ކުރިއަށް އޮތް ސީޒަނުގެ ފުރަތަމަ ޑިވިޝަނަށް ނުކުންނައިރު ޖަހިލުންވާވާރުގެ ޓީމެއް ނެތް ކަމަށާއި، އަމާޒަކީ ގައުމީ މުބާރާތުގައި ވާދަކުރުން ކަމަށް މަސްއޮޑި ސްޕޯޓްސް ކުލަބުން ބުނެފިއެވެ.
2022 ވަނަ އަހަރުގެ ތިންވަނަ ޑިވިޝަނުގެ ރަނަރަޕްކަން ހޯދި މަސްއޮޑިން ވަނީ މި ފަހަރުގެ ދެވަނަ ޑިވިޝަނުގައި ކުޅުނު ހުރިހާ މެޗަކުން މޮޅުވެ، ސައްތައިން ސައްތަ ރިކޯޑެއް ދަމަހައްޓާފައެވެ. އަދި ފައިނަލުގައި ވިކްޓަރީ ސްޕޯޓްސް ކުލަބު ބަލިކުރިއިރު، މަސްއޮޑި ވަނީ ކުރިއަށް އޮތް ސީޒަނުގެ ފުރަތަމަ ޑިވިޝަނުގެ ޖާގައެއް ހޯދާފައެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަދައްކަމުން އެ ކުލަބުގެ ޖެނެރަލް ސެކްރެޓަރީ އަލީ ޝިފާޒް ބުނީ ފުރަތަމަ ޑިވިޝަނުގެ އަލަތު އަހަރު ދިވެހި ޕްރިމިއާ ލީގު ތަށި ހޯދުން އެއީ މި ވަގުތު ވިސްނުމެއް ނޫން ކަމަށެވެ. އެހެން ނަމަވެސް އެ ޓީމުން ލީގުގެ ގަދަ ހަތަރެއްގެ ތެރޭގައި ހިމެނެން މަސައްކަތްކުރާނެ ކަމަށާއި، ބޭނުންވަނީ ފުރަތަމަ ސީޒަންގައި ގައުމީ މުބާރާތުގައި ކުޅުން ކަމަށްވެސް ޝިފާޒް ބުންޏެވެ.
ޝިފާޒް ބުނީ މަސްއޮޑިން ދަސްކުރަންޖެހޭ ވަރަށް ގިނަ ކަންކަން އެބަހުރި ކަމަށާއި، އެ ކުލަބަކީ ފުރަތަމަ ޑިވިޝަނަށް އައު ނަމަކަށް ވިޔަސް، ޖެހިލުންވެ ފަހަތަށް ޖެހޭވަރުގެ އެއްވެސް ކުލަބެއް ނެތް ކަމަށެވެ. އެކަމުގެ ހެއްކެގެ ގޮތުން ދެވަނަ ޑިވިޝަނުގެ ފައިނަލުގައި ރާއްޖޭގެ ފުޓްބޯޅައިގެ މުއްސަނދި ތާރީޚެއް އޮތް ބޮޑު ކުލަބެއް ބަލިކޮށް، މަސްއޮޑިން ތަށި ނެގުން ޝިފާޒް ވަނީ މިސާލެއްގެ ގޮތުގައި ފާހަގަކޮށްފައެވެ.
"އަޅުގަނޑުމެން ގައުމީ މުބާރާތް ކުޅޭނެ. ލީގުގަ ގަދަ ހަތަރެއްގައި ހިމެނުން ޓާގެޓަކީ. މަސްއޮޑި ސްޕޯޓްސް ކުލަބު ޖެހުލުންވާ ވަރުގެ ޓީމެއް ނޫޅޭނެ. އަސްލު ހަގީގަތުގައި އަޅުގަނޑުމެން އަދިވެސް މިދަނީ ދަސްކުރަމުން.އަލީ ޝިފާޒް - މަސްއޮޑީގެ ޖެނެރަލް ސެކްރެޓަރީ
ފުރަތަމަ ޑިވިޝަނުގައި ވާދަކުރަން ނުކުންނައިރު ރާއްޖޭގެ މި ވަގުތު ފުޓްބޯޅައިގެ ހާލަތު އޮތްގޮތުން މަސްއޮޑިންވެސް ވަނީ ކަންބޮޑުވުން ފާޅުކޮށްފައެވެ. އެގޮތުން ފުރަތަމަ ޑިވިޝަނުގައި ވާދަކުރާ ކުލަބުތަކަށް ކުޅޭ ކުޅުންތެރިންގެ އެންމެ ބޮޑު ކަންބޮޑުވުމަކީ މުސާރަ ނުލިބުންކަން ފާހަގަކުރަމުން ޝިފާޒް ބުނީ ކުޅުންތެރިންނަށް ބަރާބަރަށް މުސާރަދެވޭނެ ގޮތްތަކެއް ހޯދަންޖެހޭ ކަމަށެވެ.
މަސްއޮޑިން ކޮންމެ ކުޅިވަރަކަށް ނުކުތަސް ނުކުންނަނީ ދުރާލައި ތައްޔާރުވެގެން، ޕްލޭނެއްގެ ދަށުން ކަމަށާއި، މިހާތަނަށް އެއްވެސް ކުޅުންތެރިއަކަށް ދޭންޖެހޭ ފައިސާއެއް ނުދީ ނޯންނާކަމުގެ ޔަގީންކަން އެ ކުލަބުން ވަނީ ދީފައެވެ.
ފުރަތަމަ ޑިވިޝަނަށް ކުލަބް ޕްރޮމޯޓްވުމާއެކު ފުރަތަމަ ޑިވިޝަނުގައި ކުޅެމުން އަންނަ ވަރަށް ގިނަ ކުޅުންތެރިން އެ ޓީމަށް ކުޅެން ޝައުގުވެރިކަން ފާޅުކުރަމުން އަންނަ ކަމަށް ޝިފާޒް ބުންޏެވެ. އަދި މަސްއޮޑިން އަލުން އަނބުރާ ދެވަނަ ޑިވިޝަނަށް ދާން ބޭނުނުވާ ކަމަށާއި، ކުރިމަގުގައި ބޭނުންވަނީ އޭއެފްސީ ކަޕުގައި ތަމްސީލުކުރުން ކަމަށްވެސް ޝިފާޒް ވަނީ ބުނެފައެވެ.
"އަޅުގަނޑުމެންގެ ނެތޭ އަލުން ސެކަންޑް ޑިވިޝަނަށް އައުމުގެ ވިސްނުމެއް. އެއްވުރެ މާ ބުންވަރު ވަރުގަދަ އަޅުގަނޑުމެންގެ. ހިތްވަރު އެބަހުރި އަޅުގަނޑުމެން. ވަރަށް ޒުވާން ޓީމެއް މިއީ. އަޅުގަނޑުމެންނަށް އެބައޮތް އެ އިތުބާރު.އަލީ ޝިފާޒް - މަސްއޮޑީގެ ޖެނެރަލް ސެކްރެޓަރީ
ޝިފާޒް ބުނީ ރާއްޖޭގެ ފުޓްބޯޅަ މިއޮތް ދަތި ހާލުން ނަގައި ކޮޅަށް ޖެހޭނެ ހަމައެކަނި ބަޔަކީ މަސްއޮޑި ކަމަށާއި، އެ ޓީމުން ފުރަތަމަ ޑިވިޝަން ޕްރޮމޯޓުވި އެންމެ މުހިންމު ބޭނުމަކީވެސް އެއީ ކަމަށެވެ.