ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސްގެ މަގާމުން މުޙައްމަދު ރަނޭޝް (ރަނޭ) އިސްތިއުފާދެއްވައިފިއެވެ.
ވީއޭއެމްގެ ރައީސްގެ މަގާމަށް 2021 ވަނަ އަހަރުގެ އޭޕްރީލް މަހުގެ ތެރޭގައި އިންތިޚާބުވެވަޑައިގެންނެވި ރަނޭ ވަނީ މިއަދުގެ ވަގުތެއްގައި މަގާމުން އިސްތިއުފާދެއްވަން ނިންމާފައިވާކަން ސިޓީއަކުން އަންގަވާފައެވެ. މަގާމުން ރަނޭ އިސްތިއުފާދެއްވިއިރު، އޭނާގެ ދައުރުގައި ބާކީ އަހަރަކަށް ވުރެ ގިނަ ދުވަސް އެބައޮތެވެ.
ރަނޭ މަގާމުން އިސްތިއުފާދެއްވަން ނިންމެވީ މި ވަގުތު ވަޒީފާ އާއި ދިރިއުޅުމުގެ ކަންތައްތައް، ގައުމުން ބޭރަށް ބަދަލުކުރަން ޖެހުމުންނެވެ. އެގޮތުން ގައުމީ އެއާލައިން ކަމަށްވާ މޯލްޑިވިއަންގެ ސީނިއާ ކެޕްޓަނެއްގެ ގޮތުގައި މަސައްކަތް ކުރެއްވި ރަނޭ މިހާރު ވަނީ ވަޒީފާގެ ފުރުސަތެއް ލިބުމުން، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދިރިއުޅުން ބަދަލުކުރައްވާފައެވެ.
އިސްތިއުފާދެއްވައި ފޮނުއްވި ސިޓީގައި ރަނޭ ވިދާޅުވީ އޭނާގެ ދައުރަށް ކުރިން ލަފާނުކުރެވޭ ގޮންޖެހުންތަކެއް ކުރިމަތިވެ އަދި ކޮވިޑް-19 ގެ ސަބަބުން ބޮޑު ބުރޫއެރުމެއް ކުރިމަތިވެ، ހަތަރު އަހަރުގެ ދައުރުން އެއް އަހަރާއި ބައި ގެއްލިގެންދިޔަ ކަމަށެވެ. އެހެންނަމަވެސް އެ ގޮންޖެހުންތަކާއެކުވެސް ވޮލީގެ ކުރިމަގަށް ރަނގަޅު މަސައްކަތްތަކެއް ކުރެވުނު ކަމަށްވެސް ވަނީ ވިދާޅުވެފައެވެ.
ރަނޭ ވިދާޅުވީ ގިނަ ކާމިޔާބީތަކެއް ލިބުނު ނަމަވެސް، ރާއްޖެއިން ބޭރަށް ދިރިއުޅުން ބަދަލުކުރެއްވުމާއެކު، މެންބަރު ކުލަބުތަކާއި ވީއޭއެމުގެ ހިންގާ ކޮމިޓީގެ މެދުގައި އެއްބައިވަންތަކަން ދެމެހެއްޓުމަށް މަގާމުން ވަކިވުމަކީ އެސޯސިއޭޝަނުގެ މަސްލަހަތަށް އެންމެ ރަނގަޅު ނިންމުން ކަމަށެވެ.
ރަނޭ މަގާމުން އިސްތިއުފާދެއްވިއިރު، ދާދި ފަހުން އޭނާގެ ސްޕެޝަލް އެޑްވައިޒަރަކަށް އެ އެސޯސިއޭޝަންގެ ކުރީގެ ރައީސް މުޙައްމަދު ލަތީފް ވަނީ އައްޔަންކުރެއްވިއެވެ. އަދި އެ އެސޯސިއޭޝަނުގެ ޖެނެރަލް ސެކްރެޓަރީގެ މަގާމަށް މުޙައްމަދު ސައީދުވެސް ވަނީ މި ފަހުން އައްޔަންކުރައްވާފައެވެ. ވީއޭއެމުގެ ކަންކަން މި ފަހުން ހަމަޔަކަށް އެޅެމުން އަންނައިރު، މި މަހުގެ 15 ވަނަ ދުވަހު ބޭއްވި އެކްސްޓްރާ އޯޑިނަރީ ކޮންގްރެސްއެއްގައި، އެ އެސޯސިއޭޝަނުގެ އަސާސީ ގަވާއިދު ވަނީ ފާސްކޮށްފައެވެ.
އެ ބައްދުވުން ޗެއާ ކުރެއްވީ ރަނޭއެވެ. އެ ބައްދަލުވުމަށްފަހު "ޕީއެސްއެމް ސްޕޯޓްސް" އާ ވާހަކަދައްކަވަމުން ރަނޭ ވިދާޅުވީ ވީއޭއެމުގެ އިދާރީ ހިންގުން ހަރުދަނާކުރުމުގެ ގޮތުން އަސާސީ ގަވާއިދު ފާސްކުރެވިގެންދިޔައީ ވޮލީބޯޅަ އާއިލާގެ އެއްބައިވަންތަކަމާއި އޮތް އެކުވެރި ގުޅުމުގެ ސަބަބުން ކަމަށެވެ. އެހެންކަމުން ވޮލީ އާއިލާގެ އެއްބައިވަންތަކަމަށް ރަނޭ ވަނީ ޚާއްސަ ޝުކުރެއް އަދާކުރައްވާފައެވެ.