މަޖިލިސް އިންތިޚާބަށް 65 ޓްރެއިނަރުން ތަމްރީނުކޮށްފި

ކުރިއަށްއޮތް ރައްޔިތުންގެ މަޖިލިސް އިންތިޚާބުގައި ހަރަކާތްތެރިވާނެ އޮފިޝަލުން ތަމްރީން ކުރުމަށް ޓްރެއިނަރުން ތަމްރީނުކޮށްފިއެވެ.

"ޓްރެއިންގ އޮފް ޓްރެއިނަރސް" ގެ ނަމުގައި އިލެކްޝަންސް ކޮމިޝަނުން މި ޕްރޮގްރާމް ކުރިއަށްގެންދިޔައީ މި މަހުގެ 17 އިން 23 އަކަށެވެ.

މިޕްރޮގްރާމަކީ ވޯޓުފޮށިތައް ކައިރީގައި ހަރަކާތްތެރިވާ އޮފިޝަލުންނަށް ތަމްރީން ދިނުމަށްޓަކައި ރާއްޖޭގެ އެކި ކަންކޮޅުތަކުގައި ހަރަކާތްތެރިވާނެ މީހުން ތަމްރީންކުރުމަށް ކޮންމެ އިންތިޚާބަކާ ދިމާކޮށް ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ފުރިހަމަކޮށް 65 ބައިވެރިއަކު ސެޓްފިކެޓް ހާސިލްކޮށްފައިވާކަމަށް އިލެކްޝަންސްގެ ނައިބު ރައީސް އިސްމާއިލް ހަބީބު ވިދާޅުވިއެވެ.

ހަބީބު ވިދާޅުވީ، މި ޕްރޮގްރާމް ނިންމި ބައިވެރިން ފާދިއްޕޮޅު، މާލެ އަތޮޅު، ފެލިދެއަތޮޅު އަދި މާލެ ސިޓީ ފިޔަވައި ރާއްޖޭގެ އެހެން ހުރިހާ އަތޮޅުތަކަކާއި ސިޓީތަކުގައި އޮފިޝަލުން ތަމްރީން ކުރުމުގެ ޕްރޮގްރާމްތައް މިއަދު ފަށާނެ ކަމަށެވެ. އެގޮތުން، ވޯޓުލާ މަރުކަޒުތަކުގައި ވޯޓު ނެގުމާއި ވޯޓު ގުނުމުގެ މަސައްކަތް ކުރާ އޮފިޝަލުން ކަންކުރާނެ ގޮތުގައި މައުލޫމާތާއި އިރުޝާދު ދޭނެކަމަށް އޭނާ ވިދާޅުވިއެވެ.

އޮފިޝަލުން ތަމްރީން ކުރުމުގެ ޕްރޮގްރާމްތައް މިއަދު ފެށި ނަމަވެސް ބައެއް ރަށްތަކަށް ބޭނުންވާ އޮފިޝަލުން އަދިވެސް ހަމަނުވާކަމަށް އިލެކްޝަންސް އިން ވިދާޅުވެއެވެ. އޮފިޝަލުންނަށް ވުމަށް އެދި ހުށަހެޅުމުގެ ފުރުޞަތު ހުޅުވާލާފައިވަނީ އަންނަ މަހުގެ 5 ވަނަ ދުވަހުގެ ނިޔަލަށެވެ.

ހަބީބު ވިދާޅުވީ ރައްޔިތުންގެ މަޖިސްގެ އިންތިޚާބުގެ މަސައްކަތުގައި ހަރަކާތްތެރިވާ ހުރިހާ އޮފިޝަލުން، އިލެކްޝަންސް އިން ޙަވާލުކުރެވޭ ޒިންމާއާއި ތެދުވެރިކަމާއި އަމާނާތްތެރިކަމާއެކު އަދާކުރާނޭކަމުގެ އިޤުރާރުގައި ސޮއިކުރާނެ ކަމަށެވެ. އަދި މި އިޤުރާރުގައި ސޮއިކުރުމަށްފަހު، އެއްވެސް އޮފިޝަލަކު، ކެމްޕޭންގެ އެއްވެސް ހަރަކާތެއްގައި ނުވަތަ ސިޔާސީ އެއްވެސް ކަމެއްގައި، އުޅުމަކީ ހުއްދަ ކަމެއްނޫން ކަމަށް އޭނާ ވިދާޅުވިއެވެ.