ބައިނަލްއަގުވާމީ މުބާރާތްތައް ބޭއްވޭ ފެންވަރުގެ ބޮޑު ސްޓޭޑިއަމެއް މާލޭ ރާޅުގަނޑު ސަރަހައްދުގައި ގާއިމުކުރުމުގެ މަސައްކަތް މި އަހަރު ފެއްޓެވޭތޯ މަސައްކަތްކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައްޔިތުންގެ ސުވާލުތަކަށް ޖަވާބުދެއްވުމަށް ބާއްވާ "އަހާ" ފޯރަމުގެ ތެރެއިން ރާއްޖޭގައި އުފެދުނު އެންމެ މޮޅު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ މީގެ ކުރިން ރާޅާއެޅުމުގައި ހަރަކާތްތެރިވާ ދެ ޖަމުއިއްޔާއަކާ ބައްދަލުކުރެވުނު ކަމަށާއި، ކުރެވުނު މަޝްވަރާގެ އަލީގައި ދެ ޖަމުއްޔާއިންވެސް އެއްބަސްވާ ގޮތަކަށް ކަންކުރައްވާނެ ކަމަށެވެ. އެގޮތުން ކުރިންވެސް އެދުނު ގޮތަށް ސަރުކާރުން މަސައްކަތްކުރައްވަމުން ދަނީ މި އަހަރުގެ ތެރޭގައި ބައިނަލްއަގުވާމީ ފެންވަރުގެ ސްޓޭޑިއަމެއް ރާޅުގަނޑު ސަރަހައްދުގައި ގާއިމުކޮށްދިނުމުގެ މަސައްކަތް ފެށުމަށް ކަމަށްވެސް ރައީސް ވަނީ ވިދާޅުވެފައެވެ.
ރައީސް ވިދާޅުވީ އެ މަޝްރޫއުގެ މަސައްކަތުގައި ދެ ޖަމުއިއްޔާ ބޭނުންވާ ގޮތަށް މިހާރު ތަން ޑިޒައިންކުރެވި، ކުރެހުންވެސް ނިމި، މަސައްކަތަށް ޚަރަދުވާނެ އަގުވެސް މިހާރު ނިމިފައިވާ ކަމަށެވެ. އެ ސްޓޭޑިމުގެ މަސައްކަތް ބަޔަކާ ހަވާލުކުރުމުގެ މަރުހަލާގައި އޮތްކަން ފާހަގަކުރައްވަމުން ރައީސް ވިދާޅުވީ މި އަހަރުގެ ތެރޭގައި އެ މަސައްކަތަށް ފަންޑު ހޯދައި، މަސައްކަތް ފެއްޓެވޭނެ ކަމަށެވެ.
މި ކަމަށް މިވަގުތު އޮތް އެންމެ ބޮޑު ދައްޗަކީ މި އަހަރުގެ ބަޖެޓުގައި މި މަޝްރޫއު ހިމެނިފައި ނެތުން ކަމަށާއި, އެހެން ނަމަވެސް އިންވެސްމަންޓުގެ ގޮތުގައި ނުވަތަ ކޮންޓްރެކްޓަރާ ފައިނޭންޝަލް އުސޫލުން ވިޔަސް ހަވާލުކޮށްގެން، މި މަސައްކަތް މި އަހަރު ފެއްޓެވުމަކީ އަމާޒެއް ކަމަށް ރައީސް ވިދާޅުވިއެވެ.
"އަޅުގަނޑަށް ކެމްޕެއިން ތެރޭގައި ބައްދަލުކުރި ރާޅާއަޅާ ކުދިން. އެއީ އަޅުގަނޑުގެ ރިޔާސީ ވައުދެއް. އަޅުގަނޑު ދެންނެވިން ތިބޭފުޅުން ބޭނުންވާ ގޮތެއްް ވިދާޅުވެދެއްވާށޭ. އޭރުން އަޅުގަނޑަށް ފުރުސަތު ލިބިއްޖިޔާ ކޮށްދޭނަމޭ. އެބޭފެޅުން ބޭނުންވަނީ އިންޓަރނޭޝަނަލް ސާފިން ސްޓޭޑިއަމެއް ރާޅުގަނޑު ސަރަހައްދުގައި އަޅަން. އަޅުގަނޑު ވައުދުވިން އެކަން ކޮށްދޭން.ރައީސުލްޖުމްހޫރިއްޔާ ޑރ. މުޙައްމަދު މުއިއްޒު
ރާއްޖޭގައި ކުޅިވަރު ކުރިއަރުވަން ކުރަން ހުރި މަސައްކަތްތައް ވަރަށްވެސް ގިނައެވެ. އެ ގޮތުން މި ވަގުތު ހުރި ކުޅިވަރު ވަސީލަތްތަކަށް ގެންނަން ޖެހޭ ބަދަލުތައް ގެނެސްގެން، އެތުލީޓުންނަށް އެންމެ ރަނގަޅު މަންފާކުރާނެ ގޮތަކަށް ކަންކަން ބައްޓަން ކުރުން މުހިންމުކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުވެސް މީގެ ކުރިން ފާހަގަކުރައްވާފައެވެ.