ލޯންގްކޯސް 50 މީޓަރު ބެކްސްޓްރޯކް އިވެންޓުގެ ގައުމީ ރިކޯޑު މުޙައްމަދު އާން ޙުސައިން އައުކޮށްފިއެވެ.
ފިލިޕީންސްގެ ނިއު ކްލަރކް ސިޓީގައި މިހާރު ކުރިއަށްދާ 11 ވަނަ އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕުގައި އާން މި ރިކޯޑު އައުކޮށްފައިވަނީ 29.51 ސިކުންތުން ރޭސް ފުރިހަމަކޮށްގެންނެވެ.
މި ރިކޯޑު އެންމެ ފަހުންވެސް އައުކޮށްފައިވަނީ އާންއެވެ. އެއީ 2022 ވަނަ އަހަރު ބޭއްވި 19 ވަނަ ފީނާ ވޯލްޑް އެކުއަޓިކްސް ޗެމްޕިއަންޝިޕްސްގައެވެ. އެ ފަހަރު އާން ރޭސް ނިންމާފައިވަނީ 29.57 ސިކުންތުންނެވެ.
އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕުގައި ޖުމްލަ 28 ދިވެހި ފެތުންތެރިން ވާދަކުރެއެވެ. މިއީ ދިވެހި ފެތުންތެރިން މި މުބާރާތުގައި އައުކުރި ފުރަތަމަ ގައުމީ ރިކޯޑެވެ. ދާދި ފަހުން ގަތަރުގެ ދޯހާގައި ކުރިއަށްދިޔަ 21 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި ވާދަކުރި ގައުމީ ހަތަރު ފެތުންތެރިން ވަނީ ގައުމީ ހަތް ރިކޯޑެއް އައުކޮށްފައެވެ.