ކުޅިވަރުގެ ދިގު ރާސްތާ ޕްލޭންގެ ޑްރާފްޓް އެކުލަވާލައި، ފިޓް މޯލްޑިވްސް އެޕްލިކޭޝަން އިފްތިތާހުކޮށްފި

މޮޅެތި އެތުލީޓުން ބިނާކުރުމުގެ ދިގު ރާސްތާ ޕްލޭންގެ ޑްރާފްޓް އެކުލަވާލައި، ފިޓް މޯލްޑިވްސް އެޕްލިކޭޝަން އިފްތިތާހުކޮށްފިއެވެ.

މިކަމަށްޓަކައި މިއަދު މީރުމާ ހޯލުގައި ބޭއްވި ހަފުލާ ޝަރަފްވެރިކޮށްދެއްވީ ކުޅިވަރާއި އިޖުތިމާއީ ދާއިރާއިން ފާހަގަކޮށްލެވޭ ޝަޚުސިއްޔަތެއް ކަމަށްވާ މަރިޔަމް ވަހީދާއެވެ. މީގެ އިތުރުން މި ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި އެ ވުޒާރާގެ އިސްވެރިންގެ އިތުރުން، ކުޅިވަރު ބައެއް އެސޯސިއޭޝަންތަކުގެ އިސްވެރިންނާއި، ކުޅިވަރުގެ ވަރުގަދަ ޝަޚުސިއްޔަތުން ބައިވެރިވެވަޑައިގެންނެވިއެވެ.

ސަރުކާރުގެ ހަފުތާ 14 ގެ ކުޅިވަރު ވައުދުތަކުގެ ތެރޭގައި ހިމެނޭ ފިޓް މޯލްޑިވްސް އެޕްލިކޭޝަން އިފްތިތާހުކޮށް އާންމުންނަށް ރަޖިސްޓްރީވުމުގެ ފުރުސަތު މިއަދު ވަނީ ހުޅުވާލާފައެވެ. މިއީ ޕްރިމިއަމް ފީޗާތަކާއެކު ރާއްޖޭގައި އިފުތިތާހުކުރި ފުރަތަމަ ފިޓްނަސް އެޕްލިކޭޝަނެވެ.

މީގެއިތުރުން މި ހަފުލާގައި ކުޅިވަރާއި ހަށިހެޔޮކަމާ ބެހޭ ވަޒީރު ރާފިޢު ވަނީ ކުޅިވަރުގެ ދިގު ރާސްތާ ޕްލޭންގެ ޑްރާފްޓް، ޕްރެޒެންޓޭޝަނެއްގެ ސިފައިގައި ހުށަހަޅައިދީފައެވެ. މި ޑްރާފްޓަށް ޚިޔާލު ހުށަހެޅުމުގެ ފުރުސަތު ކުޅިވަރާ ގުޅުންހުރި ފަރާތްތަކަށް ލިބިގެންދާނެއެވެ. އަދި މި ޑްރާފްޓް ފައިނަލްކުރުމަށް ހަމަޖެހިފައިވަނީ ކުޅިވަރުގެ ތަޖުރިބާކާރުންނާއި، އެސޯސިއޭޝަންތަކާއި، ކުޅިވަރުގައި ހަރަކާތްތެރިވާ ފަރާތްތަކުގެ ޚިޔާލާއި މަޝްވަރާ ހޯދުމަށްފަހުއެވެ.

މި ރަސްމިއްޔާތަށްފަހު ދެއްވި އިންޓަވިއުއެއްގައި ރާފިޢު ވިދާޅުވީ މި ޑްރާފްޓް އެކުލެވިގެންދިޔައީ ވަރަށް ގިނަ ބައެއްގެ ޝާމިލުވުމާ އެކީގައި ކަމަށާއި، އޭގެ ތެރޭގައި ކުޅިވަރު އެސޯސިއޭޝަންތަކާއި، ކުޅިވަރު މުއައްސަސާތަކާއި އަދި ކުޅިވަރުގައި އުޅުއްވާ އެކިއެކި ބޭފުޅުން ހިމެނޭ ކަމަށެވެ.

ކުޅިވަރުގެ ދިގު ރާސްތާ ޕްލޭނުގެ މި ޑްރާފްޓުގައި ސްކޫލް މާހައުލުން ފެށިގެން ކޯޗުން ބިނާކުރުމާއި، ބޮޑެތި ގޭމްސްތައް ރާއްޖޭގައި ބޭއްވުމާއި، މޮޅެތި އެތުލީޓުން އުފެއްދުމަށް ކުރާނެ ކަންކަން ވަނީ ހިމަނާފައެވެ. އެގޮތުން ކުޅިވަރުގެ މާސްޓަރ ކަލަންޑަރެއް އެކުލަވާލުމާއި، އެސޯސިއޭޝަންތައް ބާރުވެރިކުރުމާއި، ކޯޗުންނާއި ކުޅިވަރުގެ މެނޭޖްމަންޓުގައި ހަރަކާތްތެރިވާ ފަރާތްތައް ތަމްރީނުކުރުމާއި، ސްކޫލުތަކުގެ ކުޅިވަރު ހަރަކާތްތައް މެނޭޖުކުރާނެ އުސޫލުގެ އިތުރުން ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބޭއްވުން ހިމެނެއެވެ.