ދިވެހި ރައްޔިތުން ދުޅަހެޔޮ ސިއްހަތެއްގައި ތިބުމަށް ސަރުކާރުން ފަށަން ތައްޔާރުވާ "ފިޓް މޯލްޑިވްސް" އެޕްލިކޭޝަނުގެ އެންމެ ބޮޑު ބޭނުމަކީ ހަރަކާތްތެރި މުޖުތަމައެއް ބިނާކުރުން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ސަރުކާރުގެ ފުރަތަމަ 100 ދުވަހުގެ ތެރޭގައި ހާސިލުކުރަން ބޭނުންވާ ލަނޑުދަނޑިތަކުގެ ތެރޭގައި، ކުޅިވަރުގެ ދާއިރާއިން ހަފުތާ 14 ގެ މަގުޗާޓުގައި ހިމެނޭ އެންމެ މުހިންމު ކަމެއްގެ ގޮތުގައި ހިމެނެނީ ރައްޔިތުންގެ ދުޅަހެޔޮކަމަށް "ފިޓް މޯލްޑިވްސް" މޯބައިލް އެޕްލިކޭޝަނެއް ތައާރަފްކުރުމެވެ.
ޕީއެސްއެމުން ގެނެސްދިން "ކުޅިވަރު ދިންދު" ޕްރޮގުރާމުގައި އެ މަޝްރޫއުގެ އެންމެ ފަހުގެ ތަފުސީލު ހިއްސާކޮށްދެއްވަމުން ރާފިޢު ވިދާޅުވީ އެ މަސައްކަތް މިހާރު ކުރިއަށްދަނީ އެންމެ ފަހުގެ މަރުހަލާ ކަމަށާއި، އަމާޒަކީ އަންނަ ހުކުރު ދުވަހު އެޕްލިކޭޝަން އިފްތިތާހު ކުރެވިގެންދިއުން ކަމަށެވެ. ރާފިޢު ވިދާޅުވީ މިގޮތަށް އެޕްލިކޭޝަނެއް ބައްޓަންކުރުމުގެ އެންމެ މުހިންމު މަގުސަދަކީ ގައިންގަޔަށް ނާރާ ބަލިތަކުން ދުރުވެގެން ތިބުން ކަމަށެވެ.
"އޭގެ އެންމެ ބޮޑު ބޭނުމަކީ އަޅުގަނޑުމެންގެ ސޮސައިޓީއަކީ އެކްޓިވް ސޮސައިޓީއަކަށް ހެދުން، އެކަން ކުރަން އަޅުގަނޑުމެން ފަށާއިރު އަޅުގަނޑުމެންނަށް ބަލާނަން ކިހާ ވަރަކަށްތޯ އެކްޓިވްކޮށް މީހުން އުޅެނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާފިޢު ވިދާޅުވީ ބޭނުމަކީ ޕްރިމިއަމް އެޕްލިކޭޝަނެއް އެއްވެސް އަގަކާ ނުލައި ރައްއިތުންނަށް ފޯރުކޮށްދިނުން ކަމަށާއި، ކުޅިވަރަށް ނުވަތަ ހަރަކާތްތެރިވެ އުޅުމަށް އަހުލުވެރިކުރުވަން ކަމަށެވެ. މީގެ ސަބަބުން ދިވެހި ރައްޔިތުންނަކީ ހަރަކާތްތެރި ބައެއްގެ ގޮތުގައި އުޅުމަށް ފުރުސަތު ފަހިވެގެންދާނެ ކަމަށްވެސް ވިދާޅުވިއެވެ.
"އެކްޓިވިކޮށް، ހެލްތީކޮށް މީހުން ދިރިއުޅޭނެ ގޮތް މަގުފަހިކޮށްދިނުން އެންމެ ބޮޑު ބޭނުމަކީ، އަދި ހަމައެއާކު އަޅުގަނޑުމެންނަށް އެކަން ކުރަމުންދާ މިންވަރުވެސް އެނގުން، އޭރައް އަޅުގަނޑުމެންނަށް އެނގޭނީ އެކްސެސައިޒް ޕްރޮގްރާމުތައް މޮޑިފައިކޮއްގެން، އެއް އަހަރުން އަނެއް އަހަރަށް ކުރިއަށްގެންދަން.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ދެމެހެއްޓެނިވި ގޮތެއްގައި ދިވެހި ރައްޔިތުން ހަރަކާތްތެރި ކުރުވާ "ފިޓް މޮޑެލް" އެއް ގާއިމުކުރުމުގެ އެންމެ ބޮޑު ޒިންމާއެއް މި ވަގުތު މަތިވެފައިވަނީ ކުޅިވަރު ވުޒާރާއަށެވެ. ކުރިން ކުޅުންތެރިންނަށް ފޯރުކޮށްދެމުން އައި ފަރުވާގެ ޚިދުމަތް މިހާރު މިވަނީ ވަޒީރުގެ ދުރުވިސްނޭ ތަސައްވަރާއެކު ރައްޔިތުން ސިއްހަތާ ގުޅުވާލާފައެވެ.