އިރާނުގައި ވެރިރަށް ތެހެރާނުގައި ކުރިއަށްދިޔަ އޭޝިއަން އިންޑޯ އެތުލެޓިކްސް މުބާރާތުގައި ވާދަކޮށް، 800 މީޓަރު ދުވުމުގެ ގައުމީ ރިކޯޑު ފަސޫހާ އަޙްމަދު މުގުރާލައިފިއެވެ.
މި މުބާރާތުގެ 800 މީޓަރު އިވެންޓުގައި ވާދަކޮށް ފަސޫހާ ރޭސް ނިންމީ ދެ މިނެޓު 22.30 ސިކުންތުންނެވެ. މީގެ ކުރިން މި ރިކޯޑު އޮތީ 2006 ވަނަ އަހަރުގެ އޭޝިއާގެ އިންޑޯ މުބާރާތުގައި ވާދަކުރި ފާތިމަތު ހަޝްމާގެ އަތުގައެވެ. އޭނާ އެ ފަހަރު ރިކޯޑު ހެދީ ދެ މިނެޓު 37.21 ސިކުންތުން ރޭސް ފުރިހަމަކޮށްގެންނެވެ. އެހެންކަމުން ފަސޫހާ މި ރިކޯޑު މުގުރާލާފައުވަނީ 18 އަހަރު ފަހުންނެވެ.
މި ފަހަރުގެ ގޭމްސްގެ 800 މީޓަރުގެ ދުވުމުގެ ފައިނަލުގައި ދުވި ފަސޫހާ ހަވަނައިގައި ރޭސް ނިންމާލިއިރު، އޭނާ ވާދަކުރި ރޭހުގެ އެއްވަނަ ހޯދީ އިރާނުގެ ތޮކްތަމް ދަސްތަރުބަންދަންއެވެ. އޭނާ ރޭސް ނިންމާފައިވަނީ ދެ މިނެޓު 9.17 ސިކުންތުންނެވެ.
ފަސޫހާގެ އިތުރުން އޭޝިއަން އިންޑޯ ގޭމްސްގައި ދެން ވާދަކޮށްފައިވަނީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދެވެ. މުބާރާތުގެ 60 މީޓަރު ދުވުމުގައި ސާއިދު ވާދަކުރިއިރު، އޭނާ ދިޔައީ ހީޓު އެކެއްގެ ހަވަނައަށެވެ. ސާއިދު ރޭސް ނިންމާފައިވަނީ 6.95 ސިކުންތުންނެވެ. މި ރޭހުގެ އެއްވަނަ ހޯދި ޝުހޭއި ޓާޑާގެ ޓައިމިން އަކީ 6.60 ސިކުންތެވެ.