެ ޓީމުން އެންމެ ރަނގަޅަށް ކުޅުނީ 12 ބޯޅައިން 22 ލަނޑު ހެދި އަލީ މުއާޒާއި، ހަތް ބޯޅައިން 13 ލަނޑު އެއްކުރި މުޙައްމަދު ޖިނާހް އިބްރާހީމެވެ.
ޖަވާބުގައި މެރީ ކޯނަރ ކުޅެން އަރައި 6.5 ވަނަ އޯވަރުގައި ވަނީ އެންމެ ކުޅުންތެރިއަކު ނުބައިވެގެން 97 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅެފައިވަނީ ނުވަ ބޯޅައިން 31 ލަނޑު ހެދި މުޙައްމަދު ހައިކަލް އާއި، ނުބައިނުވެ އަށް ބޯޅައިން 13 ލަނޑު އެއްކުރި ހާމިދެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ގްރޫޕް އޭގެ ދެވަނަ މެޗުން އެމްއޭސީއެލް މޮޅުވީ އެވިއާ މޯލްޑިވްސްއާ ބައްދަލުކޮށް އަށް ވިކެޓުންނެވެ.
މި މެޗުގެ ގުރުދިމާވުމުން އެވިއާ އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 101 ލަނޑެވެ. އެ ޓީމުން އެންމެ ރަނގަޅަށް ކުޅުނީ 22 ބޯޅައިން 42 ލަނޑު ހެދި ޔޫސުފް އަޒިޔާން އާއި، 16 ބޯޅައިން 18 ލަނޑު އެއްކުރި ޖިލްވާޒް ރަޝީދެވެ.
ޖަވާބުގައި މެރީ ކޯނަރ ކުޅެން އަރައި ހަތްވަނަ އޯވަރުގައި ވަނީ އެންމެ ކުޅުންތެރިއަކު ނުބައިވެގެން 102 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅެފައިވަނީ 10 ބޯޅައިން 34 ލަނޑު ހެދި އާދަމް ނާސިފް އުމަރާއި، ނުބައިނުވެ 25 ބޯޅައިން 19 ލަނޑު އެއްކުރި އަމީލް އަޙްމަދު މައުރޫފެވެ.
ދިވެހީންނަށް ހުޅުވާލައިގެން ކުރިއަށްދާ އޯޕަން މުބާރާތުގައި މި ފަހަރުވެސް 12 ޓީމެއް ބައިވެރިވެފައިވާއިރު، މުބާރާތުގެ ކުޅުން ކުރިއަށްދަނީ ތިން ގްރޫޕަކަށް ބަހާލައިގެންނެވެ. މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހުކުރު ދުވަހެވެ.