އަތޮޅުތަކުގައި މިހާރު ހިންގާ ތަފާތު އެކި ކޭމްޕްތަކުން ކެރަމްގެ ކުޅުންތެރިން އެފުއްދުމުގެ އިތުރުން ކޯޗުން ތަމްރީނުކުރަމުންދާ ކަމަށް ކެރަމް އެސޯސިއޭޝަނުން ބުނެފިއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި މައުލޫމާތު ހިއްސާކުރައްވަމުން ކެރަމް އެސޯސިއޭޝަނުގެ ޖެނެރަލް ސެކްރެޓަރީ ހުސެއިން ރައުޝަން ވިދާޅުވީ އަތޮޅުތަކުގައި ކޭމްޕުތައް ހިންގުމުގައި ދިމާވާ އެންމެ ބޮޑު ގޮންޖެހުމަކީ ތަމްރީނުވެފައި ތިބި ކޯޗުން މަދުވުމުގެ މައްސަލަ ކަމަށެވެ. އެގޮތުން އެސޯސިއޭޝަނުން އަތޮޅުތަކުގައި ކުޅުންތެރިންގެ ތަމްރީނު ޕްރޮގްރާމުތައް ހިންގުމަށްފަހު، އެނބުރި މާލެ އައުމުން އެ ޕްރޮގްރާމުތަކާ ހަވާލުވެ އިސްކޮށް މަސައްކަތް ކުރާނެ ފަރާތެއް ނުހުންނަކަމަށް ރައުޝަން ވިދާޅުވިއެވެ.
"އަޅުގަނޑުމެން ރަށްރަށުގެ ޕްރޮގްރާމުތައް ހިންގާއިރު ކުދިން ތަމްރީނުކުރުމުގެ އިތުރުން ރަށްރަށުގައި އެބަ ތަމްރީނުކުރަން ކޯޗުންވެސް. އެއީ ޔޫތު ސެންޓަރުން ނަމަވެސް، ސުކޫލެއްގެ ސްޕޯޓްސް ސްޕަވައިޒަރަކަށް ވިޔަސް، ލީޑިން ޓީޗަރަކަށް ވިޔަސް، ކޮންމެވެސް އެކަކު އެބަ ތަމްރީނުކުރަން.ހުސެއިން ރައުޝަން - ކެރަމް އެސޯސިއޭޝަނުގެ ޖެނެރަލް ސެކްރެޓަރީ
ރައުޝަން ވިދާޅުވީ އެންމެ ބޮޑު ބޭނުމަކީ ދެމެހެއްޓެނިވި ގޮތެއްގައި އެ ރަށެއްގައި ޕްރޮފެޝަނަލީ ކެރަމް ކުޅުންތެރިން ތަމްރީނުވެގެންދިޔުން ކަމަށެވެ. އޭގެ ސަބަބުން ރަށްރަށުން އިސްވެ ޕްރޮގްރާމުތައް ހިންގުމަށް ފަސޭހަވެގެންދާނެ ކަމަށްވެސް ވިދާޅުވިއެވެ.
ރައުޝަން ވިދާޅުވީ އެސޯސިއޭޝަނުން އިސްނަގައިގެން ރާއްޖޭގެ އެކި ސަރަހައްދުތަކުގައި ކޯޗުން ތަމްރީނުކުރުމުގެ ކޯސްތަކެއް ހިންގަމުން އަންނަ ކަމަށާއި، އެ ކޯސްތަކުގައި އެކި ރަށްރަށުގެ ކޯޗުން ތަމްރީނުކުރަމަށް އިސްކަންދެއްވާ ކަމަށެވެ. އަދި މި ވަގުތު ކުރެވޭ އެންމެ ބޮޑު މަސައްކަތަކީ ރަށްރަށުގައި ކޯޗުން ތަމްރީން ކުރުމުގެ މަސައްކަތް ކަމަށްވެސް ވަނީ ވިދާޅުވެފައެވެ.