މިދިޔަ އަހަރު ރާއްޖޭގައި ގެވެށި އަނިޔާގެ މައްސަލަތައް ރިޕޯޓްކޮށްފައިވާ ޢަދަދު އޭގެ ކުރީ 2 އަހަރާ އަޅާބަލާއިރު ވަރަށް ބޮޑަށް އިތުރުވެފައިވާކަމަށް ފެމެލީ ޕްރޮޓެކްޝަން އޮތޯރިޓީން ވިދާޅުވެއްޖެއެވެ. މިދިޔަ އަހަރު ގެވެށި އަނިޔާގެ 438 މައްސަލައެއް ރިޕޯޓްކޮށްފައިވެއެވެ. މީގެ ތެރޭގައި ޖިސްމާނީ އަނިޔާގެ މައްސަލަތައް ގިނަކަން ފާހަގަކޮށްލެވެއެވެ.
ގެވެށި އަނިޔާ ހުއްޓުވުމަށްޓަކައި ކަމާއިބެހޭ ޤާނޫނު އެކުލަވާލާ ދަނީ ތަންފީޒު ކުރަމުންނެވެ. މި ޤާނޫނު ތަންފީޒުކުރާތާ މިއަދަށް މިވަނީ 4 އަހަރު ވެފައެވެ. ގެވެށި އަނިޔާ އަންހެނުނާއި ފިރިހެނުންވެސް ތަޙައްމަލު ކުރަމުންދާއިރު، ގެވެށި އަނިޔާގެ ޝިކާރައަށްވާ މީހުންގެ ނިސްބަތުން މިކަން ތަޙައްމަލުކުރަމުންދާ ގިނަ މީހުންނަކީ އަންހެނުންނާއި ޒުވާން އަންހެން ކުދިންނެވެ. ވޭތުވެދިޔަ އަހަރު ކަމާބެހޭ އިދާރާތަކުގެ ތަފާސް ހިސާބުތަކަށް ބަލާއިރު ގެވެށި އަނިޔާގެ ޝިކާރައަކަށްވެފައިވާ އަންހެނުންގެ ޢަދަދު ފިރިހެނުންނަށްވުރެ ނިސްބަތުން ދެ ގުނަ އިތުރުވެފައިވެއެވެ. ފެމެލީ ޕްރޮޓެކްޝަން އޮތޯރިޓީގެ ތަފާސް ހިސާބުތަކަށް ބަލާއިރު މިދިޔަ އަހަރުގެ ނިޔަލަށް ހުށަހެޅުނު 438 މައްސަލައިގެ ތެރެއިން އަނިޔާ ލިބިފައިވާ 352 އަންހެނެއްގެ މައްސަލަ ހިމެނެއެވެ.
މި ތަފާސް ހިސާބުތަކުގައި އަނިޔާ ލިބިފައިވާ ފިރިހެނުންގެ މައްސަލައިގެ ގޮތުގައި ރިޕޯޓްކޮށްފައިވަނީ 122 މައްސަލައެވެ. 2014 ވަނަ އަހަރުގެ ތަފާސް ހިސާބާއި އަޅާބަލާއިރު، ފިރިހެނުންނަށް ގެވެށި އަނިޔާ ލިބިގެން ރިޕޯޓްކޮށްފައިވާ ޢަދަދު ވަނީ އިތުރުވެފައެވެ. ފިރިހެނުންނަށް ގެވެށި އަނިޔާ ލިބިގެން 2014 ވަނަ އަހަރު 26 މައްސަލަ ރިޕޯޓްކޮށްފަވާއިރު 2015 ވަނަ އަހަރު ފިރިހެނުންނަށް ގެވެށި އަނިޔާ ލިބިގެން 122 މައްސަލަ ވަނީ ރިޕޯޓްކޮށްފައެވެ.
