ހަފުތާ 14 ގެ މަގުޗާޓުގައި ކުޅިވަރުގެ ދާއިރާއިން ހާސިލުކުރުމަށް ކަނޑައަޅާފައިވާ ކަންކަމުގެ ތެރެއިން ފަސް ދަނޑުގެ މައްޗަށް އެކުލެވޭ ފުޓްސަލް އާއި ނެޓްބޯޅަ ކޮމްޕްލެކްސް އިމާރާތްކުރާ ބިން ހަވާލުކޮށްފިއެވެ.
ފުޓްސަލް ކޮމްޕްލެކްސް ގާއިމުކުރުމަށް ހަމަޖެހިފައިވަނީ ހުޅުމާލެ ފޭސް ދޭއްގައެވެ. އަދި ނެޓްބޯޅަ ކޮމްޕްލެކްސް ގާއިމުކުރާނީ ހުޅުމާލެ ފޭސް އެކެއްގައެވެ.
ފުޓްސަލް އާއި ނެޓްބޯޅަ ކޮމްޕްލެކްސް އިމާރާތްކުރާ ބިން ހަވާލުކުރުމަށް ހުޅުމާލޭ ފޭސް ދޭއްގައި މިއަދު ޚާއްސަ ރަސްމިއްޔާތެއް ބޭއްވިއިރު، ކުޅިވަރާއި ހަށިހެޔޮކަމާ ބެހޭ ވުޒާރާ އާއި، މާލީ ވުޒާރާ އަދި ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ) އާއެކު ވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި، މާލީ ވަޒީރު ޑރ. މުޙައްމަދު ޝަފީޤުގެ އިތުރުން އެޗްޑީސީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަފުޅުދައްކަވަމުން ކުޅިވަރާއި ހަށިހެޔޮކަމާ ބެހޭ ވަޒީރު ރާފިޢު ވިދާޅުވީ މި މަޝްރޫއާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޒުވާނުންނަށް، އަދި ވަކިން ޚާއްސަކޮށް ކުޅިވަރަށް ދެއްވާ އަހަންމިއްޔަތުކަން ނިހާޔަތަށް ފާޅުވެގެންދާ ކަމަށެވެ. އަދި މިކަން ކުރެއްވުމަށް އެ މަނިކުފާނު ނިންމަވައި، ކުޑަ ދުވަސްކޮޅެއްގެ ތެރޭގައި އެކަން ހަމަޖެހިގެން ދިޔައީ ގިނަ މުއައްސަސާތަކާއެކު ކޯޑިނޭޓްކުރައްވައިގެން ކަމަށްވެސް ވަނީ ވިދާޅުވެފައެވެ. މީގެ އިތުރުން ވަޒީރުގެ ވާހަކަފުޅުގައި ވަނީ މި ދެ ކޮމްޕްލެކްސްއާއެކު ރާއްޖޭގެ ކުޅިވަރުގެ އިންފްރާސްޓްރަކްޗާއަށް ބޮޑު އިންގިލާބީ ބަދަލެއް އަންނާނެކަން ފާހަގަކުރައްވާފައެވެ.
މި ރަސްމިއްޔާތުގައި ވާހަކަފުޅުދައްކަވަމުން އެޗްޑީސީގެ މެނޭޖިންގ ޑިރެކްޓަރު ފަޒުލް ވިދާޅުވީ ލިބޭ އުފަލަކީ ސަރުކާރަށް މިފަދަ ފަހި ފުރުސަތުތަކެއް ނުވަތަ ޒުވާނުންނަށްޓަކައި އަދި ކުރިއަށް އޮތް ޖީލުތަކަށްޓަކައި މިކަންކަން ހާސިލުކުރުމަށް ލިބިފައި އޮތް ފުރުސަތުގެ ބޭނުންކޮށްގެން، ރައީސް ޑރ. މުޢިއްޒު ފޯރުކޮށްދެއްވާފައިވާ ފަހި ފުރުސަތުތައް ވާސިލުކޮށްދިނުން ކަމަށެވެ. އަދި އެޗްޑީސީގެ ފަރާތުން ކުޅިވަރު ދާއިރާގެ ތަރައްގީއަށް ކުރާ ކޮންމެ މަސައްކަތެއްގައި ބައިވެރިވުން އޮންނާނެކަމުގެ ޔަގީންކަން އަރުވާ ކަމަށްވެސް ވަނީ ވިދާޅުވެފައެވެ.
މިއީ ރާއްޖޭގައި ގާއިމުކުރާ ފަސް ދަނޑުގެ ފުރަތަމަ ކޮމްޕްލެކްސްތަކެވެ. އަދި މި ދެ ކޮމްޕެލްކްސް ވެގެންދާނީ މަލްޓި ސްޕޯޓްސް ކުޅެވޭ ގޮތަށް ފަރުމާކުރެވިގެން ތައްޔާރުކުރެވޭ ދެ ތަނަށް ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.