ކުޅުދުއްފުށި ސިޓީ ޒޯން ސްޓޭޑިއަމް މަރާމާތުކުރުމަށް އޭ.އެސް އިންވެސްޓްމަންޓާ ހަވާލުކޮށްފިއެވެ.
ކުޅިވަރާއި ހަށިހެޔޮކަމާ ބެހޭ ވުޒާރާގައި އިއްޔެ ކުރިއަށްގެންދިޔަ ރަސްމިއްޔާތެއްގައި މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރު އިބްރާހީމް އާމިރެވެ. އަދި އޭ.އެސް އިންވެސްޓްމަންޓުގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޢަބްދުލް ސަލީމް އިބްރާހީމެވެ.
ކުޅުދުއްފުށި ސިޓީ ޒޯން ސްޓޭޑިއަމް މަރާމާތުކުރުމަށް އޭ.އެސް އިންވެސްޓްމަންޓާ ހަވާލުކޮށްފައިވަނީ 1،166،400.00 (އެއްމިލިޔަން އެއްލައްކަ ފަސްދޮޅަސް ހަހާސް ހަތަރުސަތޭކަ ރުފިޔާ) އަށެވެ.
ކުޅިވަރާ ބެހޭ ވުޒާރާއިން އޭ.އެސް އިންވެސްޓްމަންޓާ ހަވާލުކުރި މަސައްކަތްތަކަކީ ސްޓޭޑިއަމުގެ ސިޑިބަރި ހިޔާކުރުމަށް ދަގަނޑު ހޮޅިން ހަދާފައިވާ އޮނިގަނޑާއި ފުރާޅު މަރާމާތު ކުރުމެވެ. އަދި ޗޭންޖިންގ ރޫމުގައި ހުރި ފާހާނާތައް މަރާމާތުކުރުން އަދި ޗޭންޖިންގ ރޫމުތަކުގައި މުށި ޖެހުމާއި، ސީލިންގ ކުރުމާއި، އޭސީ ކުރުމުގެ އިތުރުން ޗޭންޖިންގ ރޫމުތަކުގައި ކުލަލުމަށްވެސް އެއްބަސްވުމުގައި ވަނީ ހިމަނާފައެވެ.
މި މަސައްކަތް އޭ.އެސް އިންވެސްޓްމަންޓާ ހަވާލުކޮށްފައިވަނީ 77 ދުވަހުގެ ތެރޭގައި ނިންމަންޖެހޭ ގޮތަށެވެ. އަދި މި 77 ދުވަހުގެ އިތުރުން މަސައްކަތު ސައިޓާ ހަވާލުވެ، ބޭނުންވާ ސާމާނު ސައިޓަށް ޖަމާކޮށް މަސައްކަތް ފެށުމަށް 14 ދުވަސް އޭ.އެސް އިންވެސްޓްމެންޓް ލިމިޓެޑަށް އިތުރަށް ލިބޭނެ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.