އަދި ބަނޑުގައިވާ ދަރިފުޅަށް ލިބިފައިވާ އަނިޔާގެ މައްސަލައިގެ ގޮތުގައި ވޭތުވެދިޔަ އަހަރު 2 މައްސަލައެއް ހުށަހަޅާފައިވެއެވެ. މި މައްސަލަތަކުގައި 18 އަހަރުން ދަށުގެ ކުޑަކުދިން ހިމެނޭ ގެވެށި އަނިޔާގެ މައްސަލަތަކަށް ބަލާއިރު 2015 ވަނަ އަހަރު 145 މައްސަލަ ހުށަހަޅާފައިވެއެވެ. މިމައްސަލަތަކުގެ ތެރޭގައި 83 އަންހެނުން ކުދިންނާއި 62 ފިރިހެން ކުދިން ހިމެނެއެވެ. ޖިސްމާނީ އަނިޔާގެ އިތުރަށް، ޖިންސީ އަނިޔާ އާއި ނަފްސާނީ އަނިޔާކުރުމާއި ބަހުގެ ޙަމަލާދިނުމާއި، މާލީ ގޮތުން ނުވަތަ އިޤްތިޞާދީގޮތުން ދަތިކުރުމީވެސް ގެވެށި އަނިޔާގެ ޢަމަލުގެތެރޭގައި ހިމެނޭކަންކަމެވެ. އަދި ޑޮކްޓަރުގެ ލަފަޔާ ދެކޮޅަށް ވަކި މުއްދަތެއްގެ ކުރިން އަނބިމީހާ މާބަނޑުނުކުރުމަށް އެންގުމުން، އަނބިމީހާގެ ޞިއްޙަތަށް ބެލުމެއް ނެތި މާބަނޑުކުރުމާއި، އަނިޔާވެރި ކައިވެންޏަކުން ދުރުވާން މަސައްކަތްކުރާ އަންހެނާގެ ރުހުމާ ދެކޮޅަށް އޭނާ މާބަނޑު ކުރުމަކީވެސް މީގެތެރޭގައި ހިމެނޭ ކަންކަމެވެ.
މިފަދަ ކަންކަން ރިޕޯޓްކުރުމަށް އެރަށެއްގެ ޕޮލިސް ސްޓޭޝަނަށް އަދި ޗިލްޑްރަން ސާރވިސް ސެންޓަރަށާއި، ޖެންޑަރ މިނިސްޓްރީގެ ކަމާބެހޭ ނަމްބަރަށް އަދި ކުޑަކުދިންގެ މައްސަލަތަކަށް ޚާއްޞަ ހޮޓްލައިން 1412 އަށް ހުށަހެޅޭނެއެވެ. އަދި އީމެއިލާއި ވެބްސައިޓް މެދުވެރިކޮށް މައްސަލަ ހުށަހެޅޭނެއެވެ. މީގެ އިތުރަށް ގެވެށި އަނިޔާ ހުއްޓުވުމުގެ ޤާނޫނުގެ ދަށުން ރައްކާތެރިކުރުމުގެ ޢަމުރަކަށް ވެސް އެދެވިދާނެއެވެ.
ގެވެށި އަނިޔާގެ ޢަމަލެއްކަމުގައި ޤާނޫނުގައި ބަޔާންކޮށްފައިވާ ޢަމަލެއް ކޮށްފިނަމަ ގެވެށި އަނިޔާ ހުއްޓުވުމުގެ ޤާނޫގެ ދަށުން ފިޔަވަޅު އެޅޭނެއެވެ. އަދި ޖިނާޢީ ކުށެއްކަމަށްވާނަމަ ޖިނާޢީ ކުށުގެ ދަޢުވާ އުފުލޭނެއެވެ. ގެވެށި އަނިޔާ ހުއްޓުވަން ދިމާވާ އެންމެ ބޮޑު އެއް ހުރަހަކީ އެކަން ރިޕޯޓްކުރުމަށް ފަސްޖެހި، ހިތްދަތިކަމާއެކުގައިވެސް އެކަންތައް ތަޙައްމަލުކުރަމުން ގެންދާ ގެންދިއުމެވެ. އެހެންކަމުން އަނިޔާތަކާ ދެކޮޅަށް ތެދުވުމަށް ފަރުދީ ފެންވަރުގައާއި އިޖްތިމާޢީ ފެންވަރުގައި ގިނަ މަސައްކަތްތަކެއް ކުރަންޖެހެއެވެ.